Փաստ ինֆո

ՊՊԾ գնդի տարածքում «Սասնա Ծռեր» խմբի անդամներին անցյալ տարվա հուլիսի 26-ին հաց հասցրած և նախօրեին արդեն երկրորդ անգամ կալանավորված Արթուր Սարգսյանն այսօր առավոտյան հացադուլ է սկսել:

Հացադուլի մասին մերձավորներն իմացել են այն բանից հետո, որ Ա.Սարգսյանի հետ տեսակցելու համար գնացել են քրեակատարողական հիմնարկ, որտեղ նրանց ոչ տեսակցություն են թույլ տվել, ոչ էլ ուտելիքն են ընդունել՝ ասելով, որ Արթուր Սարգսյանը հացադուլ է սկսել:

«Փաստինֆո»-ի լրագրողի հետ զրույցում Արթուր Սարգսյանի եղբայրը՝ Արսեն Սարգսյանը, նշեց, որ չի էլ ուզում պատկերացնել, թե ինչ կլինի եղբոր հետ՝ թեկուզ մեկ օր սնունդ և դեղորայք չընդունելու հետևանքով: «Ինքնասպանության է գնում»,- ասաց Արսեն Սարգսյանը:

Հիշեցնենք, որ անցյալ տարեվերջին կտրուկ վատացել էր Արթուր Սարգսյանի առողջական վիճակը, ինչի կապակցությամբ իր անհանգստությունն է հայտնել նաև նրա եղբայրը՝ Արսեն Սարգսյանը:

Մասնավորապես, Արթուր Սարգսյանի պաշտպաններ Տիգրան Եգորյանի ու Դավիթ Գյուրջյանի կողմից տարածված հաղորդագրության համաձայն, դեկտեմբերի 10-ին Սարգսյանի մոտ սկսվել են գլխապտույտներ, սրտխառնոց և փսխումներ: Դեկտեմբերի 11-ին Արթուր Սարգսյանի մոտ արդեն սկսվել են արյունային փսխումներ: Կանչվել էր շտապօգնություն, և Սարգսյանը տեղափոխվել էր «Էրեբունի» բժշկական կենտրոն: «Էրեբունի» բժշկական կենտրոնում իրականացվել էր հետազոտություն, որի արդյունքներով ախտորոշվել էր կերակրափողի էրոզիա և ճաք, որից տեղի էր ունենում արյան արտահոսքը, աղեստամոքսային համակարգի խնդիրներ, նշանակվել է բուժում դեղորայքի և ներերակային կաթիլային ներարկումների միջոցով: Այնուհետև Սարգսյանը կրկին տեղափոխվել էր «Նուբարաշեն» ՔԿՀ: Փաստաբաններն իրենց նամակում նշել էին, որ այդ հիվանդությունների արդյունավետ բուժումն ակնհայտորեն չի կարող ապահովվել «Նուբարաշեն» ՔԿՀ-ում:

2016 թվականի դեկտեմբերի 30-ին կայացված որոշմամբ վերահսկող դատախազը փոփոխել էր Ա.Սարգսյանի կալանավորումը՝ չհեռանալու ստորագրության և նրան ազատ արձակել կալանքից: Ըստ այն ժամանակ դատախազության տարածած մամուլի հաղորդագրության, նրա մոտ ախտորոշված հիվանդությունը նվազեցնում է նրա կողմից քննությունից խուսափելու հավանականությունը:

Աղբյուր` Փաստինֆո