Փաստ ինֆո

Երևանի Ավան և Նոր-Նորք վարչական շրջանների ընդհանուր իրավասության դատարանում այսօր շարունակվեց ՀՀ ՊՆ Վազգեն Սարգսյանի անվան ռազմական ինստիտուտի հրամանատարի նախկին տեղակալ Զարմիկ Մարկոսյանի կողմից որդու՝ Գնել Թևոսյանի համար արտոնյալ պայմաններ ստեղծելու գործով դատական նիստը:

Այսօրվա նիստում հարցաքննվեց երկու վկա՝ Թելման Մխիթարյանը և Տիգրան Մանասերյանը, վերջիններս դատարանում դժվարացան վերհիշել գործին առնչվող մանրամասներ, որոնք տեղի են ունեցել 2014թ. օգոստոս ամսից մինչև 2015թ հունվարը, սակայն նշեցին, որ ներկայումս ամբաստանվող գնդապետի որդին՝ Գնել Թևոսյանը, արտոնյալ կարգավիճակ է ունեցել, այսինքն՝ նա յուրաքանչյուր շաբաթից մինչև կիրակի օրը զորամասում չի եղել, եղել են նաև դեպքեր, երբ նա տուն է գնացել նաև աշխատանքային օրերին և սա այն դեպքում, որ Թևոսյանն անբավարար գնահատականներ է ունեցել:

Ըստ վկաների, զորամասի ներքին կանոնադրության համաձայն, անբավարար գնահատականներ ունեցողներին թույլ չէր տրվում տուն գնալ, սակայն Գնելը գնացել է:

Վկաների դատաքննական և նախաքննական ցուցմունքներում առկա էական հակասություններով պայմանավորված՝ մեղադրող դատախազ Հայկ Հարոյանի միջնորդությամբ հրապարակվեց նրանց նախաքննական ցուցմունքները:

Վկա Թելման Մխիթարյանը ևս նկատեց իր ցուցմունքներում առկա հակասությունը, սակայն նա դա բացատրեց նրանով, որ երկար ժամանակ է անցել և մոռացել է, իսկ նախաքննության ընթացքում, երբ ցուցմունքն է տվե,լ ավելի թարմ է եղել հիշողությունը:

Ըստ վկայի նախաքննական ցուցմունքի՝ Գնել Թևոսյանը աշխատանքային օրերին ևս գնացել է տուն և մինչև քուն հրամանը զորամասում չի եղել, իսկ թե ինքն անձամբ տեսել կամ լսել է, որ գնդապետը սպաներին կարգադրի կամ խնդրի թույլ տան գնալ տուն, վկան բացասական պատասխան տվեց:

Վկա Տիգրան Մանասերյանն էլ հայտնեց, որ Գնել Թևոսյանն արտոնյալ է եղել, ինչը պայմանավորված է եղել գնդապետ հոր գործոնով:

Նա նշեց նաև, որ Գնելն իր հետ լարված հարաբերությունների մեջ է գտնվել, սակայն ինքը նորմալ է վերաբերվել նրան:

Երբ տեղեկացել է, որ թեև Գնելը բարձր առաջադիմություն չունի բայց գնում է տուն, սրտնեղել է, սակայն կարճ ժամանակ անց դա անցել է: Վկան իր օրինակով հայտնեց նաև, որ իրեն թույլ չեն տվել տուն գնալ, քանի որ անբավարար գնահատական է ունեցել, սակայն որևէ մեկի վրա հույս չի դրել, ամեն ինչ փորձել է իր ուժերով անել՝ շտկել է գնահատականը և տուն գնացել:

Ստեղծված վիճակից դժգոհել է, սակայն որևէ մեկի մոտ չի բարձրաձայնել:

Նշենք, որ պաշտպանական կողմի հարցերին վկան հեգնանքով էր պատասխանում, քմծիծաղ էր տալիս, ինչի վերաբերյալ պաշտպան Արա Զաքարյանի դիտողությանը վկան պատասխանեց, որ իր դուրը չի գալիս, ամեն անգամ էդ տհաճ գործով գալիս է դատարան:

Վկայի պահվածքի վերաբերյալ ամբաստանյալ Զարմիկ Մարկոսյանի պաշտպան Արա Զաքարյանի հայտարարությունից հետո վկան էլ իր հերթին հայտարարեց, որ նախաքննության ժամանակ, երբ առերեսում է տեղի ունեցել իր հետ, պաշտպանը իբրև նույն կերպ է պահել իրեն և այնպիսի հարցեր է հնչեցրել ինչը իր նյարդերի վրա ազդել է:

Լուսանկարում՝ Գնել Թևոսյանը

Աղբյուր` Փաստինֆո