Փաստ ինֆո

Ապօրինի կերպով ձեռք բերված «ԱԿ» տեսակի ինքնաձիգից Վ.Ասոյանի սպանության մեջ մեղադրվող Գագիկ Ղանդիլյանի գործով հաջորդ դատական նիստում մեղադրական ճառերով հանդես կգա մեղադրանքի կողմը՝ մեղադրողն ու տուժողի իրավահաջորդի ներկայացուցիչը:  Մեղադրողը դատարանից ժամանակ խնդրեց ճառի հրապարակմանը նախապատրաստվելու համար:

Իսկ այսօրվա դատական նիստում տուժողի իրավահաջորդի ներկայացուցիչ, փաստաբան Սեդա Սաֆարյանը միջնորդեց մեղադրողին վերադարձնել մեղադրական եզրակացությունը՝ գործի հետ միասին, մեղադրանքը լրացնելու ու փոփոխելու համար, ինչի համար, ըստ փաստաբանի, հիմքեր կան:

Ըստ Սեդա Սաֆարյանի, արարքը սխալ է որակված, այն պետք է որակվեր ոչ թե ՀՀ քրեական օրենսգրքի 104-րդ հոդվածի 1-ին մասով, այլ ՀՀ քրեական օրենսգրքի 104-րդ հոդվածի 2-րդ մասի 6-րդ և 10-րդ կետերով՝ շատերի կյանքի համար վտանգավոր եղանակով, խուլիգանական դրդումներով կատարված սպանություն:

Ըստ փաստաբանի, նախաքննական մարմնի կողմից ճիշտ գնահատականի չեն արժանացել մի շարք փաստական հանգամանքներ, չի կատարվել բազմակողմանի, օբյեկտիվ քննություն: Մասնավորապես, գնահատականի չի արժանացել այն հանգամանքը, որ ամբաստանյալի կողմից արձակված անկանոն կրակոցների հետևանքով վնասվածք է ստացել նաև մի կին, վնասվել է մոտակա տան պատը, այսինքն՝ կրակոցները կարող էին վնասել՝ ֆիզիկապես ու հոգեպես, մանկահասակ երեխային, եթե նա քնած չլիներ:
Տուժող կողմի ներկայացուցիչը նշեց նաև, որ ըստ անչափահաս վկայի ցուցմունքի, դեպքից հետո ամբաստանյալը նստել է վարորդի կողքի նստատեղին ու հեռացել դեպքի վայրից, այսինքն, ըստ Սեդա Սաֆարյանի, ամբաստանյալը մենակ չի եղել:

Սեդա Սաֆարյանը նշեց նաև, որ հիմնավոր չեն նաև սպանության դրդապատճառի վերաբերյալ ներկայացվող հանգամանքները. ըստ մեղադրական եզրակացության, Գագիկ Ղանդիլյանը 2015թ. հուլիսի 6-ին ժամը 13:00-ի սահմաններում Երևան քաղաքի Նոր Արեշ թաղամասում տեսել է տան մոտ նստած տուժող Վ.Ասոյանին, հիշել, որ տուժող շուրջ երեք տարի առաջ հեռախոսազրույցում իրեն հայհոյել է, գնացել է, լիցքավորել ապօրինի կերպով ձեռք բերված «ԱԿ» տեսակի ինքնաձիգը: Ապա այն պահելով տուժողի ուղղությամբ՝ կրակոցներ է արձակել, որի հետևանքով ստացած վնասվածքներից տուժողը մահացել է, իսկ ամբաստանյալը մեքենայով փախուստի է դիմել:

Մեղադրողն իր հերթին նշեց, որ նման միջնորդություն ներկայացվել է նաև նախաքննական մարմնին, որը քննության է առնվել, հետազոտվել ու մերժվել: Ըստ մեղադրողի, չկան հիմքեր գործը մեղադրողին վերադարձնելու համար, եթե դրանք լինեին, ապա նախաքննության մարմնի կողմից դրանք կարտացոլվեին մեղադրանքում:

Պաշտպանական կողմը նույնպես նշեց, որ չկան հիմքեր գործը հետ ուղարկելու համար:

Դատարանը մերժեց միջնորդությունը՝ նշելով, որ ՀՀ քրեական դատավարության օրենսգրքի 309-րդ պրիմ 1 հոդվածով՝ առաջադրված մեղադրանքը լրացնելու կամ փոփոխելու սահմանները, նախատեսված միջնորդություն անելու լիազորություն ունեն միայն դատարանն ու մեղադրողը:

Միաժամանակ դատարանը նշեց, որ արարքի վերաորակման հարցին դատարանը կանդրադառնա խորհրդակցական սենյակում դատական ակտ կայացնելիս:

Աղբյուր` Փաստինֆո