Փաստ ինֆո

Բելառուսի գերագույն դատարանը մերժել է բլոգեր Ալեքսանդր Լապշինի բողոքը՝ այդպիսով ուժի մեջ թողնելով նրան Ադրբեջանին հանձնելու մասին որոշումը:

«Ինտերֆաքս»-ի փոխանցմամբ, գերագույն դատարանը հիմնավոր է ճանաչել Մինսկի քաղաքային դատարանի՝ հունվարի 26-ի վճիռը, որով օրինական էր համարվել Ալեքսանդր Լապշինին Ադրբեջանին հանձնելու՝ Բելառուսի գլխավոր դատախազության որոշումը:

Գերագույն դատրանը Բելառուսի դատական համակարգի վերջին ատյանն է, որի վճիռներն այլևս չեն կարող բողոքարկվել: «Վճիռը վերջնական է և բողոքարկման ենթակա չէ»,- նշված է Բելառուսի գերագույն դատարանի՝ Լապշինի գործով կայացված որոշման մեջ:

«Գերագույն դատարանի որոշումն ուժի մեջ է մտնում հրապարակման պահից: Վճռի հրապարակումից հետո այն պետք է կյանքի կոչվի ներքին օրգանների կողմից»,- այս մասին ԻՏԱՌ-ՏԱՍՍ-ին ասել է Բելառուսի դատախազության պաշտոնական ներկայացուցիչ Պյոտր Կիսելյովը:

Ալեքսանդր Լապշինի փաստաբան Նատալիա Շեկինան լրագրողներին ասել է, որ բողոքի քննարկումը կես ժամ էլ չի տևել: Նիստը դռնփակ է անցկացվել, որին ներկա չի եղել նաեւ Լապշինը։

Հիշեցնենք, Մինսկի ոստիկանությունը 2016 թվականի դեկտեմբերի 15-ին ձերբակալել է Լապշինին, որը ՌԴ և Իսրայելի քաղաքացի է, բնակվում է Մոսկվայում և գրում է ռուսերեն հեղինակավոր Travel Blog-ի համար: Նա որոնվում է Ադրբեջանում 2011 թվականի ապրիլին, 2012 թվականի հոկտեմբերին և 2016 թվականի հունիսին Լեռնային Ղարաբաղ այցելելու, ինչպես նաև իր բլոգում Ադրբեջանի քաղաքականությունը քննադատելու համար: Ադրբեջանը 2011 թվականին նրան ներառել էր իր կողմից որոնվող անձանց ցուցակում: Պաշտոնական Բաքուն պահանջում է Բելառուսի իշխանություններից Լապշինին արտահանձնել իրենց: Բելառուսի Հանրապետության գլխավոր դատախազի տեղակալը որոշում է կայացրել բավարարել Ադրբեջանի Հանրապետության գլխավոր դատախազության խնդրանքը՝ Ալեքսանդր Լապշինին հանձնելու վերաբերյալ՝ Ադրբեջանի քրեական օրենսգրքի 281.2 և 318.2 հոդվածներով քրեական պատասխանատվության ենթարկելու համար։

Աղբյուր` Փաստինֆո