Փաստ ինֆո

Նուբարաշենի խճուղում 58-ամյա Եղիշե Խաչատրյանի սպանության գործով նախագահող դատավոր Աննա Դանիբեկյանին՝ պաշտպանական կողմի հայտնած ինքնաբացարկի միջնորդությունն այսօր մերժվեց:

Էրեբունի և Նուբարաշեն վարչական շրջանների ընդհանուր իրավասության դատարանում այսօր տեղի ունեցավ  գործով երկրոդ դատական նիստը, որի ժամանակ պաշտպանական կողմը՝ մասնավորապես, ամբաստանյալ Յուրի Հակոբյանի պաշտպան Արմեն Նադիրյանը նախագահող դատավորին ինքնաբացարկի միջնորդություն հայտնեց:

Պաշտպանը գտնում է, որ կան մի քանի հանգամանքները, որոնք  կասկած են հարուցում նախագահող դատավորի անկողմնակալության, այն է՝ Յուրի Հակոբյանի նկատմամբ կանխակալ վերաբերմունք ունենալու մեջ: Ըստ Ա.Նադիրյանի,  Քրեական դատավարության համապատասխան նորմի համաձայն՝ դատարանը գործը վարույթ ընդունելուց հետո պարտավոր է գործով բոլոր կողմերին տեղյակ պահել այդ մասին ՝ նրանց ուղարկելով հուշաթերթիկ, հասցեատիրոջ իրավունքների և պարտականությունների վերաբերյալ, ներառյալ միջնորդությունների, դիմում բողոքների դատարան ուղարկելու կարգի և ժամկետների մասին: Մինչդեռ,  տվյալ դեպքում դատարանի կողմից օրենքի իմպերատիվ պահանջը չի պահպանվել և ո՛չ պաշտպանթ  և ո՛չ էլ մեղադրյալը չեն տեղեկացվել:

Պարզվում է, փաստաբանը հունվարի 11-ին Դատալեքս տեղեկատվական համակարգից է  տեղեկացել,  որ գործը նշված դատավորի վարույթ է ընդունվել եւ սա այն  դեպքում, երբ գործը վարույթ է ընդունելու մասին կայացվել է  2016թ. դեկտեմբերի 26-ին:

Բացի այդ՝ պաշտպանը 2017թ հունվարի 11-ին միջնորդություն է ներկայացրել դատարանին իր պաշտպանյալին առաջադրված մեղադրանքում քերական հետապնդումը դադարեցնելու մասին՝ նրա արարքում հանցակազմի բացակայության հիմքով, իսկ այդ պահանջը մերժելու դեպքում՝ փոխել  նրա խափանման միջոցը՝ կալանավորումը փոփոխել չհեռանալու մասին ստորագրությամբ  կամ գրավ կիրառել:

Նշված միջնորդությունը դատարան մուտքագրվելուց օրեր անց միայն փաստաբանը տեղեկացել է, որ գործը ընդունվել Ա. Դանիբեկյանի վարույթ, իսկ պաշտպանի միջնորդությունը քննության չի առնվել:

Դատարանին ինքնաբացարկ հայտնելու Արմեն Նադիրյանի միջնորդությանը միացան նաև մյուս ամբաստանյալների պաշտպանները:

Ամբաստանյալ Արտաշես Չիչոյանի պաշտպան Երեմ Սարգսյանը ևս նշեց, որ ինքը ընդհանրապես չի ծանուցվել, մյուս փաստաբանը՝  Խաչիկ Կոսյանի պաշտպան Վաչագան Քոսյանը պարզվեց ծանուցագիրը ստացել է նիստը նշանակված օրվանից 2 օր անց։

Միևնույն ժամանակ պաշտպան Վաչագան Քոսյանը նշեց նաև, որ գործով նախաքննության ընթացքում իր պաշտպանյալի նկատմամբ խափանման միջոց ընտրելու վերաբերյալ քննարկումից հետո դատարանը՝ նախագահող Դանիբեկյանը, խորհրդակցական սենյակ չի գնացել ՝ չնայած նրան, որ հայտարարել է խորհրդակցական սենյակ հեռանալու մասին, և ընդամենը 23 վայրկյան անց որոշում է հրապարակել  կալանավորելու վերաբերյալ:

Դատարանի կողմից նման վերաբերմունքի արժանացել էին նաև մյուս փաստաբանները՝ Լիպարիտ Սիմոնյանը և Արշակ Թովմասյանը, ինչի մասին  նրանք ևս բարձրաձայնեցին:

Միջնորդությանն առարկեցին մեղադրանքը պաշտպանաող   դատախազներ Ռաֆայել Երիցյանը և Վարդգես Սարգսյանը:

Մեղադրող Վարդգես Սարգսյանը անդրադառնալով Վ.Քոսյանի  այն հայտարարությանը, որ դատարանն իր պաշտպանյալի  կալանավորման որոշումը հրապարակել է առանց խորհրդակցական սենյակ հեռանալու՝  նշեց, որ ՀՀ քրեական դատավարության օրենսգիրքն ունի այն որոշումների ցանկը, որոնք ընդունվում են խորհրդակցական սենյակում, իսկ կալանավորումը որպես խափանման միջոց կիրառելու մասին որոշումը խորհրդակցական սենյակում պարտադիր ընդունման ենթակա որում չէ:

Պաշտպանների կողմից դատարանին հայտնած ինքնաբացարկի մյուս հիմքերը, ըստ մեղադրողի՝ տեխնիկական բնույթ էին կրում եւ  ներկայացված  միջնորդությամբ որևէ փաստ չի վկայել դատարանի կողմից կողմնակալ վերաբերմունքի մասին, ուստիև խնդրեց միջնորդությունը մերժել:

Տուժող կողմը ևս առարկեց՝ Փառանձեմ Մեյթիխանյանը միացավ փաստաբանների դիրքորոշմանը միայն այն մասով, որ դատարանի ծանուցումները ոչ պատշաճ են եղել. նա ևս ծանուցագիրը ուշացումով է ստացել, սակայն դատալեքսի միջոցով տեղեկացել և ներկայացել է:

Տուժողի իրավահաջորդի ներկայացուցիչ Ինեսսա Պետրոսյանը ևս առարկությամբ հանդես եկավ՝ հայտարարելով, որ բարձր տեխնոլոգիաների դարում ենք ապրում բոլորս էլ կարողանում ենք օգտվել դատալեքսից: Նա նաև կարծիք հայտնեց, որ պաշտպանական կողմը՝ փաստաբանները, նախորդ նիստին չէին ներկայացել ծանրաբեռնվածության պատճառով:

Գործով տուժող Սանասար Բադալյանն էլ հայտարարեց, որ  իրեն տուժող չի համարում եւ այդ հարցի վերաբերյալ դիրքորոշում չունի:

Դատարանը, վերադառնալով խորհրդակցական սենյակից,  մերժեց ինքնաբացարկի միջնորդությունը:

Հաջորդիվ բացարկ հայտնվեց  մեղադրող Վարդգես Սարգսյանին, որը կքննարկվի հաջորդ դատական նիստին։

Աղբյուր` Փաստինֆո