Փաստ ինֆո

Պետական գնումների համակարգում երկկողմանի ռիսկերը կախված են նրանից, թե որքան ժամանակահատվածի համար են կնքվում պայմանագրերը: «Արմենպրես»-ի հաղորդմամբ` այս մասին լրագրողների հետ հանդիպման ժամանակ նշեց ՀՀ ֆինանսների նախարար Վարդան Արամյանը:

Նա երկկողմանի ռիսկերի տեսանկյունից օրինակ բերեց բենզինի գնումները` նկատի ունենալով դրանց շուկայական գների տատանումները, ինչպես նաև արտարժույթների փոփոխությունները:

Նրա խոսքով` բենզինի շուկայի մասնակիցների հետ կնքվում են շրջանակային համաձայնագրեր («Գնումների մասին» ՀՀ օրենքի համաձայն՝ շրջանակային համաձայնագիր կնքվում է, եթե գնման առարկան ունի պարբերական օգտագործման բնույթ, շրջանակային համաձայնագիրը` «պայմանագիր կնքելու նպատակով կնքվող նախնական պայմանագիրն է»), որոնք հետագայում կկիրառվեն նաև էլեկտրոնային աճուրդների կամ գնանշման հարցումների մրցույթների միջոցով:

«Եթե որևէ պետական մարմին ունենում է բենզինի պահանջարկ երեք ամիսների համար, ապա մասնակից ընկերություններին հարցում է ուղարկում, որից հետո նրանք ներկայացնում են գինը և մրցույթով տեղի է ունենում գնումը: Եթե մեկ տարվա պայմանագիր կնքեն, ապա արտաքին գործոնների փոփոխություններից տնտեսավարողը կարող է շահել կամ տուժել: Դրա համար խելամիտ է, որպեսզի շրջանակային համաձայնագրեր կնքվեն»,- ասաց նախարարը:

Աղբյուր` Փաստինֆո