Փաստ ինֆո

Գյումրի կատարած աշխատանքային այցի ընթացքում ՀՀ վարչապետ Կարեն Կարապետյանի պատասխանը լրագրողի հարցին, որում գործադիրի ղեկավարը կոչ էր արել «դիլխոր չլինել», պետք չէ meկնաբանել այլ լույսի ներքո:

Փետրվարի 6-ին լրագրողների հետ հանդիպմանը նման կարծիք հայտնեց ՀՀ ֆինանսների նախարար Վարդան Արամյանը՝ պատասխանելով հարցին, թե նա տխուր չէ՞ր լինի, եթե տարիներ շարունակ ապրեր տնակներում` ծանր սոցիալական պայմաններում: Նրա խոսքով` տնտեսագիտության մեջ կա շատ հանրահայտ թեզ, որը կոչվում է «սպասումներ»:

«Մարդկանց վարքագիծը և տնտեսական արդյունքները՝ կախված այդ սպասումներից, բոլորովին տարբեր բաներ են, եթե նա ունի բացասական, կամ դրական սպասումներ: Վարչապետի հորդորը շատ պարզ էր. եթե մենք բոլորս անընդհատ չհավատանք մեր գաղափարներին, եթե մենք բոլորս անընդհատ մտածենք, որ վաղը շատ ավելի վատ է լինելու, նշանակում է՝ որքան էլ լավ ծրագիր նախագծենք, մեծ է հավանականությունը, որ դատապարտած ենք լինելու ձախողման, քանի որ համատարած տիրում է բացասական տրամադրվածություն»,- «Արմենպրես»-ի փոխանցմամբ՝ ասաց Վարդան Արամյանը` հավելելով, որ վարչապետի պատասխանը շատ հստակ էր. կարելի է մտածել ապագայի մասին՝ ավելի լավատեսական սպասումներ ունենալով:

Նա հիշեցրեց, որ վարչապետն ինքն է առաջինը խոսել տնտեսության ծանր վիճակի մասին:

«Շատ լավ հասկանում ենք, որ սոցիալական իրավիճակը ոչ բարվոք է: 2017 թվականը կայունացման տարի է, բայց 3.2 տոկոս տնտեսական աճը մեր հավակնությունը չէ, մեր հավակնություններն ավելի բարձր են: Որպեսզի մեր ազգաբնակչությունը տնակներում չապրի, մեր գործողություններով պետք է հասնենք բարձր տնտեսական աճի:

Տարօրինակ է, որ վարչապետի ասածի մեջ նման ընկալում կա: Վարչապետը նույնիսկ իր ընտանիքի կողմից 500 հազար դոլար է տրամադրել: Սա նշանակում է, որ ինքը պատրաստ է նման խնդիրներին լուծում տալ»,- ընդգծեց նախարարը:

Հարցին, թե քաղաքացիներին 25 տարի է` կոչ են անում սպասել և բացասական տրամադրություններն առաջանում են նորից սպասման կոչեր լսելուց հետո, Արամյանը պատասխանեց, որ ինքը երբեք չի ասում, թե 25 տարի սպասելը նորմալ է, բայց մյուս կողմից օբյեկտիվ հնարավորությունների հետ պետք է հաշվի նստել:

«Մենք մեկ շնչին 3500 դոլար ՀՆԱ ունեցող երկիր ենք: Պետք է ադեկվատ մոտենալ, թե ինչպիսին են մեր հնարավորությունները և ինչպիսն են մեր պահանջները` խնդիրները լուծելու վերաբերյալ», -հավելեց նախարարը:

Լուսանկարը՝ Armenpress-ի

Աղբյուր` Փաստինֆո