Փաստ ինֆո

Մաքսային-սահմանային ամերիկյան ծառայությունն ավիաընկերություններին հայտնել է գերակշռող մուսուլմանական բնակչությամբ յոթ երկրների քաղաքացիներին դեպի ԱՄՆ չվերթերին թույլ տալու հնարավորության մասին: Նրանց մուտքն երկրի տարածք ավելի վաղ արգելվել էր երկրի նախագահ Դոնալդ Թրամփի հրամանագրի հիման վրա:

Ի պատասխան՝ Qatar Airways ավիաընկերությունում հայտարարել են, որ անհապաղ սկսում են թույլ տալ ուղևորների մուտքն ինքնաթիռ: Air France ընկերությունը նույնպես հայտարարել է, որ մտադիր է վերսկսել հրամանագրի ազդեցության ներքո հայտնված քաղաքացիների փոխադրումները:

Մաքսային ծառայության որոշման համաձայն՝ յոթ մուսուլմանական երկրների քաղաքացիները, որոնց մասին խոսք էր գնում նախագահական կարգադրության մեջ, կկարողանան հատել ԱՄՆ սահմանը իրենց մոտ առկա փաստաթղթերի համապատասխան (գործող մուտքի արտոնագրեր կամ գրին քարտեր):

Ինչպես հաղորդում է BBC-ի ռուսական ծառայությունը, մաքսային ծառայության որոշման մասին հայտնի է դարձել միայն մի քանի ժամ անց այն բանից հետո, որ Սիեթլի դաշնային դատարանը (Վաշինգտոնի նահանգ) կանգնեցրել է Թրամփի միգրացիոն հրամանագրի գործողությունը:

Ավելի ուշ Սպիտակ տանը հայտնել են այդ որոշումը վիճարկելու արդարադատության նախարարության մտադրության մասին: Գերատեսչությունում Թրամփի միգրացիոն հրամանագիրը անվանել են իրավաչափ և նպատակահարմար:

Հրամանագրի ընդունման պահից սկսած չեղյալ են համարվել մոտ 100 հազար արդեն տրված ամերիկյան վիզաները:

Միգրացիոն հրամանագիրը ԱՄՆ նախագահը ստորագրել էր հունվարի 27-ին: Ըստ դրա, Սուդանի, Եմենի, Լիբիայի, Սոմալիի, Իրաքի, Իրանի և Սիրիայի քաղաքացիների համար մտցվել է ԱՄՆ մուտքի 90-օրյա արգելք: Անորոշ ժամանակով կանգնեցվել է նաև սիրիացի փախստականների ընդունումը:

Այլ երկրներից փախստականների ընդունումը սառեցվել է 120 օրով:

Հրամանագրի ուժի մեջ մտնելը քաոս էր առաջացրել ԱՄՆ միջազգային օդանավակայաններում, քանի որ գործող վիզաներով արդեն երկիր ժամանած մարդկանց մերժում էին սահմանը հատել:

Աղբյուր` Փաստինֆո