Փաստ ինֆո

Հայաստանում վերջին 10 տարում քաղցկեղից հիվանդացության ցուցանիշն աճել է 1.8, մահացության ցուցանիշը` 1.9 տոկոսով: Առողջապահության նախարարության բժշկական օգնության քաղաքականության վարչության ղեկավար Ծաղիկ Վարդանյանը Քաղցկեղի դեմ պայքարի միջազգային օրվա առթիվ հրավիրված ասուլիսում նշեց, որ արական սեռի մոտ առավել հաճախ գրանցվում են թոքի, շնչափողի, կոկորդի, ստամոքսաղիքային տրակտի, շագանակագեղձի ուռուցքներ, իսկ կանանց մոտ գերակշռում է կրծքագեղձի, արգանդի, արգանդի պարանոցի եւ ստամոքսաղիքային տրակտի ուռուցքը:

«Առողջապահության համաշխարհային կազմակերպությունը փաստում է, որ եթե մենք ճիշտ ժամանակին համապատասխան ձեւով կարողանանք կանխարգելել այն ռիսկի գործոնները, որոնք առաջացնում կամ նպաստում են չարորակ նորագոյացությունների առաջացմանը, ապա հնարավոր կլինի 30 տոկոսով կանխարգելել հիվանդացությունը»,-«Արմենպրես»-ի հաղորդմամբ, ասաց նա:

Ծաղիկ Վարդանյանի խոսքով` 2015 թվականից սկսած առողջապահության նախարարությունն իրականացնում է ոչ վարակիչ, առավել տարածված երեք հիվանդությունների գծով սկրինինգային ծրագիր, որի մեկ կոմպոնենտը վերաբերում է արգանդի վզիկի քաղցկեղին:

«Այդ սկրինինգների նպատակը հիվանդությունների վաղ հայտնաբերումն ու կանխարգելումն է»,-ասաց բանախոսը:

Խոսելով ոլորտի խնդիրներից՝ նա հիմնականում առանձնացրեց ապրելիության ցուցանիշը՝ նշելով, որ հետազոտվողների 57 տոկոսի դեպքում ախտորոշվում է հիվանդության երրորդ կամ չորրորդ ստադիա:

«Այս փուլերում կանխարգելման մասին խոսք անգամ լինել չի կարող: Դա իրենից ենթադրում է ֆինանսապես ծանր բուժում»,- հավելեց Ծաղիկ Վարդանյանը:

Լուսանկարը՝ Armenpress-ի

Աղբյուր` Փաստինֆո