Փաստ ինֆո

Երթուղայիններում անմարդկային պայմաններում, կանգնած երթևելու խնդրին ուշադրություն հրավիրելով՝ փաստաբան Տիգրան Սարգսյանը բաց նամակով դիմել է Երևանի քաղաքապետին և երևանցիներին:

Ստորև ներկայացնում ենք բաց նամակն ամբողջությամբ.

Հարգելի՜ քաղաքապետ, հայ մարդուն, երևանցուն չի սազում տրանսպորտում կռացած, անմարդկային ու նսեմացուցիչ պայմաններում երթևեկելը: Երևանցին քաղաքապետ է ընտրել, որ քաղաքապետը մրցույթային կարգով երթուղիները տրամադրի այն ընկերություններին, որոնք բավարար ռեսուրս ունեն երևանցիներին արժանապատիվ ծառայություն մատուցելու համար:
Հարգելի քաղաքապետ, երևանցին քաղաքապետ է ընտրել, որ նա թույլ չտա երթուղիները շահագործող ընկերություններին խախտել օրենսդրությունը, լիցենզիայի պայմանները և վիրավորական պայմաններում <<ծառայություն>> մատուցել:

Պարոն քաղաքապետ, խնդրում և պահանջում եմ ոլորտում պատշաճ վերահսկողություն իրականացնել:

Հարգելի՜ երևանցիներ, այն պայմանները, որով մենք օգտվում ենք երթուղային տրանսպորտից, վայել չեն մեզ: Որևէ մեկը իրավունք չունի նման ծաղրի ենթարկել մեզ: Արժանապատիվ քաղաքացին պիտի ցույց տա իր ուժը: Եթե կանգնած երթևեկող ուղևորը չվճարի, երթուղին սպասարկող ընկերությունը ստիպված, այդ գումարները չկորցնելու համար, երթուղի կմտցնի լրացուցիչ տրանսպորտ:

Այժմ երթուղին սպասարկող ընկերությունը մեկ մեքենայով երկու մեքենայի, երբեմն երեք մեքենայի համար նախատեսված ուղևոր է տեղափոխում, դրանով իր համար ապահովելով անտրամաբանական գերշահույթ: Ահա ապօրինի հարստացման ևս մեկ օրինակ:

ՀՀ օրենսդրության համաձայն՝ իրավունք ունենք չվճարել ոչ պատշաճ ծառայության դիմաց: Այն ինչ տեսնում ենք, մեղմ ասած, ոչ պատշաճ ծառայություն է: Սա վիրավորական վերաբերմունք է մեր հանդեպ:

Առաջարկում եմ՝ ինքնակազմակերպվել և չվճարել անմարդկային պայմաններում մեզ տեղափոխող վարորդներին:

Ի դեպ, վարորդների շահերը նույնպես պետք է պաշտպանել: Նրանք օրեկան մոտ 30 000 ՀՀ դրամ պլան են վճարում և աշխատում ծանր պայմաններում՝ վտանգելով նաև ուղևորների կյանքը:

Լուսանկարը՝ Հ3-ի

Աղբյուր` Փաստինֆո