Փաստ ինֆո

Գիտնականները բացահայտել են ամեն ամառ հնդկական Մուզաֆֆարփուր քաղաքում հարյուրավոր մանկական մահերի գաղտնիքը:

Պարզվում է, որ խնդիրը լիչի միրգն է, որի պտուղների հասունացումը հենց համընկնում է մանկական կյանքեր խլող հիվանդության սկզբնավորման հետ: Այն սովորաբար սկսվում է այն երեխաների մոտ, ովքեր ուտում են լիչին քաղցած ստամոքսով: Դեպքը նկարագրվել է Lancet ամսագրում:

1995թ.-ից հաղորդումներ հայտնվեցին այն մասին, որ Մուզաֆֆարփուրում երեխաները հանկարծակի հիվանդանում են և տառապում ուշագնացություններից, սովորաբար առավոտյան: Հաճախ նրանք կոմայի մեջ են ընկնում, որից հիվանդացածների 40%-ն այլևս դուրս չի գալիս ու մահանում է: Համաճարակը սկսվում է մայիսի կեսերին և ավարտվում հուլիսի վերջին:

400 հիվանդ և 100 առողջ երեխաների հետազոտությունը չի վեր հանել վարակի հետքեր կամ արյան մեջ պեստիցիդներ և ողնուղեղային հեղուկ: Սակայն հիվանդ երեխաների շրջանում գրեթե 10-ն անգամ ավելին էին նրանք, ովքեր մինչև հիվանդանալը վերջին 24 ժամվա ընթացքում կերել էին լիչի: Մեզի անալիզը օրգանիզմում վեր էր հանել երկու տոքսին՝ հիպոգլիցին և մեթիլենցիկլոպրոպիլի գլիցին, որոնք հաճախ առկա են չհասունացած մրգերում: Բացի այդ պարզվել է, որ քաղցած ստամոքսով լիչի ուտելը կրկնակի ավելացնում է հիվանդանալու շանսերը:

Երբ երեխաները բաց էին թողնում սննդի ընդունումը, նրանց մոտ արյան մեջ իջնում էր շաքարի մակարդակը: Այդ պահերին օրգանիզմը պետք է ստանա գլյուկոզա յուղաթթուներից, սակայն լիչիի տոքսինները շրջափակում էին այդ պրոցեսը, ինչի պատճառով շաքարն արյան մեջ իջնում էր կյանքի համար վտանգավոր մակարդակի: Սակայն եթե նրանք մինչ լիչի ուտելն ընթրում էին, հիվանդանալու շանսերը մեծապես նվազում էին:

Աղբյուր` Փաստինֆո