Փաստ ինֆո

Անցյալ տարվա հոկտեմբերից Արմավիրի մարզի առաջին ատյանի դատարանի վարույթում է «Մուսալեռ» հյուրանոցառեստորանային համալիրում երիտասարդի կյանք արժեցած կրակոցների գործը (առաջին դատական նիստը նշանակվել է հոկտմբերի 31-ին), սակայն մինչ օրս ըստ էության դատական նիստ տեղի չի ունեցել: Այս մասին «Փաստինֆո»-ի լրագրողին հայտնեց տուժող Արամ Կարապետյանի իրավահաջորդի ներկայացուցիչ, փաստաբան Արմեն Սողոմոնյանը՝ հավելելով, որ նույնիսկ նախապատրաստական դատական նիստ չի կայացել՝ պաշտպանական կողմի պատճառով:

Մասնավորապես, առաջին-երկրորդ նիստերին ամբաստանյալները չեն ներկայացել, ապա չեն ներկայացել նաև նրանց պաշտպանները, ովքեր լավագույն դեպքում հեռախոսազանգով հայտնել են՝ ճանապարհն է սառած, այլ նիստերով ծանրաբեռնված ենք և այլն, կամ էլ ընդհանրապես որևէ կերպ չեն կապվել դատարանի հետ ու պատճառաբանություն էլ չեն ներկայացրել:

Արմեն Սողոմոնյանը նշեց, որ գործով նախագահող դատավոր Արթուր Ադամյանի կողմից ըստ էության որևիցե միջոց չի ձեռնարկվել նրանց կարգի հրավիրելու ու դատական նիստերին նրանց մասնակցությունն ապահովելու համար:

Փաստաբանը համեմատության համար նշեց, որ իր նկատմամբ դատավոր Նարինե Հովակիմյանի դիմումի հիման վրա կարգապահական վարույթ է հարուցվել Լոռու մարզում քննվող գործի մեկ-երկու նիստին չմասնակցելու համար այն դեպքում, որ ինքը ծանուցումը ստացել է երեք օր ուշացումով: Մինչդեռ տվյալ գործով պաշտպանները վաղօրոք պատշաճ ծանուցված լինելով չեն ներկայանում, և դատարանը դրան որևէ կերպ չի արձագանքում:

«Մուսալեռ» ռեստորանում տեղի ունեցած միջադեպի մասնակիցներից ևս մեկը կալանավորվեց

«Գտնում եմ, որ միանշանակ միտում կա ձգձգելու դատավարությունը: Նրանք հույսեր ունեն, որ համաներում է լինելու, և ոչ թե դատավճռով, այլ մինչև դատավճիռը համաներում է կիրառվելու: Համենայն դեպս, խուլիգանության հոդվածով առաջադրված մեղադրանքների վերաբերյալ գործով հույսեր ունեն, որ այն կկարճվի»,- ասաց տուժողի իրավահաջորդի ներկայացուցիչը:

Դեպքը տեղի է ունեցել 2016թ. հունվարի լույս 6-ի գիշերը՝ Տարոնիկի գյուղապետ Արմեն Խլղաթյանն, ով նաև տուժող Արամ Կարապետյանի ազգականն է, զանգահարել է նրան ու խնդրել, որ օգնի «Մուսալեռ»-ում որոշ խուլիգանական գործողություններ կատարող անձանց հանդարտեցնել: Համալիր հասնելուց հետո երեքից հինգ րոպե անց՝ մինչ Արամը բարձրանում է երկրորդ հարկ, որտեղ բուն վեճն էր տեղի ունենում, հնչում է երեք կրակոց, որից առաջինն՝ օդ, իսկ երկրորդը խոցում է Արամին՝ միջանցքում, փաստացի խուլիգանության դեպքի վայր չհասած, այնտեղից մինչև վիճաբանողները հինգ-վեց մետր հեռավորության վրա, այսինքն՝ տուժողի և նրանց միջև կոնտակն անհնարին է եղել: Ապա հնչել է ևս երկու կրակոց՝ մեկը ներսում, մյուսը՝ դրսում:

Բոլոր կրակոցներն, ըստ տուժողի իրավահաջորդի ներկայացուցչի, արձակվել են Արթուր Բաբայանի կողմից, ով մեղադրվում է 21-ամյա երիտասարդի սպանության մեջ, նրա և ՀՀ քրեական օրենսգրքի 258-րդ հոդվածի 4-րդ մասով՝ խուլիգանություն, որը կատարվել է որպես զենք օգտագործվող առարկաների գործադրմամբ, մեղադրվող նրա ընկերոջ նկատմամբ հայտարարվել է հետախուզում, նրանց մասով գործից մաս է անջատված:

Արմեն Սողոմոնյանը նշեց, որ մեկ տարուց ավելի է, ինչ հիշյալ երկու անձանց նկատմամբ հետախուզում է հայտարարված, սակայն թե՛ քննչական մարմնի, և թե՛ դատախազության կողմից ըստ էության միջոցներ չեն ձեռնարկվում սպանության մեջ մեղադրվողին հայտնաբերելու համար: «Ձևական արձանագրություններ են ուղարկվում՝ ակտիվացրեք օպերատիվ-հետախուզական միջոցառումները, սակայն ես առավել քան վստահ եմ, որ ոչ թե միջազգային հետախուզում է իրականացվում՝ գոնե ԱՊՀ տարածքում, այլ ընդամենը ՀՀ-ում: Դա ծիծաղելի է, բնականաբար նա առաջին օրվանից ևեթ չէր մնա Հայաստանում»,- ասաց Ա.Սողոմոնյանը:

Անջատված մասով ևս երկու հոգի կա՝ խուլիգանության դրվագով, սակայն պարզ չէ, թե նրանց արարքը կոնկրետ ինչպես է որակված, նրանց կարգավիճակը նույնպես պարզ չէ, հայտնի է, որ նրանք երկուսն էլ հանրապետությունից բացակայում են:

Ավելի զավեշտալին են ևս երկու անձի վերաբերյալ դատարան հասած գործով զարգացումները: Սկզբնապես նրանց մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով, սակայն հենց որ նրանց կալանքի տակ գտնվելու վեց ամիսը պետք է լրանար, մեղադրանքը սահուն կերպով մեղմացվել է՝ ամբաստանյալ Արմեն Պառավյանի մեղադրանքը փոխվել է խուլիգանության հոդվածի 3-րդ մասի 1-ին կետի՝ մի խումբ անձանց կամ կազմակերպված խմբի կողմից կատարված խուլիգանություն, իսկ ամբաստանյալ Խորեն Խաչիկյանի դեպքում՝ նույն հոդվածի ամենաթեթև՝ 1-ին մասի:

Եվ քանի որ միջին ծանրության հանցագործություն կատարելու մեջ մեղադրվող անձը չի կարող վեց ամսից ավելի գտնվել կալանքի տակ, հետևաբար նրանք ազատ են արձակվել կալանքից:

Մեղադրանքը մեղմացվել է այն դեպքում, որ բազմաթիվ վկաների ցուցմունքներ կան առ այն, որ նրանց ձեռքում եղել են փայլուն առարկաներ, որոնցով հարվածներ են հասցրել: Բայց այդ ամենով հանդերձ՝ վարույթն իրականացնող մարմինը վերաորակել է մեղադրանքը՝ մեղմացնելով այն:

Արմեն Սողոմոնյանն ընդգծեց, որ մեղադրանքի փոփոխությունն առանց հիմքի՝ բոլորը մի տեղում նույն արարքն են կատարել, ինչ-որ կախարդական փայտիկի օգնությամբ է կատարվել և բացարձակապես հավատ չի ներշնչում: Ըստ նրա, հավատ չի ներշնչում նաև այն, որ Արմեն Պառավյանը մահակ է ներկայացրել վարույթն իրականացնող մարմնին՝ հայտարարելով, որ մյուս կողմի ձեռքից է վերցրել: Մի դեպքում նա ասում է, որ գետնին ընկած եմ եղել, չեմ տեսել Արթուրը ոնց է կրակել, բայց հստակ ցուցմունք է տալիս, այս մահակն այսինչի ձեռքում էր:

Արմեն Սողոմոնյանն ընդգծեց, որ տուժողի հարազատների ուզածը մեկն է, որպեսզի բոլորը ստանան պատիժ՝ օրենքի տառին համապատասխան: «Կորուստն անդառնալի է, երեխա են կորցրել, պարկեշտ, համեստ մարդիկ են, մինչև օրս նրանց ձայնը դուրս չի եկել»,- ասաց տուժողի իրավահաջորդի ներկայացուցիչը՝ նշելով, որ տուժողն ընդամենը 21 տարեկան էր, դպրոցն ավարտելուց հետո զորակոչվել էր բանակ, ծառայել, ապա վերադարձել, միանգամից անցել աշխատանքի գազալցակայանում, նպատակ ուներ ամուսնանալ ու ընտանիք կազմել: «Ծաղկած ծառ էր, միանգամից չորացրեցին»,- ասաց Արմեն Սողոմոնյանը:

Դատարանում երկու հոգու մասով գտնվող գործով Արմեն Պառավյանին առաջադրված մեղադրանքի համաձայն, նա 2016թ. հունվարի 6-ին ժամը 00:20-ի սահմաններում Արմավիրի մարզի Մուսալեռ գյուղի տարածքում գործող «Մուսալեռ» հյուրանոցառեստորանային համալիրում Արթուր Բաբայանի և Սարգիս Թովմասյանի հետ, խմբի կազմում, համալիրի աշխատակիցների հասցեին տվել է սեռական բնույթի հայհոյանքներ, դիտավորությամբ կոպիտ կերպով խախտել է հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունքով և զուգորդվել համալիրի աշխատակիցներ Վանուշ Խաչատրյանի և Սմբատ Խլղաթյանի, ինչպես նաև վերջինիս կանչով այնտեղ եկած Արմավիրի մարզի Տարոնիկ գյուղի բնակիչներ Արամ Կարապետյանի ու Արմեն Խլղաթյանի նկատմամբ բռնություն գործադրելով:

Իսկ ըստ Խորեն Խաչիկյանին առաջադրված մեղադրանքի, նա 2016թ. հունվարի 6-ին ժամը 00:20-ի սահմաններում Արմավիրի մարզի Մուսալեռ գյուղի տարածքում գործող «Մուսալեռ» հյուրանոցառեստորանային համալիրում Համալիրի աշխատակիցներ Սմբատ Խլղաթյանի և Վանուշ Խաչատրյանի հասցեին տվել է սեռական բնույթի հայհոյանքներ, դիտավորությամբ կոպիտ կերպով խախտել է հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունքով և զուգորդվել համալիրի աշխատակիցներ Վանուշ Խաչատրյանի և Սմբատ Խլղաթյանի, ինչպես նաև վերջինիս կանչով այնտեղ եկած Արմավիրի մարզի Տարոնիկ գյուղի բնակիչներ Արամ Կարապետյանի ու Արմեն Խլղաթյանի նկատմամբ բռնություն գործադրելով:

Լուսանկարում տուժող Արամ Կարապետյանն է

Աղբյուր` Փաստինֆո