Փաստ ինֆո

ՀՀ կառավարությանն առընթեր պետական գույքի կառավարման վարչությունը ՀՀ վարչապետ Կարեն Կարապետյանի հանձնարարությամբ Հայաստանի կառավարությանն առաջարկում է առաջիկայում մասնավորեցնել հիմնականում սոցիալական ոլորտում գործող պետական 47 կազմակերպություններ: 

Վարչությունն արդեն կառավարության քննարկմանն է ներկայացրել «Պետական գույքի մասնավորեցման 2017-2020թթ.» նոր ծրագրի նախագիծը: «Արմենպրես»-ի հետ զրույցում ՀՀ կառավարությանն առընթեր պետական գույքի կառավարման վարչության պետի տեղակալ Աշոտ Մարկոսյանը նշեց, որ նոր ծրագրում ընդգրկված են նաև այն կազմակերպությունները, որոնք հանվել են մասնավորեցման, սակայն մինչ օրս դեռ չեն մասնավորեցվել: «Վարչապետի հանձնարարականի հիման վրա մենք կազմակերպել ենք շահագրգիռ և արդյունավետ քննարկումներ, որոնց արդյունքում գտել ենք այն պետական կազմակերպությունները, որոնք ավելի ճիշտ կլինի տանել մասնավորեցման ճանապարհով: Այժմ արդեն նախագիծը պատրաստ է, այն ներկայացրել ենք կառավար ությանը և գտնվում է համաձայնեցման փուլում: Հենց կառավարությունը նախագծին հավանություն տվեց, այն կդառնա հանրության լայն շրջանակների քննարկման առարկա»,- ասաց Մարկոսյանը: 

Նա մանրամասնեց, որ այդ կազմակերպությունները մասնավորեցնելու հիմնական և առաջնային նպատակը պետական բյուջեի ծախսերը թեթևացնելն է: «Դրանք պետական բյուջեից սնվող կազմակերպություններ են և մեր նպատակն է բարձրացնել դրանց աշխատանքի արդյունավետությունը: Մենք պետք է ընդունենք, որ այդ կառույցներն արդյունավետ չեն գործում: Մենք 70 տարի ապրել ենք մի երկրում, որտեղ ամեն ինչ եղել է պետական: Մեր գիտակցության մեջ պետական մասն ամուր է նստած և շատ դժվար է վերանում: Այդ կազմակերպությունները կարիք ունեն ներդրումների: 

Մասնավորեցման նպատակներից մեկը նա և ներդրումներ բերելն է: Բոլորիս համար գաղտնիք չէ, որ մենք ունենք ռիսկային միջավայր, միջավայր, որտեղ ներդրումները մեծ չափով չեն գալիս: Եթե դուք ուսումնասիրեք Հայաստանի ներդրումային շուկան, կտեսնեք, որ ներդրումները շատ են եղել, երբ մենք շատ ձեռնարկություններ ենք մասնավորեցրել: Սրանով մենք աշխարհի ցանկացած ներդրողի ցույց ենք տալիս ոլորտը, որտեղ կարելի է ներդրում կատարել»,- բացատրեց Մարկոսյանը: Չնշելով կազմակերպությունների անվանումները, պաշտոնյան, այնուամենայնիվ տեղեկացրեց, որ դրանց թվում շատ են առողջապահական հաստատությունները: 

Նրա խոսքով` մասնավորեցման ծրագրում ընդգրկված են այն կազմակերպությունները, որտեղ բավականին ցածր է մասնավորի բաժինը: Այսինքն, այստեղ մեծ է պետական բաժնեմասի կշիռը: «Եթե մենք ցանկանում ենք փոփոխություններ անել, պետք է գնանք ներդրումներ ներգրավելու ճանապարհով, որի հիմնական ձևը մասնավորեցումն է: Մենք մասնավորեցման արդյունքում իրատեսական արդյունքներ կունենանք: Եթե մենք տեսնում ենք, որ որևէ կազմակերպություն երեք տարի շարունակ աշխատում է միայն վնասով և որևէ օգուտ չի ունենում, այդ դեպքում պետք է իր սեփականության ձևը փոխվի` ընդհուպ մինչև այդ կազմակերպության լուծարում»,- ասաց Աշոտ Մարկոսյանը` չբացառելով, որ այն կազմակերպությունները, որոնք չհաջողվի մասնավորեցնել, կլուծարվեն: 

Միևնույն ժամանակ, Մարկոսյանը հստակեցրեց, որ 5 տարի առաջ հանվել է այն սահմանափակումը, որ գույքը երեք անգամ մասնավորեցման դնելուց հետո լուծարել, եթե արդյունքում չի հաջողվել այն մասնավորեցնել: Այսինքն, որևէ սահմանափակում չկա և գույքը կարելի է դնել մասնավորեցման որքան նպատակահարմար կլինի: 

Վարչապետ Կարեն Կարապետյանի հանձնարարականի հիման վրա բոլոր գերատեսչությունների հետ համատեղ ՀՀ ԿԱ պետգույքի կառավարման վարչությունում մշակվել է մասնավորեցման նոր ծրագիր, որն արդեն ուղարկվել է կառավարություն և վերջնական քննարկումից հետո կներկայացվի Ազգային ժողով:

Աղբյուր` Փաստինֆո