Փաստ ինֆո

ՀՀ վարչական դատարանը՝ դատավոր Հասմիկ Հովհաննիսյանի նախագահությամբ, վերադարձրել է ընդդեմ Սյունիքի մարզպետի Կապանի բժշկական կենտրոնի նախկին տնօրեն Սմբատ Օրբելյանի հայցադիմումը՝ իրեն պաշտոնից ազատելու մասին 17.01.2017թ-ի թիվ 5-Ա կարգադրությունը վերացնելու պահանջով:

Հիշեցնենք, որ Սյունիքի մարզպետի կողմից Ս.Օրբելյանին Կապանի բժշկական կենտրոնի տնօրենի պաշտոնից ազատելու մասին հայտնի դարձավ վերջերս, երբ կենտրոնում գրանցվեցին մի քանի մահացության դեպքեր։

Օրբելյանը համամիտ չէ աշխատանքից ազատելու մարզպետի հրամանի հետ եւ բողոքարկում է այն, սակայն կարծես թե սխալ մարմին է ընտրել։ Վարչական դատարանը գտել է, որ Սմբատ Օրբելյանի հայցադիմումը ենթակա է վերադարձման: Նշենք, որ նրա շահերը ներկայացնում է որդին՝ Արամ Օրբելյանը՝ արդարադատության նախկին փոխնախարարը։

Վերլուծելով Վարչական դատավարության օրենսգրքի մի շարք դրույթներ, դատարանն արձանագրում է, որ վիճարկման հայց ներկայացնելիս անձը հայցադիմումում անպայման պետք է նշի այդ ակտը վերադասության կարգով բողոքարկելու մասին: Մինչդեռ հայցադիմումը չի բովանդակում տեղեկություններ` հայցվորի կողմից վիճարկվող ենթադրյալ վարչական ակտը վերադասության կարգով բողոքարկելու վերաբերյալ:

Այդ հիմքով հայցադիմումը վերադարձնելը հիշյալ օրենսգրքի 79-րդ հոդվածի 1-ին կետի 1-ին ենթակետով սահմանված իմպերատիվ պահանջ է:

Դատարանի որոշումից տեղեկանում ենք, որ հայցադիմումով հայցվորը ներկայացրել է միջնորդություն, որով խնդրել է հայցադիմումը վարույթ ընդունելու որոշման մեջ նշել, որ դրանով կասեցվում է վարչական ակտի կատարումը:

Այս առումով դատարանն արձանագրել է, որ Վարչական դատարանում վիճարկման հայց ներկայացնելու նախապայման է հանդիսանում պատասխանողի կողմից անձի հանդեպ կայացված միջամտող վարչական ակտի առկայությունը:

Վարչարարության հիմունքների և վարչական վարույթի մասին ՀՀ օրենքի 53-րդ հոդվածի համաձայն՝ վարչական ակտի բնութագրում նշված է, որ այն, ի թիվս այլ պայմանների, պետք է նաև ընդունված լինի հանրային իրավունքի բնագավառում:

Մինչդեռ ՀՀ Սյունիքի մարզպետի 17.01.2017թ. թիվ 5-Ա կարգադրության համարի մեջ կատարված «Ա» նշումից երևում է, որ այն անհատական ակտ է, իսկ նույն կարգադրության բովանդակությունից երևում է, որ այն հիմնված է կողմերի միջև կնքված աշխատանքային պայմանագրի հիման վրա: Նման պայմաններում արտաքուստ թիվ 5-Ա որոշումը վարչական ակտ չէ, որի կապակցությամբ էլ դատարանը վերը կիրառել է «ենթադրյալ» բառը:

Միջնորդության քննության առումով հայցադիմումին կցված չեն հայցվորի կողմից վիճարկվող ակտի ենթադրյալ վարչական ակտ լինելը քննարկելու համար անհրաժեշտ փաստաթղթեր (օրինակ՝ «Կապանի բժշկական կենտրոն» ՓԲԸ կանոնադրություն, կողմերի միջև կնքված աշխատանքային պայմանագիր, ՀՀ Սյունիքի մարզպետարանի և Կապանի բժշկական կենտրոն ՓԲԸ փոխհարաբերությունները սահմանող ակտեր և այլն), որպիսի հանգամանքը խոչընդոտում է հայցվորի միջնորդության քննարկմանը:

Դատարանի այս մատնանշումներին ուշադրություն դարձնելը հայցվորի համար նշանակություն կունենա իրավասու դատարան (ընդհանուր իրավասության դատարան) դիմելու ժամկետների բաց թողնում թույլ չտալու համար (անհատական ակտը վերացնելու և աշխատանքում վերականգնելու պահանջով):

Աղբյուր` Փաստինֆո