Փաստ ինֆո

Առանց Սերժ Սարգսյանի Հովիկ ու Աբրահամյանն Սեյրան Օհանյանը չէին հասնի իրենց պաշտոնին: Այդ մասին «Եռաբլուր» պանթեոնում լրագրողների հետ զրույցում նշեց Սյունիքի նախկին մարզպետ Սուրիկ Խաչատրյանը:

Հարցին, թե իր կարծիքով ինչո՞ւ են իշխանություններից նեղացած ՀՀ պաշտպանության նախկին նախարար Սեյրան Օհանյանն ու նախկին վարչապետ Հովիկ Աբրահամյանը՝ Սյունիքի նախկին մարզպետը նշեց. «Իրենք Սերժ Սարգսյանից նեղանալու իրավունք չունեն: Սերժ Սարգսյանը յուրաքանչյուրի վրա իր լուման ունի դրած: Առանց նրա իրենք էլ, ես էլ, չէինք հասնի պաշտոնի»:

Անդրադառնալով ՀՀԿ խորհրդի նիստում Սերժ Սարգսյանի հայտարարությանը՝ առվակների չորանալու մասին, Սուրիկ Խաչատրյանը նշեց. «Դա բնության օրենքն է, որ առվակները գետերից անջատվելով չորանում են: Դա Սերժ Սարգսյանը չի հորինել, դա բնության օրենքն է»:

ՀՀ նախկին վարչապետ, ՀՀԿ-ի նախկին փոխնախագահ Հովիկ Աբրահամյանը հունվարի 24-ին հայտարարեց քաղաքական ուժից դուրս գալու որոշման մասին: Նա հայտարարեց նաև, որ մնալու է քաղաքականության մեջ:

Քաղաքական կյանքը երկրում աշխուժանում է՝ կապված ապրիլի 2-ին կայանալիք ընտրությունների հետ: Նախագահ Սարգսյանը հունվարի 26-ին ՀՀԿ խորհրդի նիստում զավեշտալի է համարել փորձերը, որ անում են մարդիկ՝ ցանկանալով ներկայացնել, թե Հանրապետականից արտահոսք կա:

«Ի՞նչ ասեմ, դուք էլ գիտեք, որ դա անհեթեթություն է. միայն վերջին մի քանի ամիսներին մեր կուսակցությանը անդամագրվել է 11000-ից ավելի մարդ: Ուզում եմ այս թեմային արձագանքել փոխաբերաբար: Գիտեք՝ մայր գետերը, առաջընթաց են ապահովում իրենց հոսքի ողջ երկայնքով, կյանք են տալիս, հաց են տալիս, ջուր են տալիս, և այն առվակները, որոնք պոկվում են մայր գետից և կարճ ժամանակում նորից չեն մտնում նույն հոսքի մեջ, չորանում ու գնում են: Սա՛ է բնության օրենքը, և որևէ մեկը մեզնից չի կարող հակադրվել բնության օրենքներին, մենք կարող ենք փորձել կառավարել, կարգավորել, բայց, ըստ էության, այսպես է լինելու-,ասել է Սարգսյանը:

Աղբյուր` Փաստինֆո