Փաստ ինֆո

Սոչիի գործարարների սպանության գործով արդարացվել է երկու ենթադրյալ քիլլեր: Կրասնոդարի երկրամասային դատարանի երդվյալ ատենակալների կոլեգիան արդարացման դատավճիռ է կայացրել դեռևս մի քանի տարի առաջ հանգստավայր-քաղաքում ձեռնարկատերերի գնդակահարության գործով:

Այդ աղմկահարույց սպանության գործով ամբաստանյալներից մեկը դատավճռի հրապարակումից հետո ազատ էր արձակվել դատարանի դահլիճում, իսկ երկրորդը մնացել է կալանքի տակ, քանի որ այլ հանցագործության համար պատիժ է կրում:

Քիլլերների խմբի պարագլուխն, ըստ քննության վարկածի, Պյոտր Պինչուկն էր, ով անցյալ տարվա հուլիսին արտահանձնվել էր Հունաստանից: Պինչուկի մասով գործն անջատվել է առանձին վարույթ, քննությունը շարունակվում է:

Անցյալ տարվա հոկտեմբերին Կրասնոդարում դատարանի առջև կանգնեցին Դենիս Մուրդալովն ու Թեմուր Մատուան: Առաջինը մեղադրվում էր վարձով կրկնակի սպանության մեջ, իսկ երկրորդը համարվում էր քիլլերների օժանդակող:

Քննության վարկածի համաձայն, 2010թ. Սոչիի հիշյալ բնակիչները չպարզված անձի պատվերով սպանել են «Ակվա-Հաուս» սրճարանի սեփականատեր Էդուարդ Կագոսյանին, իսկ հետագայում՝ 2012թ. նրա գործընկերոջը՝ Թեմուր Մամուլիային:

«Կարաս» մականունով 31-ամյա խոշոր գործարար Էդուարդ Կագոսյանը «օրենքով գող» Ասլան Ուսոյանի՝ հայտնի է որպես Դեդ Հասան, մերձավոր շրջապատի մեջ էր մտնում: Հենց նա էր Սոչիում Ուսոյանին պատկանող ռեստորանների այսպես կոչված՝ «նայողը» (վերջինս նույն 2010թ. փրկվել էր մահափորձից, իսկ երեք տարի անց սպանվել մայրաքաղաքում նշանառուի կողմից):

Քննության վարկածով Սոչիում երկու հանցագործությունների կատարողը եղել է Պյոտր Պինչուկը: Չպարզված անձի կողմից ստանալով Կագոսյանի սպանության պատվեր՝ նա ներգրավել է իր ծանոթ Դենիս Մուրդալովին, իսկ Թեմուր Մատուան հետևում էր զոհին, գնված մոպեդներ էր հասցնում և թաքցնում հանցագործների կողմից օգտագործվելիք տրանսպորտային միջոցները:

Հատկանշական է, որ երկու ձեռնարկատերերին էլ գնդակահարել են Ադլերի նույն սրճարանում, որի համասեփականատերերը Կագոսյանն ու Մամուլիան էին:

2010թ. հոկտեմբերի 26-ին քիլլերները մոտոցիկլետով մոտեցել էին այստեղ, մեկը մնացել էր փողոցում, երկրորդը ներս էր մտել և ատրճանակ-գնդացրից կրակոցներ արձակել սեղանի շուրջ նստած Կագոսյանի վրա:

Թեմուր Մամուլիայի սպանությունը կատարվել էր 2012թ. մարտի մեկին՝ նույն սցենարով միայն այն տարբերությամբ, որ հանցագործները եկել էին սրճարան երկու մոպեդով:

Դատաքննության ընթացքում կասկածյալները հերքում էին իրենց մեղքը, իսկ նրանց փաստաբանները հղում էին կատարում ամբաստանյալների մեղքի օբյեկտիվ ապացույցների բացակայությանը, քանի որ չէին հայտնաբերվել զենքը, հագուստն ու հեռախոսները, որոնցից օգտվել էին քիլլերները, հանցագործների դեմքերը ոչ ոք չէր տեսել և գնդակահարության ականատեսներից ոչ ոք չէր ճանաչել ամբաստանյալներին:
Դատի ժամանակ երդվյալները բազմիցս հարցեր էին ուղղում վկաներին, տուժողներին ու ամբաստանյալներին Էդուարդ Կագոսյանի սպանության դրդապատճառի մասին և թե ով է հատկապես վճարել քիլլերներին, սակայն այդպես էլ պատասխան չէին ստացել:

Արդյունքում ատենակալները նրանց մեղքը չապացուցված էին համարել: Առաջինի դեպքում դրա օգտին քվեարկել էր 12-ից ութ ատենակալ, իսկ երկրորդ կասկածյալը անմեղ էր ճանաչվել կոլեգիայի 11 անդամի կողմից:

Դատավոր Ալեքսանդր Ժուկովը կարգադրել էր ազատել Թեմուր Մատուային դատարանի դահլիճում, իսկ ավելի վաղ Կրասնոդարի երկրամասային դատարանի կողմից իրավապահ մարմինների աշխատակցի կյանքի նկատմամբ նկրտման համար 12,5 տարվա ազատազրկման դատապարտված Դենիս Մուրդալովը մնացել էր կալանքի տակ:

Աղբյուր` Փաստինֆո