Փաստ ինֆո

Ռուսաստանյան դիվանագետների հանդիպումը Նորվեգական նոբելյան կոմիտեի նոր ղեկավարի հետ նորվեգական հակահետախուզությունը գնահատել է որպես ռուսաստանյան հատուկ ծառայությունների ազդեցության փորձ՝ թույլ չտալու համար, որպեսզի խաղաղութան Նոբելյան մրցանակը շնորհվի Ուկրաինայի նախագահ Պյոտր Պորոշենկոյին, հաղորդում է NRK տեղական հեռուստառադիոընկերությունը:

Նորվեգական նոբելյան կոմիտեի տնօրեն Ուլաֆա Նյոլսթադը պատմել է ԶԼՄ-ին, որ 2015թ. ամռանը իր հետ հանդիպման է եկել ռուսաստանյան դեսպանության երկու ներկայացուցիչ:

Ըստ նրա, այցելության ժամանակ ի թիվս այլնի քննարկվել է երկու շաբաթ դրանից առաջ հայտնված տեղեկություններն այն մասին, թե իբր ուկրաինական իշխանությունները Օսլոյում ամերիկյան դիվանագիտական առաքելության ղեկավարին նամակ են հղել Պորոշենկոյին խաղաղության նոբելյան մրցանակի շնորհմանը հասնելու համար Նոբելյան կոմիտեի վրա համատեղ ճնշում գործադրելու մասին:

Նյոլսթադը պատմել է NRK-ին, որ հանդիպման պահին արդեն իսկ կասկածել է, որ նամակն իսկական չէ և այդ մասին հարցրել է ռուսաստանյան դիվանագետներին: Նրանք էլ պատասխանել են, որ չգիտեն, թե արդյոք այն իսկակա՞ն է եղել:

Նյոլսթադը հեռուստաալիքին հայտնել է, որ հանդիպումից հետո մտածել է, թե արդյոք այն ազդեցություն գործելու փորձ չէր և կապվել է Անվտանգության ոստիկանական ծառայության հետ, որն ի թիվս այլնի զբաղվում է լրտեսության դեմ պայքարով:

Անվտանգության ծառայության հակահետախուզական ստորաբաժանման ղեկավար Արնե Քրիստիան Հաուգսթոյլը հայտարարել է NRK-ին, որ Նոբելյան կոմիտե այցելած ռուսաստանյան դիվանագետներից մեկը ռուսաստանյան հետախուզության աշխատակից է եղել:

«Մեր գնահատմամբ, դա եղել է ազդեցություն գործելու գործողություն… Մենք տեսնում ենք, որ կեղծ նորություններն ու կեղծ նամակն օգտագործվում էին խաղաղության մրցանակի պոտենցիալ թեկնածուին վարկաբեկելու համար: Մենք համարում ենք, որ տվյալ դեպքում նպատակ կար հասնել նրան, որ Պորոշենկոն չլինի Նոբելյան խաղաղության մրցանակի թեկնածու»,- հայտարարել է նա:

Ռուսաստանյան դեսպանությունում հայտարարել են, որ այդպիսի այցելությունները ամենօրյա դիվանագիտական աշխատանք են, իսկ դրանք որպես «ռուսաստանյան հետախուզության գործողություններ» ներկայացնելու փորձերը ցնորային են անվանել:

«Ցանկացած երկրում դիվանագետի ամենօրյա աշխատանքի կարևոր մասը ներքին և արտաքին քաղաքականության մասին ինֆորմացիա հավաքելն ու վերլուծելն է, գործընկերների հետ մտքերի փոխանակումն է և շատ ուրիշ բաներ»,- ասվում է Ռուսաստանի դեսպանության պատասխանում, որը հեռուստաալիքը հրապարակել է հոդվածում:

Աղբյուր` Փաստինֆո