Փաստ ինֆո

6 տարի շարունակ 12 քաղաքացիների թիվ 64 դպրոցում գրանցելու և նրանց անվամբ ստացված առանձնապես խոշոր չափերով գումարի յուրացման համար դպրոցի տնօրենը հայտնվել է ամբաստանյալի աթոռին:

Երևանի թիվ 64 հիմնական դպրոցի տնօրենի և նույն դպրոցի պահակի գործով նախաքննությունն ավարտվել է և գործն ուղարկվել է դատարան:

Ըստ մեղադրանքի՝ Անաիդա Շահնազարյանը մինչ 02.03.2015թ. զբաղեցնելով Երևանի թիվ 64 հիմնական դպրոցի տնօրենի պաշտոնը, պաշտոնական դիրքն օգտագործելով, նույն դպրոցի տարբեր ազատ հաստիքներում 2009-2015թթ. ընթացքում գրանցելով 12 քաղաքացիների, և վերջիններիս կողմից աշխատանքի վայր փաստացի չհաճախելու պայմաններում, նրանց անվամբ բյուջեից ելքագրել, ստացել և յուրացրել է առանձնապես խոշոր չափերով` ընդհանուր 12.003.240 ՀՀ դրամ աշխատավարձերի և այլ պարտադիր վճարների գումարներ:

Ըստ նույն դպրոցի պահակ Քնարիկ Մալխասյանին առաջադրված մեղադրանքի՝ վերջինս մտերիմ լինելով դպրոցի նախկին տնօրեն Շահնազարյանի հետ, դիմել է խնդրանքով դպրոցի ազատ հաստիքներին գրանցել որդուն` Դ.Մալխասյանին, եղբորը` Ս.Մալխասյանին և եղբորորդուն` Ա.Մալխասյանին, վերջիններիս անվամբ աշխատավարձերի և պարտադիր այլ վճարների գումարներ ելքագրելու և դրանք անձամբ տնօրինելու ակնկալիքով:

Այնուհետև Ա.Շահնազարյանի համաձայնությամբ և հրամանով նշված երեք անձինք գրանցվել են դպրոցում որպես տեխնիկական աշխատակիցներ, փաստացի աշխատանքի վայր չեն հաճախել, իսկ նրանց անվամբ բյուջեից ելքագրվել են աշխատավարձերի և այլ պարտադիր վճարների գումարներ` ընդհանուր 4.307.738 ՀՀ դրամի չափով, որոնք ստացվել և տնօրինվել են Ք.Մալխասյանի կողմից, ինչի արդյունքում վերջինիս օժանդակությամբ տնօրեն Ա.Շահնազարյանը վատնել է ընդհանուր 4.307.738 ՀՀ դրամ:

Անաիդա Շահնազարյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով, իսկ Քնարիկ Մալխասյանին՝ 38-179-րդ հոդվածի 3-րդ մասի 1-ին:

Նրանց երկուսի նկատմամբ որպես խափանման միջոց է ընտրվել չհեռանալու մասին ստորագրությունը:

Աղբյուր` Փաստինֆո