Փաստ ինֆո

«Ընդդեմ իրավական կամայականության» ՀԿ փաստաբան, ՀՀ ԱՆ «Նուբարաշեն» ՔԿՀ-ի կալանավոր Արարատ Խանդոյանի պաշտպան Արա Ղարագյոզյանը պահանջում է համապատասխան քայլեր ձեռնարկել` իր պաշտպանյալի խախտված իրավունքները վերականգնելու ուղղությամբ:

Ինչպես նշեց փաստաբանը «Փաստինֆո»-ի լրագրողի հետ զրույցում, ՀՀ քրեակատարողական վարչության պետ Ա.Օսիկյանին, ՀՀ արդարադատության նախարար Ա.Հովհաննիսյանին ուղղված բողոքում ինքը, մասնավորապես, պահանջում է կատարել ծառայողական քննություն՝ պարզելու, թե ինչ հիմքով է կալանավորված անձը պահվում պատժախցում այդ անմխիթար պայմաններում, ինչը պաշտպանի գնահատմամբ, խոշտանգում է:

Անմարդկային և դաժան վերաբերմունքի հիմքով ներկայացված բողոքում փաստաբանը նշում է, որ Արարատ Խանդոյանի նկատմամբ կիրառվել է կարգապահական տույժ, և նա տեղափոխվել է պատժախուց: Նկուղային հարկում գտնվող պատժախցում ցուրտ է ու խոնավ, պատուհանի ապակին կոտրված է, ցուրտը ներթափանցում է խուց, տարածքը չի ջեռուցվում:

Արցախյան ազատամարտի մասնակից Արարատ Խանդոյանը 12 անգամ վիրավորվել է ազատամարտի ընթացքում, կորցրել առողջությունը, մասնավորապես՝ ձախ երիկամը, փայծաղը, լյարդի ձախ բիլթի մի մասը և հաստ աղիքի որոշակի հատվածը:

Սակայն «Նուբարաշեն»-ի աշխատակիցները հաշվի չառնելով, որ Արարատ Խանդոյանը վատառողջ է, գտնվում է բուժման մեջ, դեռ չի ապաքինվել, արդեն երկրորդ անգամ տեղափոխում են նրան անմխիթար ու անմարդկային պայմաններում գտնվող պատժախուց: Ընդ որում, այնտեղ Արարատ Խանդոյանին տեղափոխելիս չեն տրամադրել սանիտարահիգիենիկ պարագաներ և առաջին անհրաժեշտ օգտագործման իրեր:

«Սա նմանատիպ երկրորդ դեպքն է, որ Արարատ Խանդոյանին տեղափոխում են պատուհանի ապակին կոտրված և անմխիթար վիճակում գտնվող, չջեռուցվող պատժախուց՝ հաշվի չառնելով նրա առողջական վիճակը»,- նշում է Արա Ղարագյոզյանը՝ հավելելով, որ Արարատ Խանդոյանի նկատմամբ տեղի է ունենում անմարդկային դաժան վերաբերմունք, որը հանգեցնում է Մարդու իրավունքների Եվրոպական կոնվենցիայի 3-րդ հոդվածի՝ խոշտանգումների արգելում, խախտման: «Ոչ ոք չպետք է ենթարկվի խոշտանգումների կամ անմարդկային կամ նվաստացնող վերաբերմունքի կամ պատժի»,- բողոքում նշել է պաշտպանը:

Արա Ղարագյոզյանը հիշեցրել է, որ այս օրերին Ժնևում տեղի է ունենում ՄԱԿ-ի Խոշտանգումների դեմ կոմիտեի 59-րդ նստաշրջանը, որտեղ Կոմիտեն արձանագրել է մի շարք խնդիրներ քրեակատարողական հիմնարկներում, սակայն Հայաստանի իշխանությունները ոչ մի քայլ չեն ձեռնարկում այդ խնդիրները լուծելու համար, կատարվում է հակառակը՝ շարունակում է անմարդկային և դաժան վերաբերմունքը կալանավորված անձանց նկատմամբ:
Բողոքին կցվել է Արարատ Խանդոյանի հայտարարության պատճենը, որը կատարվել է 27.01.2017թ. ՀՀ ԱՆ «Նուբարաշեն» ՔԿՀ-ից:

Լուսանկարում՝ Արա Ղարագյոզյանը

Աղբյուր` Փաստինֆո