Փաստ ինֆո

Ազգային ժողովի փոխնախագահ Էդուարդ Շարմազանովն անդրադարձել է ՀՀԿ-­ն լքելու Հովիկ Աբրահամյանի որոշմանը: ՀՀԿ ԳՄ և խորհրդի նիստերից հետո լրագրողների հետ հանդիպմանը ՀՀ ԱԺ փոխնախագահն ընդգծեց, որ դա եղել է բացառապես Հովիկ Աբրահամյանի որոշումը: «Յուրաքանչյուր գործիչ, այդ թվում նաև մեր նախկին կուսակից ընկերոջ իրավունքն է չմնալ Հանրապետականում, չմնալ կուսակցությունում»,- «Արմենպրես»-ի փոխանցմամբ` ասաց Շարմազանովը:

Նա հավելեց, որ Հովիկ Աբրահամյանի հեռանալով ՀՀԿ-­ն չի թուլացել: Շարմազանովի կարծիքով՝ ՀՀԿ-­ն հիմա ավելի ուժեղ և վճռական է: «Նախագահի գլխավորությամբ մենք համախմբված գնալու ենք ապրիլի ընտրություններին: Հանրապետականը գնալու է իր ծրագրերի իրականացման ճանապարհով»,­- ասաց ՀՀ ԱԺ փոխնախագահը:

Շարմազանովն ընդգծեց, որ իրենք ոչ նախկինում, ոչ հիմա որևէ անձի դեմ չեն պայքարել: «Մեր խնդիրները երևույթներն են, մենք ակնկալում ենք բոլոր մեր կուսակից ընկերներից համախմբված աշխատանք, իսկ մեր ընդդիմադիր գործընկերներից քաղաքական մշակույթին համապատասխան մրցապայքար»,­- ասաց նա:

Նրա համար անհասկանալի է մնացել, թե ինչո՞ւ է Հովիկ Աբրահամյանը որոշել լքել ՀՀԿ-­ն: Շարմազանովն ընդգծեց, որ կարդացել է Հովիկ Աբրահամյանի ֆեյսբուքյան գրառումը և այնտեղ որևէ քաղաքական դրդապատճառ չի գտել:

«Ես կարծում եմ, որ յուրաքանչյուր քաղաքական գործիչ՝ քաղաքականության մեջ որոշումներ կայացնելիս պետք է ներկայացնի քաղաքական հիմնավորումներ: Ես խնդրում եմ սա չանձնավորել, սա վերաբերվում է բոլորին: Ես այդ գրառման մեջ քաղաքական հիմնավորում չեմ տեսել, եթե դուք տեսել եք, կարող եք ինձ ցույց տալ»,-­ ասաց նա՝ հավելելով, որ կուսակցության գործադիր մարմնի և խորհրդի նիստերում Հովիկ Աբրահամյանի որոշումը չեն քննարկել, պարզապես հարգել են այն:

Նա անդրադարձավ նաև Մհեր Սեդրակյանի՝ ՀՀԿ­-ից դուրս գալու մասին խոսակցություններին: «Մհեր Սեդրակյանը, կարծում եմ, երբ գա ժամանակը, կխոսի այդ մասին: Դուք կարող եք իրեն զանգահարել հարցնել»,-­ ասաց նա:

Աղբյուր` Փաստինֆո