Փաստ ինֆո

Ադամանդներ հափշտակելու նպատակով Դուբայում Հնդկաստանի քաղաքացու սպանության գործով այսօրվա դատական նիստում հրապարակվեց դատավճիռը:

Դատարանը ճանաչեց ու հռչակեց ՀՀ քաղաքացի բոլոր երեք ամբաստանյալների՝ Հովհաննես Մելքոնյանի,Սեմյոն Եդիգարյանի և Խոսրով Մելքոնյանի անմեղությունը ՀՀ քրեական օրենսգրքի 215-րդ հոդվածի 4-րդ մասի՝ կազմակերպված խմբի կողմից կատարված մաքսանենգություն (հոդվածն ապաքրեականացված է) նրանց վերագրված արարքում ՝ հանցակազմի բացակայության պատճառաբանությամբ:

Հովհաննես Մելքոնյանը և Սեմյոն Եդիգարյանը մեղավոր ճանաչվեցին ՀՀ քրեական օրենսգրքի 104-րդ հոդվածի 2-րդ մասի 7-րդ և 8-րդ կետերով՝ մի խումբ անձանց կամ կազմակերպված խմբի կողմից ավազակությամբ զուգորդված սպանություն, և 175-րդ հոդվածի 3-րդ մասի 1-ին և 2-րդ կետերով՝ առանձնապես խոշոր չափերի գույք հափշտակելու նպատակով կազմակերպված խմբի կողմից կատարված ավազակություն և դատապարտվեցին համապատասխանաբար 23 և 21 տարվա ազատազրկման՝ յուրաքանչյուրը 230.627.667 ՀՀ դրամի չափով անձնական գույքի բռնագրավմամբ:

Ամբաստանյալ Խոսրով Մելքոնյանը ապաքրեականացված մաքսանենգության հոդվածով անմեղ ճանաչվելուց բացի անմեղ ճանաչվեց նաև ՀՀ քրեական օրենսգրքի 104-րդ հոդվածի 2-րդ մասի 7-րդ և 8-րդ կետերով մեղադրանքում՝ այդ հոդվածով նախատեսված հանցագործությանը նրա մասնակցությունն ապացուցված չլինելու պատճառաբանությամբ: Նա մեղավոր ճանաչվեց ՀՀ քրեական օրենսգրքի 175-րդ հոդվածի 3-րդ մասի 1-ին և 2-րդ կետերով նախատեսված հանցագործության կատարման մեջ և դատապարտվեց 13 տարվա ազատազրկման՝ 230. 627. 667-ական ՀՀ դրամի չափով անձնական գույքի բռնագրավմամբ:

Իրեղեն ապացույց ճանաչված և ՀՀ կենտրոնական բանկին ի պահ հանձնված 5290,715 կարատ բնական ադամանդները դատավճռով պետք է վերադարձվեն հանցագործությամբ անմիջականորեն գույքային վնաս կրած իրավաբանական անձին՝ տուժող ճանաչված ընկերությանը՝ ի դեմս նրա հիմնադրի կամ վերջինիս կողմից պատշաճ կարգով հատուկ լիազորված սուբրոգացիայի իրավունքի ուժով նրա նկատմամբ տնօրինման իրավունք ձեռք բերած անձին կամ անձանց՝ դատավճռի օրինական ուժի մեջ մտնելուց հետո Արաբական Միացյալ Էմիրությունների իրավապահ մարմինների կողմից լիազորված անձի պարտադիր մասնակցությամբ:

Իրեղեն ապացույց ճանաչված և ՀՀ ԿԲ-ին ի պահ հանձնված ադամանդների նկատմամբ դեպքից հետո ենթադրաբար իրավունքներ ձեռք բերած ապահովագրական ընկերությունների, սույն գործով որպես քաղաքացիական հայցվորներ ճանաչված և գործի քննությանը ներգրավված ընկերությունների ներկայացուցիչ Էմիլ Ամիրխանյանի ներկայացրած քաղաքացիական հայցը թողնվեց առանց քննության՝ բացառապես մասնավոր տիրույթում քննության ենթակա լինելու պատճառաբանությամբ:

Որպես դատական ծախս ամբաստանյալներից համապարտությամբ հօգուտ ՀՀ-ի պետական բյուջեի պետք է բռնագանձվի 3.176.452 ՀՀ դրամ գումար:

Նշենք, որ մեղադրողը միջնորդել էր բոլոր երեք ամբաստանյալներին դատապարտել ցմահ ազատազրկման:

 Լրագրողների հետ զրույցում ամբաստանյալներ Հովհաննես ու Խոսրով Մելքոնյանների պաշտպան Էդուարդ Աղաջանյանն ու Սեմյոն Եդիգարյանի պաշտպան Կարեն Հակոբյանը նշեցին, որ բողոքարկելու են դատավճիռը Վերաքննիչ դատարան:

Էդուարդ Աղաջանյանը նշեց, որ ընդհանուր առմամբ որոշակի չափով օբյեկտիվություն կար դատավճռում, սակայն, մասնավորապես, Խոսրով Մելքոնյանի մասով «միանշանակ համաձայն չեմ»:

Կարեն Հակոբյանն էլ իր հերթին հույս հայտնեց, որ ներպետական ատյաններում հնարավոր է փոփոխություն, սակայն եթե փոփոխություն չլինի, ապա բողոքարկելու է դատավճիռը նաև Եվրոդատարան:

Պաշտպանն ընդգծեց, որ թեև Երևանի Կենտրոն և Նորք-Մարաշ վարչական շրջանների դատարանը փորձեց ապահովել գործով ապացույց ճանաչված փաստական տվյալների հետազոտումը, բայց ոչ դատարանի մեղքով՝ Արաբական Միացյալ Էմիրությունների կողմից խախտվեց ՀՀ-ի և ԱՄԷ-ի միջև կնքված հանձնման պայմանագրի պահանջները, չտրամադրվեցին գործով ապացույցները:

«Բնականաբար, այս գործով ապացույցները հետազոտված չլինելու պայմաններում ես հարցականի տակ եմ դնում ընդհանրապես դատավարության արդարացիությունը, և բնականաբար այստեղ գործ ունենք այդ առումով ՄԻԵԴ-ի մի շարք չափանիշների խախտման հետ. փաստացի պաշտպանական կողմը, նաև դատարանն օբյեկտիվորեն զրկվեց մրցակցության պայմաններում գործի նյութերը հետազոտելու հնարավորությունից: Ինքնըստինքյան, այս պայմաններում (թեև փառք ու պատիվ մեր դատարանին, որ գոնե ցմահ ազատազրկում չնշանակվեց), բայց անկախ ամեն ինչից գտնում եմ, որ դատական ակտն այդ առումով օրինական չէ»,- հայտարարեց Կարեն Հակոբյանը՝ հավելելով, որ իրենք ամեն ինչ անելու են գործով արդարության հասնելու համար:

Աղբյուր` Փաստինֆո