Փաստ ինֆո

ՀՀ-ում Եվրոպական միության պատվիրակության կողմից հատկացված դրամաշնորհներից առանձնապես խոշոր չափերի հափշտակություն կատարելու համար ՀԿ նախագահը դատապարտվել է։ Դատաքննությունը տեղի է ունեցել արագացված ընթացակարգով:

Կենտրոն և Նորք –Մարաշ վարչական շրջանների ընդհանուր իրավասության դատարանի դատավճռով Ասլանյանը մեղավոր է ճանաչվել ՀՀ քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 2-րդ մասով և պատիժների համակցությամբ դատապարտվել է 4 տարի 6 ամիս ժամկետով ազատազրկման, սակայն նրա նկատմամբ պատիժը պայմանականորեն չի կիրառվի՝ քանի որ սահմանվել է փորձաշրջան 1 տարի ժամկետով:

Ավելի վաղ Քննչական կոմիտեն հայտարարել էր, որ բացահայտվել է ԵՄ-ի հատկացրած դրամաշնորհներից հասարակական կազմակերպության նախագահի կողմից ավելի քան 134 հազար եվրոյի հափշտակություն:

ԵՄ դրամաշնորհներից հափշտակվել է ավելի քան 134 հազար եվրո. բացահայտում

ՀՀ քննչական կոմիտեի ՀԿԳ քննության գլխավոր վարչությունում քննվող քրեական գործով ձեռնարկված քննչական գործողությունների արդյունքում փաստական տվյալներ են ձեռք բերվել, որ հասարակական կազմակերպությունը 2008 թվականին մասնակցել է ԵՄ պատվիրակության կողմից հայտարարված դրամաշնորհային ծրագրի համար հայտարարված մրցույթին, ներկայացրել ծրագիր, որի արդյունքում 2008 թվականի դեկտեմբերին ստորագրվել է դրամաշնորհի պայմանագիր՝ նախատեսված մի քանի տարվա համար։

Բազմակողմանի եւ օբյեկտիվ քննության արդյունքում ապացույցներ են ձեռք բերվել առ այն, որ հասարակական կազմակերպության հաշվեհամարին մաս-մաս փոխանցվել են պայմանագրով նախատեսված գումարները, սակայն կազմակերպությունը չի կատարել ստանձնած պարտավորությունները եւ կազմակերպության նախագահը յուրացրել է փոխանցված դրամաշնորհի գումարներից առանձնապես խոշոր չափի գումար։ Հափշտակված գումարի չափը գնահատվել է 134.620 եվրոյին համարժեք 67.335.130 ՀՀ դրամ։

Հափշտակության փաստը քողարկելու համար՝ պատրաստվել են ծրագրի ընթացքում, իբր, կատարած ծախսերը հիմնավորող կեղծ տեղեկություններ պարունակող փաստաթղթեր եւ ներկայացվել Եվրոպական միությանը

Նախաքննության ընթացքում պատճառված վնասը վերականգնվել էր՝ փոխանցվելով ՔԿ-ի դեպոզիտ հաշվին։

Նախաքննական մարմինը կազմակերպության նախագահին մեղադրանք էր առաջադրել՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով եւ 325-րդ հոդվածի 2-րդ մասով։

Պարզվում է, որ խոսքը գնում է Քաղաքացիական հասարակության զարգացման կենտրոն հասարակական կազմակերպության մասին, որի նախագահը դատարանում ընդունել է առաջադրված մեղադրանքը, զղջացել կատարած արարքի համար եւ միջնորդել դատաքննությունն իրականացնել արագացված ընթացակարգով, ինչին չի առարկել նաեւ դատախազը։

Դատարանը պատասխանատվությունը և պատիժը մեղմացնող հանգամանք է դիտել այն, որ նա տուժողին պատճառված վնասը փոխհատուցել է, եւ հաշվի առնելով, որ ունի առողջական խնդիրներ՝ դատապարտել է ազատազրկման՝ պատիժը պայմանականորեն չկիրառելով։

Աղբյուր` Փաստինֆո