Փաստ ինֆո

20 տարի շարունակ իշխանության առանցքային պաշտոնները զբաղեցրած անձը չի կարող մեկ օրում դառնալ արմատական ընդդիմություն: Այս մասին «Ազատության» հետ զրույցում ընդգծեց իշխող Հանրապետական խմբակցության (ՀՀԿ) ղեկավար Վահրամ Բաղդասարյանը՝ պատասխանելով «Ազատության» հարցին, թե ինչպե՞ս են գնահատում այն հանգամանքը, որ պաշտպանության նախկին նախարար Սեյրան Օհանյանը հանդես է գալիս արմատական ընդդմիության դիրքերից՝ քննադատության ենթարկելով գործող իշխանությանը:

Նշենք, որ ապրիլին կայանալիք խորհրդարանական ընտրություններին մասնակցելու մասին հայտարարած Սեյրան Օհանյանը, ֆեյսբուքյան իր էջում պարբերաբար հանդես է գալիս տեսաուղերձներով, նշելով, թե երկրում պետք է լինի արդար մրցակցություն, ավելին, «իրական քվեով ձևավորված հանրային լայն վստահություն ունեցող իշխանություն»:

Անցած շաբաթ օրն էլ տարածած տեսաուղերձում Սեյրան Օհանյանը խոսեց իշխանության հանդեպ աճող անվստահության մասին՝ զգուշացնելով, որ ստեղծված իրավիճակն իր ազդեցություն է թողնում բանակի վրա։ «Իշխանության հանդեպ աճող հասարակական անվստահությունը չեն կարող բանակին թիկունք ապահովել։ Աղքատության մակարդակն արդեն հատել է ազգային անվտանգության համար վտանգավոր ցուցանիշը։ <...> Օրենքի առաջ անհավասարությունը, անարդարությունը, համատարած կողմնապահությունը և դրանից բխող մշտական կոռուպցիան՝ իրենց փոքր ու մեծ հետևանքներով, հենց բոլոր խնդիրների հիմքն են», - հայտարարեց Օհանյանը։

Վահրամ Բաղդասարյանի խոսքով՝ արմատական ընդդիմությունը լինում է գաղափարական, և չի կարծում, թե մեկ շաբաթում, մեկ ամսում գաղափարներ կարող են փոխվել։ «Ես չեմ կարծում, որ շուրջ 20 տարի իշխանության ամենակարևորագույն պոստերը գրաված անձնավորությունները կարող են լինել արմատական ընդդիմություն։ Արմատական ընդդիմությունը մեկ օրում չի ծնվում, ծնվում է տարիների ընթացքում և գաղափարական է լինում արմատական ընդդիմությունը։ Ես չեմ կարծում, որ մեկ շաբաթում, մեկ ամսում գաղափարներ կարող են փոխել և լինել նոր ինչ-որ քաղաքական գաղափարներ կրող քաղաքական գործիչներ», - ասաց Բաղդասարյանը։

Հոդվածն ամբողջությամբ՝  սկզբնաղբյուր-կայքում

Աղբյուր` Փաստինֆո