Փաստ ինֆո

Շենգավիթ վարչական շրջանի ընդհանուր իրավասության դատարանի նախագահ Դավիթ Բալայանը 12.01.2017թ. կայացված որոշմամբ մերժել է քննիչի միջնորդությունը՝ Վրեժ Բադալյանին կալանքի տակ պահելու ժամկետը ևս 2 ամիս ժամանակով երկարացնելու մասին, և նա ազատ է արձակվել: Այս մասին «Փաստինֆո»-ի լրագրողին հայտնեց Վ.Բադալյանի պաշտպան, փաստաբան Երեմ Սարգսյանը:

Վրեժ Բադալյանը մեղադրվում է ՀՀ քրեական օրենսգրքի 316-րդ հոդվածի 2-րդ մասով՝ իշխանության ներկայացուցչի կյանքի կամ առողջության համար վտանգավոր բռնություն գործադրելը, որի համար որպես պատիժ է նախատեսված 5-10 տարի ժամկետով ազատազրկումը, սակայն դատարանը գտել է, որ չի հաստատվել մեղադրյալի կողմից այդ հանցագործությունը կատարելու վերաբերյալ հիմնավոր կասկածը:

Ըստ մեղադրանքի` Վրեժ Բադալյանը, չենթարկվելով իր ծառայողական պարտականությունները կատարող, ոստիկանության տեսուչ Դավիթ Փանոսյանի օրինական պահանջին` այն է չխոչընդոտել Երևան քաղաքի Արտաշատի խճուղու 105/5 հասցեի մոտակայքում գտնվող ապօրինի շինության ապամոնտաժման աշխատանքներին, բռնություն է գործադրել նրա նկատմամբ. բռունցքով հարվածելով նրա դեմքին՝ պատճառել է առողջությանը թեթև վնաս:

Ըստ Ե.Սարգսյանի, Երևանի քաղաքապետարանի համապատասխան աշխատակիցները հայտնաբերել են վերը նշված շինությունը, այն համարել են ինքնակամ կառուցված շինություն և այդ կապակցությամբ կազմել են մեղադրյալի հոր կողմից վարչական իրավախախտում կատարելու վերաբերյալ արձանագրություն, ինչի վերաբերյալ վերջինս առարկություն է ներկայացրել:
«Բնականաբար, այս ենթադրյալ վարչական իրավախախտման վերաբերյալ իրավասու մարմնի կողմից դեռևս օրենքով սահմանված կարգով պետք է վարչական վարույթ իրականացվեր և իրավասու մարմնի կամ պաշտոնատար անձի կողմից այդ կապակցությամբ որոշում կայացվեր, որպեսզի հաստատվեր, որ անձն իրոք կատարել է վարչական իրավախախտում: Բացի այդ, նշված վարույթի ընթացքում պետք է փաստվեր, որ անձը չի կարող օրինականացնել այդ ինքնակամ շինությունը, որից հետո միայն որոշվեր քանդել այդ ինքնակամ շինությունը»,- ասաց փաստաբանը:

Ընդ որում, նշեց Ե.Սարգսյանը, իրենց տրամադրության տակ առկա են Երևանի քաղաքապետի կողմից կայացված բազմաթիվ որոշումներ, որոնցով հենց վերջինս է որոշել նախ չօրինականացնել նշված ինքնակամ շինությունը, ապա` նոր միայն քանդել ինքնակամ շինությունը:

«Սույն դեպքում, սակայն, առանց վարչական վարույթ իրականացնելու, առանց միակ իրավասու պաշտոնատար անձի` Երևանի քաղաքապետի կողմից նշված ինքնակամ շինությունը չօրինականացնելու և այն քանդելու մասին որոշում կայացնելու, Շենգավիթ վարչական շրջանի ղեկավարի աշխատակազմի քաղաքաշինության և հողօգտագործման բաժնի աշխատակիցներն ապօրինաբար որոշել են հենց տեղում քանդել այդ շինությունը, որի համար նույնիսկ էքսկավատոր են կանչել», - ասաց պաշտպանը:

Բնականաբար, դրան առարկել են մեղադրյալը և նրա հայրը, նրանք հայտնել են, որ թույլ չեն տալու քանդել այդ շինությունը՝ մինչև համապատասխան որոշում չլինի: Այդ ժամանակ էլ քաղաքապետարանի աշխատակիցները ոստիկանության աշխատակիցներին են կանչել, որպեսզի ապահովեն, որ իրենք անարգել քանդեն այդ շինությունը:

Ոստիկանության աշխատակիցներն էլ՝ գալով դեպքի վայր և պարզելով, որ առկա է միայն վարչական իրավախախտում կատարելու վերաբերյալ կազմված արձանագրություն, իսկ կառույցը քանդելու վերաբերյալ Երևանի քաղաքապետի որոշումն առկա չէ, ապօրինաբար պահանջել են, որպեսզի մեղադրյալի հարազատները չխոչընդոտեն կառույցի քանդման աշխատանքներին:
Ստացվում է, որ քաղաքապետարանի աշխատակիցներն օրենքի խախտմամբ, առանց նման իրավասություն ունենալու, սկսել են քանդել այդ շինությունը, իսկ ոստիկանության աշխատակիցներն էլ ոչ միայն օժանդակել են այդ ապօրինի գործողություններին, դեռ մի բան էլ անօրինական պահանջ են ներկայացրել, որպեսզի մեղադրյալի հայրը չխոչընդոտի այդ ապօրինի գործողությունների կատարմանը:

«Ակնհայտ է, որ ոստիկանության աշխատակիցներն անօրինական են գործել և այդ դեպքում արդեն իսկ անհիմն է քննիչի այն մեղադրանքը, որ Վրեժ Բադալյանը «չի ենթարկվել ոստիկանի օրինական պահանջին` այն է չխոչընդոտել նշված ապօրինի շինության ապամոնտաժման աշխատանքներին»:

Ըստ Երեմ Սարգսյանի, ՀՀ վճռաբեկ դատարանն իր նախադեպային որոշմամբ արձանագրել է, որ եթե որպես իշխանության ներկայացուցիչ հանդես եկող անձի գործողություններն ապօրինի են, ապա նրա նկատմամբ գործադրված բռնությունը չի կարող որակվել որպես իշխանության նյերկայացուցչի նկատմամբ գործադրված բռնություն և չի կարող քրեական պատասխանատվություն վրա հասնել ՀՀ քրեական օրենսգրքի 316-րդ հոդվածով:

Երեմ Սարգսյանը հայտնեց, որ հենց այս ամենն էլ կալանքի տակ պահելու ժամկետը երկարացնելու միջնորդության քննարկման ժամանակ ինքն ու փաստաբան Վաղարշակ Գևորգյանը ներկայացրել են դատարանին, և դատարանն էլ իրենց պատճառաբանությունները հիմնավոր է համարել, ապա նաև մերժել է քննիչի միջնորդությունը, և Վրեժ Բադալյանն ազատ է արձակվել կալանքից:

Ցավոք սրտի, այս դեպքում ևս, նշեց փաստաբանը, դատախազն առանց խորապես գործն ուսումնասիրելու, ուղղակի մեխանիկորեն, պարտադիր վերաքննիչ բողոք է ներկայացրել, նշելով գործի նյութերից չբխող հիմնավորումներ և այդ կերպ անհարկի ծանրաբեռնելով պետական ապարատի` դատախազության և Վերաքննիչ դատարանի աշխատանքը:

Աղբյուր` Փաստինֆո