Փաստ ինֆո

Ամենայն հավանականությամբ պաշտպանության նախկին նախարար Սեյրան Օհանյանը կղեկավարի նորաստեղծ դաշինքի նախընտրական ցուցակը՝ մնալով անկուսակցական: Այս մասին այսօր «Ազատությանը» տված հարցազրույցում տեղեկացրեց նախկին արտգործնախարար Վարդան Օսկանյանը, ում ղեկավարած «Համախմբում» կուսակցությունը դաշինք է կազմել Վիկտոր Դալլաքյանի «Երրորդ Հանրապետության» և Արամ Սարգսյանի Դեմոկրատական կուսակցության հետ:

Վարդան Օսկանյան․ - Անպայման Սեյրան Օհանյանը ներգրավվածություն կունենա: Նա այս պահին կուսակցական չէ: Ես կարծում եմ՝ այդպես էլ կմնա, որովհետև մենք դաշինքը ընդլայնելու խնդիր ունենք: Դա նաև մեզ հնարավորություն կտա տարբեր տեսակի ձևաչափեր անել հետագայում, երբ որ այլ դաշինքներ կամ այլ քաղաքական ուժեր մեզ միանան:

«Ազատություն»․ - Այսինքն, ինչպիսին էլ վերջնականում լինի ձեր դաշինքը, Սեյրան Օհանյանը լինելո՞ւ է այդ դաշինքում:

Վարդան Օսկանյան․ - Այո, ես կարող եմ դա արդեն հաստատել, որ նա անպայման ներգրավված է լինելու:

«Ազատություն»․ - Դուք հանդիպել եք Սեյրան Օհանյանի հետ, և, բնականաբար, փորձել եք հասկանալ՝ ինչու նա որոշեց ընդդիմադիր դաշտում հայտնվել: Ի վերջո նա տևական ժամանակ եղել է Սերժ Սարգսյանի թիմի անդամ, իշխող Հանրապետականի հենարան, և միանգամից հայտնվելով ընդդիմադիր դաշտում և հայտարարելով, որ վերջապես պետք է վստահության վրա ձևավորված իշխանություն գա, մի տեսակ անհամոզիչ է թվում: Դուք Ձեզ համար հասկացե՞լ եք, ինչո՞ւ Սեյրան Օհանյանը այսպես կտրուկ որոշեց իշխանական դաշտից տեղափոխվել արմատական ընդդիմադիր դաշտ:

Վարդան Օսկանյան․ - Ցանկացած հայրենասեր մարդ, որ մտահոգված է այս երկրի ապագայով, նման քայլ կաներ: Ես համոզված եմ, որ նույն Հանրապետական կուսակցության մեջ բազմաթիվ մարդիկ կան, որ կուզենային նման քայլ անել, բայց երևի իրենց համարձակությունը չի հերիքում, որովհետև բոլորն էլ տեսնում են, որ իշխանությունը արդեն սպառել է իրեն և փոփոխություն է պետք:

Սեյրան Օհանյանը այն մարդն էր, որ ունեցավ համարձակությունը, որովհետև մտահոգ է երկրի ապագայով, պատկերացնում է լուծումները, տեսնում է խնդիրները և որոշեց դուրս գալ իշխանությունից, որպեսզի կարողանա ինքնուրույն մասնակցել ընտրություններին իր համախոհ մարդկանց հետ: Եվ այդ համախոհներից մեկը ես եմ:

«Ազատություն»․ - Դուք բանակցում էիք նաև «Ժառանգության» հետ, հանդիպումներ էիք ունեցել Րաֆֆի Հովհաննիսյանի հետ, բայց դաշինքում «Ժառանգությունը» չընդգրկվեց: Ինչո՞ւ, ո՞րն էր պատճառը:

Վարդան Օսկանյան․ - Մեր խնդիրը «Ժառանգության» հետ չէր: «Ժառանգությունը», ինչպես իրենք հրապարակային արդեն ասում են, իրենց ներսում դեռևս որոշում չունեն: Իհարկե, մեզ համար շատ ցանկալի կլիներ, որ հենց այդ կորիզում Րաֆֆի Հովհաննիսյանն էլ լիներ: Ես չեմ բացառում, որ կարող է ապագայում միանան: Տարակարծություններ՝ գաղափարական, ծրագրերի, մոտեցումների, չունենք:

«Ազատություն»․ - Վերադառնանք Ձեր դաշինքին: Հնարավո՞ր է, որ ի վերջո Ձեր ձևավորած դաշինքը միանա արդեն իսկ ստեղծված «Ծառուկյան դաշինքին»:

Վարդան Օսկանյան․ - Մենք առաջին օրից էլ ասել ենք, որ ոչինչ չենք բացառում: Մի բացառություն կա՝ գործող իշխանության հետ որևէ գործ չենք ուզում ունենալ ո՛չ հիմա, ո՛չ էլ ապագայում:

«Ազատություն»․ - Այսինքն ի վերջո հնարավոր է ինչ-որ մի պահի՝ նման միավորում լինի:

Վարդան Օսկանյան․ - Ոչ մի բան չենք բացառում:

Հարցազրույցն ամբողջությամբ՝ սկզբնաղբյուր-կայքում

Աղբյուր` Փաստինֆո