Փաստ ինֆո

Հանցավոր համագործակցության վերաբերյալ գործով այսօրվա դատական նիստը հետաձգվեց նույն պատճառով՝ ամբաստանյալ, ՀՀ նախկին փոխվարչապետ ու պաշտպանության նախկին փոխնախարար Վահան Շիրխանյանի բացակայության պատճառով:

Մեղադրող կողմը՝ վկայակոչելով քրեակատարողական հիմնարկից ստացված տեղեկանքը՝ նշեց, որ արդեն երրորդ նիստն է, ինչ առանց հարգելի պատճառի, դատարանի հանդեպ անհարգալից վերաբերմունք դրսևորելով՝ Վահան Շիրխանյանը չի ներկայանում դատարան:

Նույն այդ տեղեկանքին հղելով՝ մեղադրողը նշեց նաև, որ Վ.Շիրխանյանին պատգարակով տեղափոխելու անհրաժեշտություն չկա, նրա առողջական վիճակը բավարար է:
Մեղադրողը միջնորդեց ապահովել ամբաստանյալի ներկայությունը հաջորդ դատական նիստին, որպեսզի չխախտվի նաև մյուս ամբաստանյալների՝ ողջամիտ ժամկետում գործի քննության իրավունքը:

Վ.Շիրխանյանի պաշտպան, փաստաբան Հայկ Ալումյանը հակադարձեց մեղադրող կողմի հայտարարություն-միջնորդությանը՝ նշելով. «Ինձ համար տհաճ է լսել՝ «առողջական վիճակը բավարար է» բառերը, առողջական վիճակը բավարար չէ, այն շատ ծանր է»:

Որպես ՔԿՀ տեղեկանքը հերքող ապացույցներ Հ.Ալումյանը դատարանին ներկայացրեց երեք փաստաթուղթ: Դրանց թվում է, մասնավորապես, անցյալ տարվա նոյեմբերի 10-ին ՀՀ մարդու իրավունքների պաշտպանի՝ 17 թերթ կազմող որոշումը, որում հստակ նշվում է, թե ինչ առողջական խնդիրներ ունի Վահան Շիրխանյանը և որ նրան չի ցուցաբերվում անհրաժեշտ բուժօգնություն:

Իսկ հասարակական դիտորդական խմբի անցյալ տարվա դեկտեմբերի 9-ի ընթացիկ հաշվետվության մեջ նշվում է, որ թեև իր՝ Վահան Շիրխանյանի, վերաբերյալ բազմաթիվ բժշկական հետազոտություններ են անցկացվել և նշվում է, որ անձին հնարավոր է բուժել ՔԿՀ-ում, դիտորդական խումբը գտել է, որ, հակառակը, կալանքի մեջ գտնվելուց ի վեր Վ.Շիրխանյանի վիճակը տեսանելիորեն վատացել է:

Վ.Շիրխանյանին աստիճանաբար սպանում են, հավելեց Հայկ Ալումյանը:

Պաշտպանը դատարանին ներկայացրեց նաև օրերս ամբաստանյալին հետազոտած բժիշկ նյարդաբանի եզրակացությունը, ըստ որի ամբաստանյալը տառապում է գոտկատեղի հատվածում ցավային նյարդարմատային համախտանիշով, այսինքն՝ ցավեր ունի գոտկատեղի հատվածում ու չի կարողանում քայլել: «Ես կասկածում եմ, որ պետական որոշ մարմիններ չեն ուզում, որ Վահան Շիրխանյանը գա դատարան»,- ասաց պաշտպանն՝ ընդգծելով, որ ինքը պատգարակով կամ սայլակով իր պաշտպանյալին տեղափոխելու հարցում որևէ խնդիր չի տեսնում: Պաշտպանը միջնորդեց դատարանին հրահանգել ՔԿՀ-ին ներկայացնել իր պաշտպանյալի բժշկական քարտը՝ միջնորդությունն, ըստ դատարանի, կբավարարվի:

Դատարանն առաջարկեց գործի նախապատրաստական փուլն անցկացնել ամբաստանյալի բացակայությամբ, սակայն պաշտպանական կողմը հայտարարեց, որ ամբաստանյալի բացակայությամբ չի կարող գործի քննությունը շարունակվել: Մասնավորապես, այլ ամբաստանյալների պաշտպան, փաստաբան Ինեսսա Պետրոսյանը հայտարարեց, որ այդ դեպքում կխախտվի Վահան Շիրխանյանի պաշտպանության իրավունքը: Պաշտպանը միջնորդեց մեկ ժամով հետաձգել դատական նիստը, իսկ այդ ընթացքում հրահանգել ամբաստանյալին պատգարակով տեղափոխել դատարան: Մի շարք փաստաբաններ, այդ թվում՝ Վ.Շիրխանյանի պաշտպան Հայկ Ալումյանը, միացան միջնորդությանը: Սակայն միջնորդությունը մնած առկախ՝ ոչ մերժվեց, ոչ բավարարվեց, դատական նիստը հետաձգվեց մինչև հունվարի 27-ը:

Աղբյուր` Փաստինֆո