Փաստ ինֆո

Մարդու իրավունքների պաշտպան Արման Թաթոյանն այսօր հրապարակեց ՀՀ Տավուշի մարզի Չինարի գյուղում կատարված մարդու իրավունքների լուրջ խախտումների՝ ադրբեջանական դիվերսիոն հարձակումից հետո կատարված փաստահավաք աշխատանքների արդյունքները:

Աշխատանքները կատարվել են անցյալ տարվա դեկտեմբերի 29-ին և 30-ին և շարունակվել նաև տոն օրերին:

Փաստեր են հավաքվել նաև 2017թ. հունվարին տեղի ունեցած Ադրբեջանի զինված ուժերի կողմից Չինարի գյուղի գնդակոծությունների դեպքերի վերաբերյալ: Այսպես, հունվարի երեքի գնդակոծություններ են տեղի ունեցել գյուղի դպրոցի և հատկապես մանկապարտեզի ուղղությամբ, հունվարի ութին՝ բնակելի տների ուղղությամբ:

Արման Թաթոյանը նշեց, որ փաստահավաք աշխատանքները հանգեցրեցին եզրահանգման, որ երեք զինծառայողի կյանքից զրկելու և հարձակման դեպքը տեղի է ունեցել այն պայմաններում, երբ բացակայել է հայ զինծառայողների կողմից հակառակ կողմին վնաս հասցնելու որևէ վտանգ:

Գյուղի ուղղությամբ դեկտեմբերյան գնդակոծությունները սկսվել են առավոտյան ժամը ութից մինչև ժամը մեկը տևել է, և մարդիկ, այդ թվում՝ երեխաները, ստիպված են եղել թաքստոցներում պատսպարվել:

Հունվարի երեքի գնդակոծությունները նույնպես վտանգավոր են, որովհետև տևել են ժամը 18.05-ից մինչև 19.00-ը, ինչը ակնհայտորեն ենթադրում էր, որ կարող էին երեխաներ լինել այդտեղ:

Հունվարի ութի գնդակոծությունների դեպքի վերաբերյալ Պաշտպանը նշեց, որ քաղաքացիական բնակչությանը վնաս հասցնելու առումով գիշերային ժամերը համարվում են ամենախոցելի ժամերը:

Պաշտպանը շեշտեց, որ գյուղի մոտակայքում չկա որևէ զորամաս, որևէ ռազմական օբյեկտ, այստեղ բացառապես քաղաքացիական բնակչություն է, խաղաղ բնակիչներ, ինչը շատ ավելի ակնհայտ է դարձնում խաղաղ բնակիչների կյանքին ու առողջությանը վնաս հասցնելու մտադրությունը:

«Մեր աշխատանքները ցույց տվեցին, որ դրանք եղել են թիրախային հարձակումներ, այսինքն՝ կոնկրետ ուղղված են եղել բնակիչների, բնակավայրերի ուղղությամբ»,- ասաց Արման Թաթոյանն՝ ընդգծելով, որ դա ցույց է տալիս կյանքին ու առողջությանը վնաս հասցնելու մտադրությունը: Պաշտպանն ընդգծեց, որ դպրոցը որքան խորն է գտնվում, բայց միևնույն է թիրախային կրակոցներ են արձակվել:

Առանձնացվել են նաև մանկապարտեզի լուսանկարները, որովհետև այստեղ շատ ավելի շատ էին գնդակոծության հետքերը:

Արման Թաթոյանը նշեց, որ այս զեկույցում ներառվելու է նաև այն, որ հունվարի 13-ին ժամը 16.00-ից մինչև 17.00-ն գնդակոծության պատճառով Բաղանիս-Ոսկեպար ճանապարհը փակ էր:

ՄԻ պաշտպանն ընդգծեց, որ փաստահավաք աշխատանքների արդյունքները հիմնված են բացառապես բաց տվյալների վրա, աշխատանքները կատարվել են միջազգայնորեն ընդունված մեթոդներով:

Արման Թաթոյանն ընդգծեց, որ Տավուշի մարզի սահմանային գյուղերի խնդիրները լինելու են առաջնահերթ ուշադրության կենտրոնում՝ սկսած սոցիալական հարցերից մինչև նմանատիպ հարցերը:

Լուսանկարը՝ Ֆոտոլուրի

Աղբյուր` Փաստինֆո