Փաստ ինֆո

2016թ. մարտի 13-ին Սարի թաղում տեղի ունեցած անչափահասի սպանության գործով այսօր կայացավ հերթական դատական նիստը:

Էրեբունի և Նուբարաշեն վարչական շրջանների ընդհանուր իրավասության դատարանում, նախագահությամբ Աննա Դանիբեկյանի, այսօրվա դատական նիստում ամբաստանվող եղբայրներ Պետրոսյանների պաշտպան Սյուզաննա Խչեյանը հանդես է եկել միջնորդությամբ:

«Փաստինֆո»-ի թղթակիցը Պետրոսյան եղբայրների պաշտպան Սյուզաննա Խչեյանից տեղեկացավ, որ նախաքննական մարմնի որոշմամբ իր պաշտպանյալների տեսակցությունների վրա արգելանք է դրված եղել և հենց այդ որոշումը վերացնելու միջնորդությամբ է հանդես եկել, ինչը բավարարվել է դատարանի կողմից:

Սակայն այսօրվա դատական նիստը հետաձգվեց է, քանի որ տուժող կողմը դատարան չի ներկայացել:

Ըստ մեղադրանքի՝ Նարեկ Պետրոսյանը 2016թ. մարտի 13-ին` ժամը 21-ի սահմաններում, Սարի Թաղի թիվ 47 դպրոցի մոտ վիճաբանության, ապա ծեծկռտուքի ժամանակ իր հետ նախապես վերցված «Թիթեռ» տեսակի դանակով կյանքից ապօրինի զրկելու դիտավորությամբ հարվածել է անչափահաս Ա.Բաղդասարյանի սրտին, ինչի հետևանքով կարճ ժամանակ անց վերջինս մահացել է:

Հայհոյանքից մինչեւ սպանություն. Որն է եղել Սարի թաղում անչափահասի սպանության պատճառը

Բացի այդ, Նարեկը իր եղբոր` Դավիթ Պետրոսյանի հետ հիշյալ վիճաբանության ժամանակ Ն.Պետրոսյանը նույն դանակով, իսկ Դավիթ Պետրոսյանն իր ծալովի դանակով դիտավորությամբ հարվածներ են հասցրել անչափահաս Ս.Օսիպովին` նրա առողջությանը պատճառել միջին ծանրության վնաս` առողջության տևական քայքայումով:

Ըստ Դավիթ Պետրոսյանին առաջադրված մեղադրանքի՝ այդ վիճաբանության, ապա ծեծկռտուքի ժամանակ իր հետ նախապես վերցված ծալովի դանակով դիտավորությամբ հարվածել է անչափահաս Ռ.Կարապետյանի կրծքավանդակին` պատճառելով նրա կյանքին վտանգ սպառնացող առողջության ծանր վնաս:

Բացի այդ Դ.Պետրոսյանը նույն դանակով, իսկ Նարեկ Պետրոսյանը նախապես վերցված «Թիթեռ» տեսակի դանակով դիտավորությամբ հարվածներ են հասցրել անչափահաս Ս.Օսիպովին` նրա առողջությանը պատճառել միջին ծանրության վնաս` առողջության տևական քայքայումով:

Նարեկ Պետրոսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով և 113-րդ հոդվածի 2-րդ մասի 3-րդ կետով, իսկ Դավիթ Պետրոսյանին՝ 112-րդ հոդվածի 1-ին մասով և 113-րդ հոդվածի 2-րդ մասի 3-րդ կետով:

Նրանց երկուսի նկատմամբ որպես խափանման միջոց է ընտրվել կալանավորումը:

Աղբյուր` Փաստինֆո