Փաստ ինֆո

Ծննդկան Մերի Մարգարյանի և նրա դստեր մահվան գործով այսօրվա դատական նիստը սկսվեց և հետաձգվեց: 

Այսօր դատարանը նախատեսում էր հարցաքննել Երևանի Պերինատոլոգիայի, մանկաբարձության և գինեկոլոգիայի կենտրոնի ղեկավար և Հանրապետության գլխավոր մանկաբարձ-գինեկոլոգ Ռազմիկ Աբրահամյանին, սակայն դատարանը փորձագետին ուղարկված ծանուցման անդորրագիրը չէր ստացել:

Իսկ նրա հետ հեռախոսազրույցի ժամանակ Աբրահամյանը հայտարարեց, որ վատառողջ է, ծանուցագիրը չի ստացել և չի կարող ներկայանալ դատարան: Վերջինս նաև ասաց, որ հաջորդ դատական նիստին ևս չի կարող ներկայանալ:

Դատարանը նախագահությամբ՝ Դավիթ Բալայանի, ներկաններին տեղեկացրեց, որ եթե տեղեկություն ստացվի, որ Ռազմիկ Աբրահամյանը ծանուցվել է, և նրա հիվանդության մասին էլ պատշաճ փաստաթուղթ չներկայացվի, ապա նրան բերման ենթարկվելու որոշում կկայացվի:

Հաջորդ դատական նիստը տեղի կունենա հունվարի 24-ին:

Ստացվել են Մերի Մարգարյանի և նրա փոքրիկի դիակների դատաբժշկական փորձաքննությունների եզրակացությունները

Հիշեցնենք, որ 2015թ. հուլիսի 27-ին «Շենգավիթ» ԲԿ-ում կեսարյան հատումից հետո «Էրեբունի» ԲԿ տեղափոխված և երկու օր անց մահացած Մերի Մարգարյանի գործով հիմնական մեղադրյալը «Շենգավիթ» ԲԿ-ի բժշկուհի Շուշանիկ Բախշյանն է, ում նկատմամբ որպես խափանման միջոց է ընտրվել գրավը:

Դատաբժշկական հանձնաժողովը պարզել է, որ Մերի Մարգարյանի և նրա նորածին դստեր կյանքը փրկելու հնարավորությունն ավելի մեծ կլիներ, եթե նրան շուտ ծննդալուծեին՝ կեսարյան հատման միջոցով:

Մերի Մարգարյանը 4 օր շարունակ ունեցել է բարձր ջերմություն, սակայն «Շենգավիթ» ԲԿ մանկաբարձ-գինեկոլոգ Շուշանիկ Բախշյանը, ով եղել է հղիի բժշկական օգնություն և սպասարկում իրականացնող բժշկուհին, պարտավոր լինելով նրան հոսպիտալացնել, հրաժարվել և չի կատարել իր պարտականությունները. այս պայմաններում հղիին չհոսպիտալացնելը չի հիմնավորվել:

Բժշկի կողմից ցուցաբերված անբարեխիղճ վերաբերմունքի հետևանքով Մերի Մարգարյանը ծննդալուծումից հետո «HELLP» սինդրոմ համախտանիշ երկկողմանի թոքաբորբ» ախտորոշմամբ 2015թ-ի հուլիսի 29-ին մահացել է, կնոջ մահվան հաջորդ օրը թոքերի և գլխուղեղի այտուցից մահացել է նաև նրա նորածին դուստրը:

Գործով Մյուս մեղադրյալ Անի Բաբելյանն էլ 2015 թվականի հուլիսի 25-ին առավոտյան եղել է հերթապահ մանկաբարձ-գինեկոլոգը, սակայն նա նույն օրը բարձր ջերմությամբ ԲԿ դիմած Մերի Մարգարյանին չի հոսպիտալացրել, ինչի հետևանքով առաջացած բազմաօրգանային անբավարարությունից Մ.Մարգարյանն օրեր անց՝ հուլիսի 29-ին, մահացել է:

Շուշանիկ Բախշյանին և Անի Բաբելյանին մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասի հատկանիշներով (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ):

Աղբյուր` Փաստինֆո