Փաստ ինֆո

ՀՀ վերաքննիչ քրեական դատարանը՝ դատավոր Արշակ Խաչատրյանի նախագահությամբ, մերժել է հանցավոր համագործակցության վերաբերյալ գործով ամբաստանյալ, ՀՀ նախկին փոխվարչապետ և պաշտպանության փոխնախարար Վահան Շիրխանյանի պաշտպան Հայկ Ալումյանի բողոքը:

Բողոքում պաշտպանը միջնորդում է վերացնել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի` քրեական գործը դատական քննության նշանակելու մասին 24.11.2016թ. որոշումը Վահան Շիրխանյանի մասով, նրա նկատմամբ վերացնել խափանման միջոց կալանքը և Վահան Շիրխանյանին ազատել կալանքից:

Հայկ Ալումյանը միջնորդում է նաև վերացնել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 24.11.2016թ. որոշմամբ Վահան Շիրխանյանի նկատմամբ կիրառված սահմանափակումը` տեսակցությունների և հեռախոսային խոսակցությունների արգելքը:

«Փաստինֆո»-ի լրագրողի հետ զրույցում փաստաբանը հայտնեց, որ Վերաքննիչ դատարանի այդ որոշման դեմ բողոք է ներկայացնելու Վճռաբեկ դատարան՝ մինչև Մարդու իրավունքների եվրոպական դատարան դիմելը ներպետական ատյանները սպառելու համար:

Ի դեպ, նշենք, որ դատարանի վարույթում գտնվող, դռնբաց քննվող գործի շրջանակներում ներկայացված հիշյալ բողոքի քննությունը անց է կացվել դռնփակ, ինչի համար, ըստ Հայկ Ալումյանի, որևէ օրինական հիմք չկար:

Փաստաբանը նշեց, որ Վահան Շիրխանյանին առնչվող բոլոր վերաքննիչ բողոքների նման նիստին չէր ներկայացել դատախազը՝ ըստ ամենայնի իմանալով, որ բողոքի ելքը նախորոշված է, և այն կմերժվի:

Ըստ պաշտպանի, իր պաշտպանյալին կալանքի տակ պահելու համար հիմք չկա, այն չի բխում Մարդու իրավունքների եվրոպական կոնվենցիայի դրույթներից, որը հստակ ասում է, թե ո՛ր դեպքում կարելի է կալանքի տակ պահելու որոշում կայացնել:

Փաստաբանը նշեց, որ տեսակցությունների ու հեռախոսային խոսակցությունների արգելքը հանվել էր նախաքննության սկսվելուց մի քանի ամիս անց արդեն, իսկ անցյալ տարվա նոյեմբերի 24-ին արգելքը վերականգնվել էր արդեն դատարանի կողմից: Ընդ որում, արգելքը վերականգնվել է ոչ միայն Վահան Շիրխանյանի, այլև կալանքի մեջ գտնվգող մյուս ամբաստանյալների նկատմամբ ևս:

Այդ որոշմանը նոյեմբերի 10-ին, նախորդել էր Վահան Շիրխանյանի՝ լրատվամիջոցների ներկայացուցիչների հետ նախատեսված հանդիպման չկայանալը՝ տարբեր պատճառաբանություններով լրագրողների դիմումները «Երևան-Կենտրոն» ՔԿՀ ղեկավարության կողմից մերժվել էին:

Պաշտպանը հայտնեց, որ Վահան Շիրխանյանը դիմում է լրագրողներին՝ հայտնելով, որ նրանք կարող են իրենք հարցերն իրեն ուղարկել փոստային ծառայության միջոցով հետևյալ հասցեով՝ Երևան, Նալբանդյան 104, ՀՀ ԱՆ «Երևան-Կենտրոն» ՔԿՀ, Վահան Շիրխանյանին, բոլոր հարցերին Վ.Շիրխանյանը գրավոր կպատասխանի ու կուղարկի հասցեատերերին:

Լուսանկարը՝ Ֆոտոլուրի

Աղբյուր` Փաստինֆո