Փաստ ինֆո

Երրորդմասցի Լյովիկի ու նրա ընկերների սպանության գործով այսօրվա դատական նիստում հետազոտվեցին 4 լուսանկարով անձանց ճանաչման ներկայացնելու քննչական գործողությունների տեսաձայնագրությունները:

Դրանցից մեկով վկան հայտնել է, որ 30 մ հեռավորության վրա հեռախոսով խոսելիս է եղել, «մի մոմենտ» է տեսել, 20-25 տարեկան «նիհար-միհար» տղերք էին, լուսանկարներում պատկերված անձանցից որևէ մեկին չի ճանաչում:

Ընդ որում. սկզբնապես վկան նշել է, որ հնարավոր է, որ ճանաչել է թիվ 1 լուսնակարում պատկերված անձին, սակայն ավելի ուշադիր նայելուց հետո ասել է, որ նրան էլ չի ճանաչում:

Գործով բոլոր երեք ամբաստանյալների պաշտպան, փաստաբան Լուսինե Սահակյանը հայտարարեց, որ տեսանկարահանումը նայելով կարելի է միայն գուշակել, թե որ արձանագրության մասին է խոսքը:

Փաստաբանը նշեց, որ թիվ մեկ լուսանկարում պատկերվածը ամբաստանյալներից և ոչ մեկը չէ` Արթուր Սուքիասյանն է, ով նման չէ ամբաստանյալներից և ոչ մեկին:

Հաջորդ վկան ճանաչման մեկ այլ քննչական գործողությանը հայտարարել է, որ որևէ մեկին չի ճանաչում և այդ մասին համոզված է հայտարարում: Պաշտպան Լուսինե Սահակյանը հայտարարեց, որ գործողությունը սահմանված կարգով չի կատարվել` քննչական գործողության արձանագրությունն ընդհանրապես չի տեսանկարահանվել:

Պաշտպանը նշեց, որ թիվ 3 լուսանկարում պատկերված է ամբաստանյալ Սարգիս Գրիգորյանը, և վկան հստակ նշում է, որ ոչ ոք այդ երեք անձանց թվում չի եղել:

Մեկ այլ քննչական գործողությանը մասնակցած վկան հայտարարել է, որ ճանաչում է թիվ 3 լուսանկարում պատկերված անձին, ում տեսել է նախօրեին, նա իրեն վատ էր զգում, սիրտն էր բռնել, տեսքից էլ երևում էր, որ վատ է զգում, խնդրել է իրեն «Էրեբունի» հիվանդանոց տեղափոխել, ինքը տեղափոխել է, սակայն ոչ հիվանդանոց:

Վկան նշել է, որ անձին ճանաչել է «չախկալ խոշոր աչքերից» ու նոսր մազերից: Վկան միաժամանակ նշել է, որ անձին շատ է նմանեցնում իր տեսած անձին, սակայն վստահ է, թե ոչ` չի կարող ասել:

Պաշտպան Լուսինե Սահակյանը հայտարարեց` միանշանակ անթույլատրելի ապացույց է, ինչի վերաբերյալ հետագայում միջնորդություններ կարվեն: Փաստաբանը նկատեց, որ «չախկալ աչքերով» անձն իր պաշտպանյալն է, ճանաչման ներկայացված անձանցից նա միակն է, որ «չախկալ աչքեր» ու նոսր մազեր ունի և առանձնանում է մյուսներից այն դեպքում, որ ճանաչման են ներկայացվում իրար նման անձինք:

Լ. Սահակյանը նշեց նաև, որ տեսանկարահանող անձը հարցեր է տալիս, ինչի իրավունքը չունի, նա ավելի ակտիվ է, քան քննիչն այն դեպքում, որ միայն քննիչն ունի հարցեր տալու իրավունք:

Հիշեցնենք, որ գործով ամբաստանյալները երեքն են՝ «Գաստիկ» մականվամբ Վահան Հակոբյանը, «Տլե» մականվամբ Սարգիս Հախանումյանն ու «Ծգլ» մականվամբ Սարգիս Գրիգորյանը:

Ըստ մեղադրական եզրակացության, Վահան Հակոբյանը մի խումբ անձանց կողմից նախնական համաձայնությամբ ապօրինի ձեռք է բերել և պահել մարտական ակոսափող հրազեն հանդիսացող` 1963թ. գործարանային արտադրության 7,62 մմ տրամաչափի «ԱԿՄՍ» տեսակի ինքնաձիգ, 1976թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ և 1960թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ , որոնք ապահովված են եղել պահունակներով, ինչպես նաև ռազմամթերք հանդիսացող փամփուշտներով:

Ըստ մեղադրանքի, 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նախաքննական մարմինը որպես սպանության դրդապատճառ նշել է այն, որ Վահան Հակոբյանը «լարված, անբարյացակամ, գժտված վիճակում» է եղել Լևոն Ղազարյանի ու նրա շրջապատի հետ և, ըստ մեղադրական եզրակացության, սպանությունը կատարվել է վրեժխնդրությունից դրդված:

Լուսանկարը՝ Առավոտի

Աղբյուր` Փաստինֆո