Փաստ ինֆո

Հ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով շարունակվում է վկաների հարցաքննությունը:

Երևանի Ավան և Նորք վարչական շրջանների ընդհանուր իրավասության դատարանում այսօր նախատեսվում էր վկա Թելման Մխիթարյանի հարցաքննությունը, ով, սակայն, օգտվելով իր դատավարական իրավունքից, հրաժարվեց դատարանում ցուցմունք տալուց:

Բանն այն է, որ Թելման Մխիթարյանը Հայկազ Բարսեղյանի սպանության գործի շրջանակներում բացահայտված գործերից մեկով ունի մեղադրյալի կարգավիճակ:

Ըստ մեղադրանքի՝ 2015թ. հունվարի 28-29-ին Մխիթարյանը, ընդգրկված լինելով որպես մարտկոցի հերթապահ, իսկ Խաչիկ Մինասյանը՝ օրապահ, ՀՀ ԶՈՒ ներքին ծառայության կանոնագրքի կանոնների նկատմամբ դրսևորել են անփույթ և անբարեխիղճ վերաբերմունք, ինչն էլ առաջացրել է ծանր հետևանք:

Նախաքննության փուլում Մխիթարյանն առաջադրված մեղադրանքն ընդունել է:

Նկատի ունենալով, որ սպանության գործով որպես վկա անցնող Մխիթարյանը հրաժարվեց դատարանում ցուցմունք տալուց՝ մեղադրանքը պաշտպանող դատախազը միջնորդեց հրապարակել վկայի նախաքննական ցուցմունքը:

Պաշտպանական կողմն առարկեց՝ պատճառաբանելով, թե վկայի նախաքննական ցուցմունքը կարող է հրապարակվել էական հակասությունների դեպքում, ուստիև՝ Գնել Թևոսյանի պաշտպան Արա Զաքարյանը գտավ, որ մեղադրողի միջնորդությունը չի բխում օրենքի պահանջից:

Դատարանի որոշմամբ հրապարկվեցին վկայի նախաքննական ցուցմունքները:

Մասնավորապես, ըստ հրապարակված նախաքննական ցուցմունքի՝ վկան տեսել է, թե ինչպես են Գնել Թևոսյանը, Նորիկ Սահակյանը, Մովսես Ազարյանը, և Վաչե Սահակյանը Հայկազ Բարսեղյանի թևերն ընկած աստիճանահարթակով իջնում:

Նախաքննության ընթացքում տված լրացուցիչ ցուցմունքներում վկան պնդել էր ասվածն ու հավելել, որ Հայկազ Բարսեղյանին մի կողմից Վաչե Սահակյանն էր թևանցուկ արել, իսկ մյուս կողմից՝ Գնել Թևոսյանը, իսկ Մովսես Ազարյանը և Նորիկ Սահակյանը քայլել են նրանց հետևից:

Վկան հայտնել էր նաև, որ Հայկազ Բարսեղյանը չէր քայլում, այլ նրան տանում էին, ոտքերը գետնին էին քսվում, նրա գլուխը կախ էր հագին կար զինվորական բաճկոն, սպորտային գլխարկ, հաստ տաբատ, սպորտային զինվորական կոշիկներ:

Ըստ Թելման Մխիթարյանի նախաքննական ցուցմունքի՝ նա կարծել է, թե կուրսանտ Արթուր Վահանյանին են թևանցուկ տանում և որ նա խմած է, սակայն ավելի ուշ, երբ հայտնի է դարձել այս ողբերգական դեպքի մասին, հասկացել է, որ Հայկազն է եղել:

Վկան հետագա ցուցմունքներում պնդել էր, որ տեսել է նրանց դեմքը և որ այդ 4 երիտասարդներ են եղել Հայկազի թևերը ընկած տեղափոխողները:

Վկան նաև նշել է, որ դեպքից հետո զորանոցում զրուցել է կուրսանտ Նորիկ Օհանջանյանի հետ, ով պատմել է, որ քնից արթնացել է մահճակալի ճռճռոցից և աչքերը բացելով՝ Հայկազի մահճակալի մոտ տեսել է Գնել Թևոսյանին, Նորիկ Սահակյանին, Վաչե Սահակյանի: Ըստ Օհանջանյանի պատմածի՝ Վաչեն բռնած է եղել Հայկազի ոտքերը, իսկ Նորիկին և Գնելին էլ տեսել է Հայկազի ձեռքերը բռնելիս, և նրա բերանը փակելիս, ինչից շատ է վախեցել և ըստ Օհանջանյանի՝ լեզուն վախից կուլ է գնացել:

Նախաքննական ցուցմունքի հրապարակումից հետո վկան հրաժարվեց հարցերին պատասխանել:

Նշենք նաև, որ պաշտպանական կողմն արժանահավատ չհամարեց վկայի նախաքննական ցուցմունքը, իսկ Գնել Թևոսյանի պաշտպան Արա Զաքարյանն էլ միջնորդեց վկայի նախաքննական ցուցմունքները ճանաչել անթույլատրելի, քանի որ, ըստ պաշտպանի, դրանց հրապարակման կարգը խախտվել է, և դրանք հրապարակվել են քրեական դատավարության օրենսգրքի կոպիտ խախտմամբ:

Պաշտպանի միջնորդությունը մերժվեց՝ անհիմն լինելու պատճառաբանությամբ:

Հաջորդ դատական նիստին վկաների հարցաքննությունը կշարունակվի:

Լուսանկարը՝ Armtimes.com-ի

Աղբյուր` Փաստինֆո