Փաստ ինֆո

Սիրած աղջկան վարկաբեկելու և սուտ տեղեկություններ հայտնելու հարցերի պարզաբանման ընթացքում տեղի ունեցած սպանության գործով այսօր դատարանում սկսվեց վկաների հարցաքննության փուլը:

Հարցաքննված երկու վկաներից մեկը ամբաստանյալի, մյուսը՝ տուժողի, ընկերներն էին:

Ամբաստանյալ Գոռ Սարգսյանի ընկեր վկան հայտնեց, որ իր ընկերը շուրջ երկու ամիս հանդիպում էր աղջկա հետ, արդեն պետք է նշանվեին: Ամբաստանյալի հետ առաջին հանդիպմանը տուժողը Գոռին ասել է, որ սեռական կապ է ունեցել Գոռի ընկերուհու հետ: Առաջին հանդիպումից հետո Գոռն, ըստ նրա ընկերոջ, նեղված էր ու անտրամադիր, չէր շփվում, չէր խոսում:

Ամբաստանյալն իր սիրած աղջկան տարել է բժշկի մոտ և համոզվել, որ աղջկան անվանարկել են, ապա որոշել է նորից հանդիպել տուժողի հետ և պարզել, թե ինչու է նա այդպիսի լուրեր տարածում, անվանարկում իր սիրած աղջկան: Ամբաստանյալը ցանկանում էր պահանջել տուժողից, որ ներողություն խնդրի աղջկանից:

«Գոռը չի՞ ասել, որ ցանկանում էր պատժել» հարցին ի պատասխան վկան բացասական պատասխան տվեց: Նա նաև նշեց, որ Գոռը հանգիստ մարդ է իր խառնվածքով, միշտ հաշտեցնողի, հանդարտեցնողի դերում է եղել:

Վկան հայտնեց, որ տեղեկություն չի ունեցել Գոռի մոտ դանակ լինելու մասին: Ըստ ամբաստանյալի ընկերոջ, ամբաստանյալն ու տուժողը առանձնացել են, ինքը որևէ գործողություն չի տեսել, սակայն ձայներ են լսվել և գոռոց՝ վախ: Վկան տեսել է տուժողին՝ կքանստած, սակայն նրան չի մոտեցել, քանի որ «կանչեցին՝ ոստիկանություն» և իրենք շտապ հեռացել են:

Երկրորդ վկան տուժողի ընկերն էր՝ նրանք երկուսն էլ սովորում էին համալսարանի նույն ֆակուլտետում:

Ըստ վկայի, տուժողը ուզում էր իրենից հեռու վանել աղջկան, սակայն վերջինս հաշտվելու ուղիներ էր փնտրում: Ի դեպ, մեղադրական եզրակացությունում պատկերն այլ է՝ ըստ մեղադրական եզրակացութան, աղջկա ցանկությամբ նրանք դադարեցրել են իրենց հարաբերությունները, թեև Ազատն ամեն կերպ տարբեր պատրվակներով փորձել է վերականգնել նախկին շփումը, սակայն դա արդյունք չի տվել:

Տուժողի ընկերը հայտնեց, որ Գոռը գնացել էր համալսարան՝ իր սիրած աղջկա համակուրսեցի տղաների հետ ծանոթանալու, տուժողը լսել է իր նախկին ընկերուհու անունը և մոտեցել, ապա հավաստիանալով, որ իր նախկին ընկերուհու նոր ընկերն է, Գոռին ասել է՝ աղջիկն այն աղջիկը չէ, որի հետ արժե ընկերություն անել:

4-5 օր հետո Գոռը եկել է համալսարան, ասել՝ առանձնանանք, ապա լսվել են գոռոցներ՝ «վախ, վախ, խփեց»: Երբ ձայները լսելով՝ իրենք մոտեցել են տուժողին, նա ասում էր՝ «աչքերիս դեմը սևանում է, չեմ ուզում մեռնել»: Տուժողը խոսում էր, սակայն աչքերը փակվում էին, ինքը հարվածել է շատ արյուն կորցրած տուժողին, որպեսզի ուշքը չգնա: Վկան հայտնեց, որ ինքը ամբաստանյալի մոտ դանակ չի նկատել:

Ամբաստանյալի պաշտպանը դատարանի ուշադրությունը հրավիրեց այն հանգամանքի վրա, որ տուժողի հետ առաջին հանդիպման գնալիս ամբաստանյալն արդեն իսկ իմացել է տուժողի մասին: Պաշտպանը հայտնեց, որ ըստ հեռախոսահամարների ելքային-մուտքային զանգերի վերծանումների, առաջին հանդիպման օրն իր պաշտպանյալը զանգահարել է տուժողին:

Վկայի ցուցմունքում նրա իսկ նախաքննական ցուցմունքների հետ էական հակասություն նկատեց նաև դատարանը: Վկան իր նախաքննական ցուցմունքում հայտնեց, որ աղջիկը տուժողին հայտնել էր, որ հղի է նրանից, տուժողը զարմացել է, որովհետև նրա հետ սեռական հարաբերություն չի ունեցել՝ «ոչ հղի է եղել, ոչ էլ նման բան»: Մինչդեռ դատարանում հրապարակված վկայի նախաքննական ցուցմունքում հղիության կեղծ ահազանգի մասին ոչինչ չկար:

Ըստ մեղադրական եզրակացության, գործով տուժողը՝ Հայաստանի պետական տնտեսագիտական համալսարանի երրորդ կուրսի ուսանող Ազատը, համակրել է և 2015թ. հունվարից մինչև սեպտեմբեր ընկած ժամանակահատվածում ընկերություն արել իր համակուրսեցի աղջկա հետ:

Աղջկա ցանկությամբ նրանք դադարեցրել են իրենց հարաբերությունները, թեև Ազատն ամեն կերպ տարբեր պատրվակներով փորձել է վերականգնել նախկին շփումը, սակայն դա արդյունք չի տվել:

2016թ. մարտից աղջկան համակրել է և մտերիմ հարաբերություններ է հաստատել Սևան քաղաքի բնակիչ, գործով ամբաստանյալ Գոռ Սարգսյանը: Աղջկա հետ շփման ընթացքում նա տեղեկացել է աղջկա ու Ազատի միջև նախկինում ունեցած հարաբերությունների մասին և ցանկացել է հանդիպել վերջինիս այդ կապի վերաբերյալ զրուցելու նպատակով:

2016թ. ապրիլի 4-ին ՀՊՏՀ-ի մասնաշենքի մոտակայքում հանդիպել և զրուցել է Ազատի հետ, որի ընթացքում վերջինս հայտնել է իր ու աղջկա միջև նախկինում տեղի ունեցած հարաբերությունների մասին, միաժամանակ տեղեկացրել է, որ վերջինս «տուն տանելու աղջիկ չէ»:

Տուժողի տեղեկություններից մտահոգվելով՝ Սարգսյանը աղջկան տարել է բժշկական կենտրոն՝ համապատասխան հետազոտության, որի արդյունքում պարզվել է աղջկա կույս լինելու հանգամանքը:

Այնուհետև Սարգսյանն Ազատի կողմից աղջկան վարկաբեկելու և սուտ տեղեկություններ հայտնելու հարցերի պարզաբանման նպատակով, իր ընկերների հետ միասին, ապրիլի 8-ին ժամը 13.30-14.00-ի սահմաններում ԵՊՀ իրավագիտության ֆակուլտետի մասնաշենքին հարող տարածքում հանդիպել է Աբրահամյանին և նրա մի խումբ ընկերներին, որից հետո Ազատին առաջարկել է առանձնանալ և զրույցը ծավալել մյուսներից անջատ պայմաններում:

Ըստ մեղադրական եզրակացության, առանձնանալով մյուսներից` Սարգսյանն ու Ազատը քայլել են դեպի կենսաբանության մասնաշենքի ետնամասի կողմը, որտեղ էլ օգտվելով մեկուսի պայմաններից, ամբաստանյալը մեկ անգամ գլխով հարվածել է տուժողի դեմքի շրջանին՝ աջ աչքի ստորին կոպի հատվածում պատճառելով վնասվածք, ապա տուժողին կյանքից ապօրինի զրկելու դիտավորությամբ, նրա մոտ գտնվող ծակող-կտրող շեղբ ունեցող մեկսայրանի դանակով երկու անգամ հարվածել է վերջինիս կենսականորեն կարևոր օրգաններին, այն է՝ կրծքավանդակի ձախ կեսի շրջանին՝ պատճառելով կյանքի հետ անհամատեղելի վնասվածքներ, ապա Չարենցի փողոցով դիմել է փախուստի: Իսկ տուժողը Չարենցի փողոցից տեղափոխվել է հիվանդանոց, որտեղ ժամը 17.45-ին ստացած վնասվածքներից գիտակցության չգալով՝ մահացել է:

Աղբյուր` Փաստինֆո