Փաստ ինֆո

Երևանի պետական համալսարանի շենքում ուսանողի առողջությանը ծանր վնասի հասցրած վիճաբանության գործով այսօր դատարանում հրապարակվեց ամբաստանյալի առողջական վիճակի վերաբերյալ փորձաքննության եզրակացությունը:

Դրանով հաստատվել է, որ ամբաստանյալ Գարիկ Ղազարյանը տառապում է ծանր, երրորդ փուլի ուռուցքային հիվանդությամբ: Ըստ փորձագետների, ամբաստանյալի հիվանդությունը ներառված է ՀՀ կառավարության որոշմամբ պատիժը կրելուն խոչընդոտող ծանր հիվանդությունների ցանկում, նա չի կարող պահվել անազատության մեջ, քանի որ պետք է գտնվի ուռուցքաբանի հսկողության ներքո՝ իրականացնելով ճառագայթային ու քիմիոթերապևտիկ բուժումներ:

Ամբաստանյալի պաշտպան Մանվել Գրիգորյանը միջնորդեց իր պաշտպանյալի նկատմամբ գրավի կիրառումը ճանաչել թույլատրելի, սահմանել գրավի չափ և կալանավորումը փոխարինել գրավով:

Ըստ պաշտպանի, իր պաշտպանյալին կալանքի տակ պահելն արդարացված չէ, չի բխում Մարդու իրավունքների եվրոպական կոնվենցիայի երրորդ հոդվածի՝ Խոշտանգումների արգելում, պահանջներից, նման պայմաններում անձին կալանքի տակ պահելը

ՄԻԵԿ հիշյալ հոդվածի համաձայն կարող է որակվել որպես ֆիզիկական հաշվեհարդար ու խոշտանգում:

Մեղադրողը մեկ օր ժամանակ խնդրեց միջնորդության վերաբերյալ կարծիք հայտնելու համար: Դատարանը բավարարեց միջնորդությունը, սակայն դատարանի ծանրաբեռնվածությունից ելնելով՝ հաջորդ դատական նիստը նշանակվեց փետրվարի մեկին:

Ըստ մեղադրանքի, Գարիկ Ղազարյանը Երևանի պետական համալսարանի կենտրոնական մասնաշենքի 1-ին հարկի նախասրահում բացահայտ անհարգալից վերաբերմունք դրսևորելով նույն պահին նախասրահում գտնվող ուսանողների, ԵՊՀ աշխատակիցների և ներկա այլ անձանց նկատմամբ, վիճաբանել և կռվել է գործով չպարզված երկու անձանց հետ, որի ընթացքում վերջիններիս հետ միասին աղմկել է և բարձրաձայն հայհոյանքներ տվել:

Նույն պահին կարգի հրավիրելու նպատակով նրանց է մոտեցել ԵՊՀ միջազգային հարաբերություններ ֆակուլտետի 3-րդ կուրսի ուսանող Գոռ Խաչատրյանը և նկատողություն արել` պահանջելով դադարեցնել կռիվն ու հայհոյանքները: Գ. Ղազարյանը իր հետ գտնվող երկու անձանց հետ չդադարեցնելով խուլիգանական գործողությունները, շարունակելով դիտավորությամբ կոպիտ կերպով խախտել հասարակական կարգը, կռվի է բռնվել Գոռ Խաչատրյանի հետ, հարվածներ հասցրել նրան, որից հետո կռվողներին է միացել Գոռ Խաչատրյանի համակուրսեցի Գ. Արսենյանը: Կռվողների ձայներից հավաքվել են նախասրահում գտնվող տարբեր աձինք, այդ թվում՝ ԵՊՀ անվտանգության պետ Մարտիրոս Աջաբյանը և նրա աշխատակիցները, ովքեր փորձել են դադարեցնել կռիվը, սակայն Գարիկ Ղազարյանը և նրա հետ գտնվող անձինք չենթարկվելով նրանց պահանջներին, շարունակել են կռվել:

Այդ ընթացքում կռվողների աղմուկները լսելով՝ ԵՊՀ կենտրոնական մասնաշենքի մուտքի դռներից գործով չպարզված այլ անձանց հետ ներս է մտել Գոռ Խաչատրյանի մորաքրոջ որդի, ԵՊՀ միջազգային հարաբերություններ ֆակուլտետի քաղաքագիտական բաժնի 3-րդ կուրսի ուսանող Սարգիս Նազարեթյանը և տեսնելով, որ Գոռ Ղազարյանն ու նրա հետ գտնվող երկու անձինք կռվում են Գոռ Խաչատրյանի հետ, նույնպես միացել է կռվին: Այդ ընթացքում Գարիկ Ղազարյանն իր մոտ գտնվող որպես զենք օգտագործվող դանակով երեք անգամ դիտավորությամբ հարվածել է Սարգիս Նազարեթյանին` նրան պատճառելով ծանր վնաս:

Գարիկ Ղազարյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով և 258-րդ հոդվածի 4-րդ մասով:

Աղբյուր` Փաստինֆո