Փաստ ինֆո

Կրեմլում կտրականապես բացառել են ռուսաստանյան պաշտոնատար անձանց ու գերատեսչությունների առնչությունը հաքերական հարձակումներին, ինչում Մոսկվային մեղադրում է Վաշինգտոնը:

Կենտրոնական հետախուզական վարչության, Ազգային անվտանգության գործակալության և Հետաքննությունների դաշնային բյուրոյի պատրաստած զեկույցը բովանդակում է ոչնչով չամրապնդված, սիրողական մակարդակի մեղադրանքներ: Ըստ ՌԻԱ Նովոստիի, այս մասին հայտարարել է ռուսաստանյան նախագահի մամուլի քարտուղար Դմիտրի Պեսկովը: Նա նշել է, որ ամերիկյան պատմության մեջ արդեն մեկ անգամ չէ, որ պատահել են «վհուկների որսի» նման փուլեր:

«Մենք գիտենք, որ հետո նրանք փոխվում են ավելի ողջախոհ մասնագետներով, ավելի ողջախոհ մոտեցումներով՝ դեպի երկխոսություն, այլ ոչ թե այդպիսի զգայական նոպաների տանող»,- հավելել է մամուլի քարտուղարը:

Միաժամանակ Պեսկովն ընդգծել է, որ Մոսկվան արդեն «լրջորեն հոգնել է» այդ մեղադրանքներից:

Ըստ երկրի ղեկավարի մամուլի քարտուղարի, զեկույցի հրապարակված մասը ոչնչի չի հանգեցրել, բացի հիասթափությունից:

«Այդքան շատ էմոցիաներ շարել այդպիսի սակավ նյութի վրա, դա, իհարկե, տարակուսանք է առաջացնում», - եզրահանգել է նա:

Պեսկովը նշել է նաև, որ հատուկ ծառայությունների զեկույցի առնչությամբ Թրամփի դիրքորոշման մասին դատողություններ անելը դեռևս վաղաժամ է:
«Այդ մասին հաստատապես հայտնի չէ, քանի որ մենք ձեր հետ միասին չգիտենք պրն. Թրամփի արձագանքի մասին: Ընտրված նախագահը դեռևս այդ մասին միանշանակ որևէ մեկնաբանությամբ հանդես չի եկել»,- հիշեցրել է նա:

Ավելի վաղ ամերիկյան հատուկ ծառայությունները հրապարակել են ԱՄՆ նախագահի ընտրություններին ռուսաստանյան ենթադրյալ միջամտության մասին զեկույցը: Ըստ ռուսաստանյան լրատվամիջոցի, փաստաթղթում պնդում է կատարվում, որ Ռուսաստանը փորձել է հասնել Դոնալդ Թրամփի ընտրվելուն, սակայն դրա մասին որևէ ապացույց չի բերվում:

Աղբյուր` Փաստինֆո