Փաստ ինֆո

Ամերիկյան հետախուզությունը հաքերային հարձակումների համար մեղադրել է անձամբ Պուտինին

Կենտրոնական հետախուզական վարչությունը, ԱՄՆ ազգային անվտանգության գործակալությունն ու Հետաքննությունների դաշնային բյուրոն հրապարակել են վերջերս տեղի ունեցած ԱՄՆ նախագահական ընտրություններում «Ռուսաստանի միջամտությանը» նվիրված համատեղ զեկույցը:

Հեղինակների մտահղացման համաձայն, փաստաթուղթը հետազոտում է նախագահական ընտրությունների առնչությամբ Մոսկվայի «շարժառիթներն ու մտադրությունների սահմանները» և դրա ազդեցությունը ամերիկացիների հասարակական կարծիքի վրա՝ «կիբերգործիքների» և ԶԼՄ-ներում արշավների օգնությամբ:

Հեղինակները պնդում են, որ ռուսաստանյան իշխանությունները փորձում էին խանգարել Հիլլարի Քլինթոնին դառնալ նախագահ, ամերիկյան քաղաքացիների աչքում նրան «սևացնել» և խարխլել ԱՄՆ-ում ժողովրդավարական գործընթացը:

Համապատասխան «արշավի» անցկացման կարգադրությունն իբրև տվել է անձամբ Վլադիմիր Պուտինը: Հենց նա էլ ռուսաստանյան կառավարության հետ համատեղ ձգտում էր ավելացնել Դոնալդ Թրամփի հաղթանակի շանսերը, ըստ ՌԻԱ-Նովոստիի, գտնում է ամերիկյան հետախուզությունը:

Միջոցները, որոնց օգնությանն է դիմել Ռուսաստանը, Կենտրոնական հետախուզական վարչության, ԱՄՆ ազգային անվտանգության գործակալության ու Հետաքննությունների դաշնային բյուրոյի տեսանկյունից, ներառում է հաքերական հարձակումները, «երրորդ անձանց միջնորդությունը», ինչպես նաև ԶԼՄ-ների գործունեությունը և «գնված տրոլլները»:

Փաստաթղթում, այդ թվում՝ խոսվում է այն մասին, որ Ռուսաստանը հասանելիություն ուներ ԱՄՆ տարածքում ընտրական հանձնաժողովներին: Ընդ որում հեղինակները խոստովանում են, որ «ռուսաստանյան հաքերների» կողմից հարձակման ենթարկված համակարգերը ոչ մի կերպ կապված չեն ձայների հաշվարկի հետ:

Զեկույցի էական մասը նվիրված է ռուսաստանյան ԶԼՄ-ներ Sputnik-ի և RT-ի գործունեությանը, որոնք, հատուկ ծառայությունների պնդմամբ, դիտավորյալ Հիլլարի Քլոնթոնին ներկայացնում էին բացասական կերպով, կենտրոնանալով գրագրության սկանդալի և նրա առողջական վիճակի մասին լուրերի վրա:

ԱՄՆ հետախուզությունը նաև նշում է, որ ամառային օլիմպիական խաղերից հետո ռուսաստանյան հաքերները իրենց հիմնական նպատակակետերից մեկն են ընտրել Համաշխարհային հակադոպինգային գործակալությունը (WADA): Մասնավորապես, արգելված միջոցների կիրառման մեջ բռնված ամերիկյան մարզիկների մասին տվյալների արտահոսքը վերագրվում են Ռուսաստանի Գլխավոր հետախուզական վարչությանը (ГРУ):

Զեկույցում ասվում է, որ հենց ГРУ-ն է օգտագործել Guccifer հաքերի անձն ու DCLeaks.com կայքէջը, որպեսզի հրապարակի հաքերային հարձակումների արդյունքում ստացված տվյալները, հենց նա է փոխանցել տվյալները Wikileaks-ին, որոնք ստացվել էին ԱՄՆ Դեմոկրատական կուսակցության ազգային կոմիտեի սերվերը կոտրելուց հետո:

Արդեն իսկ ամերիկյան ընտրություններից հետո Մոսկվան, ամերիկյան հետախուզության կարծիքով, փորձում էր կոտրել ազգային անվտանգության, պաշտպանության ու միջազգային քաղաքականության բնագավառի ամերիկյան փորձագիտական կենտրոնների ու ոչ կառավարական կազմակերպությունների սերվերները: Դա արվել է նյութեր հավաքելու համար, որոնք հնարավոր կլիներ ապագայում կիրառել ԱՄՆ ներքին գործերի վրա ազդելու համար, պնդում է արվում փաստաթղթում:

«Մենք գտնում ենք, որ Մոսկվան ամերիկյան ընտրությունների արշավների ուղղությամբ յուրացրած դասերը, որոնց անցկացման կարգադրությունը տվել է Պուտինը, կօգտագործի աշխարհի երկրների, այդ թվում՝ ԱՄՆ դաշնակիցների և նրանց ընտրական գործընթացների վրա ազդելու հետագա փորձերի համար», - եզրահանգում են զեկույցի հեղինակները:

Աղբյուր` Փաստինֆո