Փաստ ինֆո

Թուրքիայի խորհրդարանը քվեարկել է, չհաջողված ռազմական հեղաշրջման փորձից հետո՝ 2016թ. հուլիսին, մտցված արտակարգ դրությունը երեք ամսով երկարացնելու օգտին:

Ըստ BBC-ի ռուսական ծառայության, խորհրդարանի որոշումը ուժի մեջ կմտնի հունվարի 19-ին: Այսպիսով արտակարգ դրության ռեժիմը Թուրքիայում կհարատևի առնվազն մինչև ապրիլի կեսերը, իսկ այդ ռեժիմի ընդհանուր տևողությունը կկազմի 9 ամիս:

Կառավարության արտակարգ լիազորությունների երկարացման առիթ հանդիսացել է ամանորյա գիշերը անհայտ հրաձգի կողմից Ստամբուլում իրականացված հարձակումը գիշերային ակումբի վրա: Այն ժամանակ համարյա 40 մարդ էր զոհվել:

Տեղի ունեցածի պատասխանատվությունը ստանձնել էր «Իսլամական պետություն» ծայրահեղական խմբավորումը, որը ստանձնել է Թուրքիայում նաև այլ հարձակումների պատասխանատվությունը:

Թուրքական իշխանությունները երկրորդ անգամ են երկարացնում անցյալ տարվա հուլիսին երեք ամսով մտցված արտակարգ դրության ռեժիմի գործողության ժամկետը: Առաջին անգամ այդպիսի որոշում ընդունվել էր 2016թ. հոկտեմբերին:

Արտակարգ դրության ռեժիմը մտցվել է անցյալ տարվա հուլիսի 15-ի հեղաշրջման փորձից հետո, որի ընթացքում զոհվել է մոտ 250 մարդ: Հեղաշրջման փորձից հետո կառավարության կողմից կատարված զտումների ընթացքում մի քանի տասնյակ հազար մարդ արտաքսվել է երկրից կամ կորցրել աշխատանքը: Կալանավորված անձանց թիվը, ըստ գնահատականների, 32 հազար մարդ է:

Ռեժիմի մտցնելն ու երկարացնելը անհանգստություն են հարուցել Եվրոպական միությունում և ԱՄՆ-ում: Շատ իրավապաշտպաններ գտնում են, որ Անկարան արտակարգ դրության ռեժիմն օգտագործում է քաղաքացիների անօրինական հետապնդման համար:

Աղբյուր` Փաստինֆո