Փաստ ինֆո

Ազգային ժողովի փոխնախագահ Էդուարդ Շարմազանովն ամփոփել է 2016թ. քաղաքական տարին: Դեկտեմբերի 29-ին ՀՀԿ ԳՄ նիստի ավարտից հետո լրագրողների հետ հանդիպմանը ՀՀ ԱԺ փոխնախագահն ընդգծեց, որ քաղաքական տարին բավականին բարդ է եղել, եղել են ձախողուmnեր, թերություններ, առավելություններ:

«Ընդհանուր առմամբ, տարին բարդ էր և լի էր իրադարձություններով: Նոր Սահմանադրության ընդունումից հետո, սա, փաստորեն, առաջին տարին էր, և մենք մեր վրա զգացինք նոր Սահմանադրության դրական միտումները: Նախ, փետրվարի 12-ին հանրապետության Նախագահը հանդես եկավ ծրագրային ելույթով, որով գործնական ռելսերի վրա դրեց Հայաստանում բարեփոխումների կուրսը, տվեց, թե ինչպիսի չափորոշիչների և չափանիշների պետք է համապատասխանեն պետական պաշտոնյաները: Ես համոզված եմ, որ եթե չլիներ ապրիլյան քառօրյա պատերազմը, այն բարեփոխումները, որոնք սկսվեցին հուլիսից հետո, շատ ավելի շուտ կսկսվեին, որովհետև այդ բարեփոխումների անհրաժեշտության մասին հանրային կյանքի բոլոր ոլորտներում անդրադարձել է Հայաստանի Նախագահը»,- «Արմենպրես»-ի հաղորդմամբ՝ նշեց Շարմազանովը՝ հավելելով, որ անշեղորեն գնալու են հանրապետության Նախագահի ծրագրային ելույթներում մատնանշված դրույթները կյանքի կոչելու ճանապարհով:

ՀՀ ԱԺ փոխնախագահը հավելեց, որ տարին հագեցած էր նաև Հայաստանի համար արտաքին մարտահրավերներով: Նրա խոսքով՝ ապրիլյան քառօրյա պատերազմը լուրջ մարտահրավեր էր ոչ միայն հայկական պետականությանը, այլ առհասարակ տարածաշրջանին:

«Ես ևս մեկ անգամ ցանկանում եմ գլուխ խոնարհել մեր բոլոր հերոսների առջև: Նրանք բոլորը զոհեր չեն, այլ հերոսներ են, որոնք կյանքը չխնայելով, գնացին հավերժություն՝ հանուն հայրենիքի: Այսօր նաև մեծապես նրանց շնորհիվ է, որ մենք ապրում ենք հնարավորինս հարաբերական խաղաղության մեջ: Ապրիլյան քառօրյա պատերազմը ցույց տվեց, որ Ադրբեջանը ֆիասկո ապրեց: Ադրբեջանի ռազմաքաղաքական ղեկավարության ծրագրերը չիրականացան: Դա ցույց տվեցին Սանկտ Պետերբուրգի և Վիեննայի գագաթնաժողովները: Ադրբեջանի նպատակն էր զրոյից սկսել բանակցությունները: Դա նրան չհաջողվեց: Ադրբեջանին չհաջողվեց որևէ բնակավայր գրավել: Նրանք մի քանի ժամով կարողացան գրավել Թալիշը, սակայն այսօր այդ բնակավայրը մերն է, մեր զինված ուժերը կարողացան այն հետ բերել»,- նշեց Շարմազանովը:

Շարմազանովը հավելեց, որ հայկական կողﬔրը հստակ նշել են, իսկ համանախագահող երկրներն ընդունել են, որ 1994 և 1995 թվականների զինադադարի պայմանագրերն անհրաժեշտություն են:

«Ավելին, Հայաստանի Նախագահը խոսել է մի շարք թեզերի անհրաժեշտության մասին, որոնք ես անվանել եմ ապրիլյան թեզիսներ: Այնտեղ հստակ խոսք էր գնում ԵԱՀԿ անձնական ներկայացուցչի գրասենյակի լիազորությունների ավելացման մասին, ինչպես նաև մոնիթորինգի մեխանիզմների իրականացման: Սանկտ Պետերբուրգում և Վիեննայում այս թեզիսներն ընդունվել են: Սրանք այլևս ոչ միայն Հայաստանի Նախագահի թեզիսներն են, այլ թեզիսներ են, որոնք միս ու արյուն են ստացել համանախագահների կողմից, որոնք ամրագրվել են Վիեննայի և Սանկտ Պետերբուրգի հանդիպումների ժամանակ»,- ընդգծեց Էդուարդ Շարմազանովը:

Հաջորդ ցավալի իրադարձությունը ԱԺ փոխնախագահը համարում է հուլիսյան իրադարձությունները, երբ մի խումբ զինված անձինք գրավել էին ՀՀ ոստիկանության պարեկապահակետային ծառայության գունդը: Շարմազանովը կարևորեց այն հանգամանքը, որ Հայաստանի իշխանություններն այդ օրերին գնացին ոչ թե ահաբեկչության դեմ պայքարի դասական մեթոդների կիրառման, այլ հանդուրժողականության ճանապարհով:

«Մի քանի շաբաթ բանակցություններ վարելով հակառակ կողմի հետ՝ հնարավոր եղավ մեր պետությունը զերծ պահել նոր ցնցուﬓերից և զոհերից: Դա տեղի ունեցավ բացառապես իշխանությունների ճկուն քաղաքականության արդյունքում»,- ասաց նա:

Հաջորդ կարևոր իրադարձությունը Շարմազանովը համարում է Հայաստանի անկախության 25-ամյա տարեդարձը:

«Բոլոր թերություններով հանդերձ, պետք է նշել, որ Հայաստանը գնում է ճիշտ ուղղությամբ: Մենք ունենք այլևս կայացած Հայաստանի Հանրապետություն իր զարգացած ինստիտուտներով: Այլևս Հայաստանի անկախության սերունդը փաստ է, Հայաստանի պետական ինստիտուտները, հասարակությունը, ազատ մամուլը փաստ են: Ամենամեծ ձեռքբերումը մեր անկախության սերունդն է, ազգային բանակը և մեր ժողովրդավարական ինստիտուտները»,- նշեց ՀՀ ԱԺ փոխնախագահը: Նա կարևորում է նաև նոր ընտրական օրենսգրքի ընդունումը, որի շուրջ հնարավոր է եղել հասնել աննախադեպ կոնսոլիդացիայի:

«Դա պատմական կոնսոլիդացիա է քաղաքական ուժերի միջև Հայաստանի նորագույն պատմության ընթացքում, երբ առաջին անգամ ընդդիմությունը և իշխանությունը ստորագրել են մեկ քաղաքական փաստաթղթի տակ: Սրանով լուրջ հիմքեր են ստեղծվել, որպեսզի 2017թ. խորհրդարանական ընտրությունները լինեն լավագույնը մեր նորագույն պատմության ընթացքում: Իշխանությունը, գնալով փոխզիջումների, ցույց տվեց, որ ամենաշահագրգիռ կողմն է, որպեսզի մեր երկրում ընտրություններն անցնեն ազատ, արդար և թափանցիկ»,- հավելեց Շարմազանովը:

Նա անդրադարձավ Հայաստանի նոր կառավարությանը՝ ընդգծելով, որ այն բարեփոխումները կյանքի կոչելու կառավարություն է: «Այս ամիսների ընթացքում Կարապետյանի կառավարությունն ապացուցել է, որ ի զորու է իրականացնել այն խնդիրները, որոնք նախանշվել են կառավարության ծրագրի մեջ»,- եզրափակեց Շարմազանովը:

Աղբյուր` Փաստինֆո