Փաստ ինֆո

Երևանի Կենտրոն և Նորք-Մարաշ վարչական շրջանների դատարանում այսօր սկսվեց հայրասպանության վերաբերյալ հերթական գործի դատաքննությունը:

Ըստ մեղադրանքի, Արմեն Առաքելյանն իր հորը` Հայկարամ Առաքելյանին,  սպանելու դիտավորությամբ, երկու չափաբաժին  «կետոնալ» տեսակի դեղամիջոցի ներարկման, այնուհետև պարանոցից սեղմելու եղանակով խեղդամահ է արել նրան՝ այդ կերպ ապօրինաբար դիտավորությամբ զրկել կյանքից:

Այսպես, ըստ մեղադրական եզրակացության, Արմեն Առաքելյանը հոր՝ Հայկարամ Առաքելյանի, հետ երկար տարիներ միասին բնակվել են իրենց երևանյան բնակարանում:

Ամբաստանյալի հայրը երկար տարիներ տառապել է թոքերի, անոթների, ուղեղի սնուցման հետ կապված առողջական խնդիրներով և այդ ամբողջ ընթացքում Արմեն Առաքելյանը տնային պայմաններում խնամել է հորը, այդ թվում  նաև՝ կատարել նրա դեղորայքային ներարկումները:

Տարիների ընթացքում որդին հոգնել է հորը խնամելու պարտականությունից, հոր անկողնային հիվանդ լինելու հանգամանքը  համարել որպես իր վրա ծանրացած բեռ, այլևս չի կարողացել հանդուրժել հիվանդությամբ տառապող Հայկարամ Առաքելյանի ներկայությունը և մշտապես նրա նկատմամբ հոգատար վերաբերմունք ցուցաբերելու իր որդիական պարտականությունը:

Խնամելուց ձանձրացած ու հոգնած լինելու պատճառով Արմեն Առաքելյանը սկսել է հաճախակի վիճել հոր հետ,  կարճ ժամանակահատվածում հոր հետ ունեցած բազմաթիվ վիճաբանությունների հետևանքով նրա նկատմամբ առաջացած ատելության և վրեժի հետևանքով Արմեն Առաքելյանի մոտ  առաջացել է Հայկարամ Առաքելյանին ապօրինաբար կյանքից զրկելու մտադրություն՝ այդ կերպ ցանկանալով ազատվել ծնողին պահելու և խնամելու իր պարտականությունից:

«Իր հանցավոր մտադրությունն իրագործելու նպատակով քաջատեղյակ լինելով «կետոնալ» տեսակի դեղամիջոցի չարաշահման կյանքի համար վտանգավոր հետևանքների մասին, Արմեն Առաքելյանը 2016թ. մայիսի  24-ի երեկոյան Հայկարամ Առաքելյանին մեկ ժամվա ընթացքում ներարկել է երկու չափաբաժին՝ յուրաքանչյուրը 2 մլ, «կետոնալ» տեսակի դեղամիջոց, ապա նրան միայնակ թողնելով՝ դուրս է եկել տանից:

2016թ. մայիսի  25-ին ժամը 02.00-ի սահմաններում Արմեն Առաքելյանը վերադառնալով տուն՝ տեսնելով, որ հայրն ընկած է հատակին, դժվար է շնչում, դեռևս չի մահացել, իր հանցավոր մտադրությունն ավարտին հասցնելու նպատակով ձեռքերով բռնել է Առաքելյանի պարանոցից, սեղմելու միջոցով խեղդամահ արել նրան և այդ կերպ ապօրինաբար դիտավորությամբ վերջինիս զրկել է կյանքից»,- նշվում է մեղադրական եզրակացության մեջ:

Ամբաստանյալը հայտարարեց, որ ՀՀ քրեական օրենսգրքի 104-րդ հոդվածի 1-ին մասով՝ սպանություն,  առաջադրված մեղադրանքում իրեն մեղավոր չի ճանաչում:  Ըստ նրա, ինչո՞ւ պետք է ինքը ցանկանար ազատվել հորից, հայրը ցավեր ուներ, ինքն էլ նրա խնդրանքով ներարկել է: «Շան կեր կար, պապան կարող է կերել ու թունավորվել է, ես ինչ իմանամ»,- ասաց ամբաստանյալը՝ հավելելով, որ հայրն ասում էր՝ ներարկիր, ինքն էլ ներարկում էր՝ ցավերը մեղմելու համար, մի անգամ ներարկելուց հետո հայրը հետևից կանչել է, ասել է՝ մի հատ էլ ներարկիր, քանի որ ցավերը չէին մեղմանում, ինքն էլ ներարկել է: 

Դատարանի սահմանած ապացույցների հետազոտման կարգի համաձայն, նախ կհարցաքննվեն վկաները, տուժողի իրավահաջորդը, ապա ամբաստանյալը կարող է ցուցմունք տալու իր իրավունքից օգտվել, վերջում կհետազոտվեն գործի գրավոր ապացույցները:

Աղբյուր` Փաստինֆո