Փաստ ինֆո

«Անելիք» բանկի իրավաբանական վարչության պետ Հովհաննես Աթանյանի սպանության գործով այսօրվա դատական նիստում գործում ներգրավվեց հանրային պաշտպան Դավիթ Մնացականյանը՝ որպես ամբաստանյալ Մկրտիչ Պողոսյանի պաշտպան:

Փաստաբանը ժամանակ խնդրեց գործի նյութերին ծանոթանալու համար, դատարանը բավարարեց միջնորդությունը, հաջորդ դատական նիստը տեղի կունենա արդեն հաջորդ տարի:

Ի դեպ, դատարանը գործի նյութերին ծանոթանալու համար արդեն երկրորդ անգամ է ժամանակ տրամադրում փաստաբանին: Ավելի վաղ գործում ներգրավել էր մեկ այլ հանրային պաշտպան, նա գնացել էր ՔԿՀ իր պաշտպանյալի մոտից գործի նյութերը վերցնելու, սակայն վերջինս փաստաբանի փոխարեն որոշել էր, որ պաշտպանը չի հասցնի ծանոթանալ գործի նյութերին, և դրանք չէր տրամադրել նրան:

Հանրային պաշտպանի գրասենյակի ղեկավար Մելանյա Առուստամյանն այդ կապակցությամբ գրություն էր ուղարկել դատարան, որով տեղեկացրել էր, որ հանրային պաշտպանի լիազորությունները դադարեցված են, քանի որ ամբաստանյալն իր գործողություններով, մասնավորապես, պաշտպանին գործի նյութերը չտրամադրելով, անհնարին է դարձրել պաշտպանության իրականացումը, և նա կատարել է փաստաբանի պատիվն, արժանապատվությունն ու հեղինակությունն անվանարկող գործողություններ:

Դատարանն այդ ժամանակ արձանագրել էր՝ ամբաստանյալն արդեն չորրորդ ամիսն է թույլ չի տալիս, որ դատավարությունն սկսվի:

Հիշեցնենք, որ 2015թ. նոյեմբերի 24-ին` ժամը 20:40-ի սահմաններում, Վարդանանց փողոցում որսորդական հրացանից արձակված կրակոցով սպանվել էր «Անելիք» բանկի իրավաբանական վարչության պետ Հովհաննես Աթանյանը:

Սպանությունը կատարելու մեջ մեղադրվում է տաքսու վարորդ Մկրտիչ Պողոսյանը, ով բանկի հետ ունեցել է գույքային վեճ, ինչի կապակցությամբ նախկինում մի քանի անգամ հանդիպել է բանկի իրավաբանական վարչության պետին: Վերջին հանդիպումը տեղի է ունեցել դեպքի օրը՝ բանկում, որից ժամեր անց տեղի է ունեցել սպանությունը։

2012թ-ի սեպտեմբերին Պողոսյանները վաճառել են Փարաքարում գտնվող, իրենց ընտանիքին պատկանող «Անգելինա» ռեստորանը, որի ներսում գտնվող գույքը նույն պայմանագրով անհատույց օգտագործման պայմանագրով հանձնվել է ռեստորանի նոր տիրոջը: Նա էլ գրեթե անմիջապես գրավադրել է ռեստորանի անշարժ գույքը «Անելիք բանկ»-ում` դրա դիմաց ստանալով 1.300.000 ԱՄՆ դոլարի վարկ: Սակայն հետագայում վարկային պարտավորությունները չի կատարել, որի պատճառով էլ գրավադրված գույքը դարձել է բանկի սեփականությունը:

Իմանալով այս մասին՝ Մկրտիչ Պողոսյանը դիմել է բանկ` ռեստորանում մնացած իր գույքի դիմաց բանկից պահանջելով 300.000 ԱՄՆ դոլար:
Բանկը, սակայն, հրաժարվել է վճարել կամ վերադարձնել գույքը` պատճառաբանելով, որ ռեստորանային համալիրում գտնվող շարժական գույքը նույնպես հանդիսացել է գրավի առարկա, որի նկատմամբ բռնագանձում է տարածվել և այն չի կարող վերադարձվել իրեն:

Այս հարցի շուրջ Մկրտիչ Պողոսյանը 2012թ-ից մինչ օրս բազմիցս հանդիպել է բանկի իրավաբան, այնուհետև իրավաբանական վարչության պետ Հովհաննես Աթանյանին, բայց մերժում ստացել:
Մկրտիչ Պողոսյանը նաև դատարան է դիմել` դատական կարգով փորձելով վերականգնել իր խախտված իրավունքները: Բայց քաղաքացիական գործերի քննությունը դեռևս չավարտված՝ Մկրտիչ Պողոսյանն իմացել է, որ «Անգելինա» ռեստորանը` իրեն պատկանող գույքով, դարձյալ շահագործվում է:

Աղբյուր` Փաստինֆո