Փաստ ինֆո

Այսօր Վերաքննիչ քրեական դատարանը անպարտ է ճանաչել և արդարացրել է պաշտոնեական կեղծիքի մեջ մեղադրվող Շիրակի մարզի քննչական բաժնի Կումայրիի քննչական բաժանմունքի քննիչ Ավետիք Թովմասյանին: Այդ մասին «Փաստինֆո»-ն տեղեկացավ Ավետիք Թովմասյանի պաշտպան Գեորգի Մելիքյանից:

Վերաքննիչ բողոքը ներկայացվել էր Ավետիք Թովմասյանի պաշտպաններ Գեորգի Մելիքյանի և Վահագն Մարտիրոսյանի կողմից:

Պաշտպան Գեորգի Մելիքյանի խոսքով՝ իր համար առանձնահատուկ էր այս որոշումը, քանի որ տարիներ առաջ ինքն իրեն չի կարողացել արդարացնել, սակայն այսօր քննիչ Ավետիք Թովմասյանի գործով ընդհանուր ջանքերով կարողացել են հասցնել արդարացման։

Ոստիկանության քննիչը պատասխանատվությունից խուսափելու համար պաշտոնեական կեղծիք է կատարել

Նշենք, որ առաջին ատյանի դատարանի վճռով Ավետիք Թովմասյանը դատապարտվել էր 250 000 ՀՀ դրամի չափով տուգանքի:

Ավետիք Թովմասյանի նկատմամբ մեղադրանք էր առաջադրվել ՀՀ քրեական օրենսգրքի 314-րդ հոդվածի 1-ին մասի հատկանիշներով:

Ավելի վաղ Հատուկ քննչական ծառայության լրատվականը տեղեկացրել էր, որ նախաքննությամբ պարզվել է, որ Ա. Թովմասյանն իր վարույթում քննվող քրեական գործով վկայի՝ Հովհաննես Ս.-ի առանձնատանը կատարած խուզարկության ժամանակ հայտնաբերել և առգրավել է 0.5 գրամ քաշով «Մարիխուանա» տեսակի թմրամիջոց և վերջինիս վարչական պատասխանատվության ենթարկելու անհրաժեշտության մասին հարցը քննարկելու համար գրությամբ դիմել է բաժնի պետին, սակայն գրությունը կցելով քրեական գործին` առաջին օրինակը ոստիկանության բաժին չի ուղարկել:

Որոշ ժամանակ անց Ա. Թովմասյանը բաժնի պետի տեղակալից տեղեկանալով գրությունը բաժին չուղարկվելու մասին` քրեական գործով որոշում է կայացրել Հովհաննես Ս.-ի նկատմամբ քրեական հետապնդում չիրականացնելու մասին, սակայն հիշյալ որոշումը ՀՀ քրեական դատավարության օրենսգրքի 55-րդ հոդվածի 4-րդ մասի 28-րդ կետի պահանջների խախտմամբ գործով նախաքննության օրինականության նկատմամբ հսկողություն իրականացնող դատախազին չի ուղարկել և որոշումը քրեական գործի նյութերին չի կցել:

Քրեական գործով նախաքննությունն ավարտելիս քննիչ Ա. Թովմասյանը, հիշյալ որոշումը օրինականության ստուգման համար դատախազին չուղարկելու՝ իր կողմից նախկինում թույլ տրված դատավարական խախտման համար պատասխանատվությունից խուսափելու անձնական դրդումներով, այլ ամսաթվի թվագրությամբ քրեական հետապնդում չիրականացնելու մասին որոշման, ինչպես նաև այդ մասով վարույթն ավարտված լինելու հանգամանքները թաքցնելով, իրական փաստերը խեղաթյուրելով, նույն քրեական գործով նույն անձի նկատմամբ քրեական հետապնդում չիրականացնելու մասին կազմել է նոր, պաշտոնական փաստաթուղթ համարվող կեղծ որոշում, որը կցել է քրեական գործի նյութերին, իսկ պատճենն ուղարկել նախաքննության նկատմամբ հսկողություն իրականացնող դատախազին:

Աղբյուր` Փաստինֆո