Փաստ ինֆո

«Նուբարաշեն» ՔԿՀ-ում քրեական հեղինակություն Արմեն Ալեքսանյանի կողմից կազմակերպված անկարգությունների գործով նախաքննությունն ավարտվել է: Այդ մասին «Փաստինֆո»-ն տեղեկացավ Արմեն Ալեքսանյանի պաշտպան Գարիկ Գալիկյանից:

Պաշտպանը նաև հայտնեց, որ քրեական գործը բաղկացած է 6 հատորից և այն տրամադրվել է պաշտպանական կողմին` ծանոթանալու նպատակով:

Ավելի վաղ «Փաստինֆո»-ն տեղեկացրել էր, որ ՔԿՀ-ում դատապարտյալների կողմից «բունտը» հասունացել է այն պատճառով, որ քրեական հեղինակություն համարվող Արմեն Ալեքսանյանի խցում նախատեսված խուզարկություն է եղել:

Մասնավորապես, Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի վարույթում քննվող քրեական գործով ամբաստանյալ, քրեակատարողական հիմնարկի թիվ 48 խցի կալանավոր, քրեական հեղինակություն համարվող Արմեն Ալեքսանյանը, տեղեկացել է, որ ՀՀ հատուկ քննչական ծառայության և ՀՀ ոստիկանության կազմակերպված հանցավորության դեմ պայքարի գլխավոր վարչության աշխատակիցների կողմից դատարանի որոշման հիման վրա խցում խուզարկություն է նախատեսվում և այն խափանելու նպատակով 2016թ. մայիսի 3-ին՝ ժամը 16:30-ի սահմաններում, քրեակատարողական հիմնարկում պահվող կալանավորված և դատապարտված անձանց հրահրել է իրականացնել զանգվածային անկարգություններ:

Խցում խուզարկություն իրականացնելու համար «Նուբարաշեն» ՔԿՀ էր գնացել նաև ՀՔԾ-ի պետի տեղակալը:

Քրեական հեղինակությանը բղավել է, թե «դաբրո» կա և կալանավորներին անհնազանդության կոչեր է արել: Կալանավորները տարբեր իրեր են նետել, աղմկել` հարվածելով դռներին, կոտրեն փականների և մի քանի տասնյակ կալանավոր հայտնվել է խցերից դուրս` գործադրելով տարաբնույթ բռնություններ իրավապահ մարմինների աշխատակիցների նկատմամբ, մածուն նետել ՀՔԾ պետի տեղակալի վրա:

Նշենք նաև, որ քրեական հեղինակություն Արմեն Ալեքսանյանը ամբաստանվում է գողության համար` Ալեքսանդր Քոլոզյանի հետ միասին:

Մեր տեղեկություններով՝ անկարգություններին ակտիվ մասնակցություն է ունեցել նաև ավազակային հարձակում կատարելու մեջ մեղադրվող Իբոյանը: Վերջինիս գործը նույնպես գտնվում է դատարանի վարույթում, քննվում է անցած տարվա հունիս ամսից: Նրան մեղադրանք է առաջադրվել ՀՀ քրեական օրենսգրքի 175-րդ հոդվածի 2-րդ մասի 4-րդ կետով:

Դեպքից հետո Քննչական կոմիտեն պաշտոնական հաղորդագրությամբ հանդես եկավ տեղեկացնելով, որ ձեռք բերված ապացույցների հիման վրա՝ 2016թ. հունիսի 3-ին որոշում է կայացվել Արմեն Ալեքսանյանին ՀՀ քրեական օրենսգրքի 225-րդ հոդվածի 1-ին մասով որպես մեղադրյալ ներգրավելու մասին:

Դեպքի վայրի զննությամբ առգրավվել են զանգվածային անկարգությունների ընթացքում կոտրված կերակրադռնակների և խցերի դռների փականքները, նշանակվել է դատահետքաբանական և ապրանքագիտական համալիր փորձաքննություն, օպերատիվ-հետախուզական միջոցառումներ ձեռնարկելու նպատակով հետաքննության մարմնին տրվել համապատասխան հանձնարարություն:

Քրեական գործով անցնում է 15 մեղադրյալ:

Լուսանկարը՝ Ֆոտոլուրի

Աղբյուր` Փաստինֆո