Փաստ ինֆո

Ջրասուզակները Սև ծովում հայտնաբերել են Ту-154 ինքնաթիռի հիմնամասը: Նախնական տեղեկության համաձայն, բեկորները գտնվում են 27 մ խորության և ափից մեկ մղոն հեռավորության վրա: Այս մասին «ՌԻԱ Նովոստի»-ին հայտնել են Արտակարգ իրավիճակների նախարարության հարավային տարածաշրջանի որոնողական-փրկարար ջոկատից:

«Ջրասուզակները գտել են չորս ֆրագմենտ, նրանցից մեկը մոտ չորս մետր երկարություն ունի»,- հայտնել է գործակալության զրուցակիցը՝ հավելելով, որ ներկայումս որոշվում է լողացող ամբարձիչ կռունկի օգնությամբ դրանց բարձրացման հարցը:

Բացի դրանից, աղբյուրը պատմել է, որ հայտնաբերված մի քանի զոհված ուղևորների մարմիններին եղել են փրկաբաճկոններ:

Ինչպես հայտնել են Անվտանգության դաշնային ծառայությունից, դեռևս չեն հայտնաբերվել ահաբեկչական ակտի նշաններ: Ինքնաթիռի կործանման հիմնական վարկածներ են համարվում շարժիչի մեջ կողմնակի առարկաներ ընկնելը, անորակ վառելիքը, օդաչուի սխալը և տեխնիկական անսարքությունը:

Ռուսաստանի պաշտպանության նախարարության ինքնաթիռը, որն ուղևորվում էր դեպի Սիրիա, կործանվել է կիրակի օրը Սոչիից ոչ հեռու: Ինքնաթիռում գտնվել է անձնակազմի ութ անդամ և 84 ուղևոր: Հատուկ ծառայությունները շարունակում են բեկորների ու զոհվածների մարմինների որոնումները:

Պաշտպանության նախարարության տեղեկատվության համաձայն, հայտնաբերվել է 11 մարմին և 154 ֆրագմենտ: Նրանց հասցնում են Մոսկվա՝ գենետիկական փորձաքննության համար:

Աղբյուր` Փաստինֆո