Փաստ ինֆո

Ղրղզստանը չի ստորագրել ԵվրԱզԷս-ի Մաքսային օրենսգիրքը, տեղեկացնում է ТАСС-ը՝ հղելով Եվրասիական տնտեսական հանձնաժողովի կոլեգիայի նախագահ Տիգրան Սարգսյանին:

«Բոլոր փաստաթղթերը ստորագրվել են բոլոր ներկաների կողմից՝ բացի երկուսից: Օրակարգի առաջին հարցը ստորագրել է երեք երկիր՝ Եվրասիական տնտեսական միության առևտրական քաղաքականության զարգացման մասին հայտարարությունը, չի ստորագրել Ղրղզստանը: Երկրորդ փաստաթուղթը Մաքսային օրենսգիրքն է: Երեք երկիր ստորագրել է, Ղրղզստանը չի ստորագրել Մաքսային օրենսգիրքը»,- ասել է Սարգսյանը Բարձրագույն եվրասիական տնտեսական խորհրդի ավարտին:

Ըստ նրա, մնացած փաստաթղթերը (մոտ 20-ը) ստորագրվել են:

Ինչպես ավելի վաղ պարզաբանել է ՌԴ նախագահի մամուլի քարտուղար Դմիտրի Պեսկովը, գագաթաժողովում բելառուսական առաջնորդ Ալեքսանդր Լուկաշենկոյի բացակայության պատճառով նախկինում ամբողջությամբ համաձայնեցված բոլոր փաստաթղթերը երկուշաբթի կուղարկվեն Մինսկ՝ Բելոռուսիայի նախագահի կողմից ստորագրվելու համար:

Եվրասիական տնտեսական միության Մաքսային օրենսգիրքը կգա փոխարինելու Մաքսային միության մաքսային օրենսգրքին, որն ընդունվել էր 2009թ.: Փաստաթուղթը կոչված է անհրաժեշտ հիմքեր դնել Եվրասիական տնտեսական միության շրջանակներում միասնական մաքսային կարգավորմանն անցնելու համար:

Նոր օրենսգրքում, որի շուրջ աշխատանքները կատարվում էին երեք տարվա ընթացքում, դրված են մաքսային գործողությունների ինֆորմատիզացիայի նոր մոտեցումներ, ներդրվում է բիզնեսի համար ավելի հարմար պետական մարմինների հետ փոխգործակցության ալգորիթմ, որը նվազեցնում է փաստաթղթերի թղթային շրջանառությունը և արտաքին տնտեսական գործունեության մասնակիցների ֆիզիկական շփումները պաշտոնատար անձանց հետ: Բացի այդ, մաքսային գործողություններն առավելագույնս միավորվում են միության բոլոր երկրների համար:

Աղբյուր` Փաստինֆո