Փաստ ինֆո

Էլեկտրաէներգիայի թանկացման դեմ ցույցերի ընթացքում` 2015 թվականի հունիսի 23-ին Երևանի Բաղրամյան պողոտայում, Ազատության հրապարակում և հարակից տարածքներում, ոստիկանների կողմից լրագրողների մասնագիտական օրինական գործունեությանը խոչընդոտելու գործով այսօր բոլոր չորս ամբաստանյալները հրաժարվեցին ցուցմունքներ տալուց ու հարցերին պատասխանելուց: Նրանք միաժամանակ հայտարարեցին, որ իրենց մեղավոր են ճանաչում, սակայն խնդրեցին հիմք ընդունել իրենց նախաքննական ցուցմունքները:

Որպես կասկածյալ ու մեղադրյալ տված իր ցուցմունքներում ՀՀ քրեական օրենսգրքի 164-րդ հոդվածի առաջին մասով (երկու դրվագով)` լրագրողի մասնագիտական օրինական գործունեությանը խոչընդոտելը, և 185-րդ հոդվածի 1-ին մասով՝ գույքը դիտավորությամբ ոչնչացնելը կամ վնասելը, մեղադրվող Դավիթ Փերիխանյանն ընդունել է, որ լրագրողի տեսախցիկը հարվածել է գետնին, ապա ոտքով հարվածել է տեսախցիկին, ևս մեկ լրագրողի բջջային հեռախոսն է վերցրել ու կոտրել, խոչընդոտել է լրագրողների գործունեությանը:

Երկու լրագրողների հետ առերես հարցաքննությունների ժամանակ Դ.Փերիխանյանն ընդունել է իր մեղքը ու ներողություն խնդրել նրանցից:

Ըստ Դ.Փերիխանյանի, թեև ինքը աշխատանքի մեջ չի եղել, սակայն հետաքրքրությունից դրդված, սեփական նախաձեռնությամբ գնացել
է Բաղրամյան պողոտա՝ տեսնելու, թե ինչ է կատարվում: Որպես իր արարքի բացատրություն ոստիկանը նշել է՝ չնայած քաղաքացիական հագուստով էի, ինքս էլ էի վիրավորվում ոստիկանների հասցեին ցուցարարների ասած վիրավորական խոսքերից:

Մյուս երեք ամբաստանյալները ևս՝ ՀՀ քրեական օրենսգրքի 164-րդ հոդվածի 2-րդ մասով՝ պաշտոնատար անձի կողմից, պաշտոնական դիրքն օգտագործելով՝ լրագրողի մասնագիտական օրինական գործունեությանը խոչընդոտելու մեջ մեղադրվող Տաճատ Նորատունկյանը, Արթուր Այվազյանը և Կոստան Բուդաղյանը՝ ի տարբերություն որպես վկա տված ցուցմունքների, որպես կասկածյալ ու մեղադրյալ տված ցուցմունքներում ընդունել են մեղադրանքը:

Տուժող ճանաչված կազմակերպության՝ Ուտոպիանա.am-ի, ներկայացուցիչ Դավիթ Գյուրջյանը դատաքննությունը լրացնող երկու միջնորդությամբ հանդես եկավ: Փաստաբանը միջնորդեց նշանակել իրենց վնասված տեսախցիկի կրկնակի դատաապրանագիտական փորձաքննություն՝ ըստ նրա, նախաքննության ընթացքում կատարված երկու փորձաքննություններում կան հակասություններ: Փաստաբանը միջնորդեց երեք հարց ուղղել փորձագետներին՝ որքա՞ն է կազմում Ուտոպիանա.am-ի տեսախցիկի մինչվնասվածքային, որքա՞ն հետվնասվածքային արժեքը և որքա՞ն է կազմում կոտրելու հետևանքով հասցված գույքային վնասը:

Տուժողի ներկայացուցիչը միջնորդեց նաև վկայի ու տուժողի ցուցմունքների շուրջ հարցաքննել Ազատություն ռադիոկայանի աշխատակից Հովհաննես Մովսիսյանին և ՀՀ ոստիկանապետի տեղակալ, Ոստիկանության զորքերի հրամանատար Լևոն Երանոսյանին՝ լրագրողների ձեռքից տեսախցիկները խլելը ու վնասելը վերջինիս կողմից կազմակերպված լինելու հարցի հետ կապված:

Մեղադրողը առարկեց երկու միջնորդությունների դեմ էլ: Մասնավորապես, դատաապրանքագիտական փորձաքննությունների վերաբերյալ նա նշեց, որ առաջին փորձաքննությամբ պատճառված վնասը չի հաշվարկվել, դրա համար էլ լրացուցիչ փորձաքննություն է նշանակվել, ուստի որևէ հակասություն չկա:

Դատարանն որոշեց բավարարել միջնորդությունը Հովհաննես Մովսիսյանին հարցաքննելու մասով, իսկ մնացած միջնորդությունների վերաբերյալ դատարանն որոշում կկայացնի արդեն հաջորդ դատական նիստում ՝ հաջորդ տարի:

Աղբյուր` Փաստինֆո