Փաստ ինֆո

ՊՊԾ գնդի տարածքում «Սասնա Ծռեր» խմբի անդամներին այս տարվա հուլիսի 26-ին հաց հասցրած Արթուր Սարգսյանի պաշտպանները այս պահի դրությամբ դեռևս սպասում են Մարդու իրավունքների եվրոպական դատարանի կողմից կիրառվող միջոցներին: Ինչպես «Փաստինֆո»-ի լրագրողին հայտնեց Ա.Սարգսյանի պաշտպան, փաստաբան Դավիթ Գյուրջյանը, ՄԻԵԴ-ը ժամանակ է տվել Հայաստանի կառավարությանը, որպեսզի պաշտպանների ներկայացրած բողոքին պատասխան ներկայացնի, համապատասխան հարցադրումներ է ուղղել և վերջնաժամկետ է նշել 2017թ. հունվարի 4-ը:

Փաստաբաններն իրենց բողոքում խնդրում են ՄԻԵԴ-ից, որպեսզի անմարդկային վերաբերմունքից զերծ պահելու նպատակով միջոցներ կիրառվեն Հայաստանի Հանրապետության նկատմամբ, որպեսզի վերջինս երաշխիքներ տրամադրի Արթուր Սարգսյանի կապակցությամբ՝ ընդհուպ մինչև նրա ազատ արձակելու վերաբերյալ: Դ.Գյուրջյանը հիշեցրեց, որ ըստ կառավարության որոշման, անձը ազատ է արձակվում, երբ նրա առողջական վիճակն անհամատեղելի է նրա նկատմամբ ազատազրկման տեսքով պատիժ կիրառելու կամ կալանքի տակ պահելու հետ:

«Տվյալ դեպքում անմարդկային վերաբերմունքից զերծ պահելու միակ հնարավորությունը դա իր ազատ արձակումն է»,- ասաց Դավիթ Գյուրջյանը:

Փաստաբանը հայտնեց նաև, որ երեկ Արթուր Սարգսյանը տեղափոխվել է «Դատապարտյալների հիվանդանոց», դրանից հետո պաշտպանները չեն տեսակցել նրա հետ, ուստի ներկա դրությամբ իրենց պաշտպանյալի առողջական վիճակի բարելավման կապակցությամբ նորություն չունեն:

«Մենք կրկին պնդում ենք, որ մենք նպատակ ունեինք ոչ թե «Դատապարտյալների հիվանդանոց» տեղափոխել, այլ առհասարակ կալանքից ազատ արձակել, որովհետև նույնիսկ «Դատապարտյալների հիվանդանոց»-ում բավարար պայմաններ չկան Արթուր Սարգսյանի առողջության պայմաններում նրան այնտեղ պահելու համար»:

Եղբայրը տեսակցել է Արթուր Սարգսյանին. Hetq.am

Դ.Գյուրջյանը նշեց, որ իրենք դեռևս դեկտեմբերի 12-ին՝ այն բանից հետո, երբ տեղեկատվություն են ստացել Արթուր Սարգսյանի առողջական վիճակի վատթարացման մասին, դիմել են Մարդու իրավունքների պաշտպանի գրասենյակ: Փաստաբաններին տեղեկացրել են, որ դիմումը քննարկման մեջ է, այսպես ասած՝ ընդունվել է վարույթ, որոշում է ակնկալվում, բայց դեռևս այդ որոշումը չկա: «Գործուն միջոց դեռևս ՄԻՊ գրասենյակը չի իրականացրել: Արագ արձագանքման խումբն այց իրականացրել է, բայց դա շատ անարդյունավետ միջոց է:

Արագ արձագանքման խումբն արձանագրել է, որ մինչև այցը «Էրեբունի» բժշկական կենտրոնի կողմից նշանակված համապատասխան բուժօգնությունը չի իրականացվել, միայն ՄԻՊ գրասենյակի աշխատակիցների ներկայությամբ նրան դեղահաբեր են տրամադրել, այն էլ ոչ նշանակված, այլ ըստ ՔԿՀ բուժաշխատողի, դրան փոխարինող դեղահաբեր:

Դավիթ Գյուրջյանը հայտնեց նաև, որ դեռևս 10-11 օր առաջ դիմում են ներկայացրել ՀՀ գլխավոր դատախազություն՝ Արթուր Սարգսյանի նկատմամբ առնվազն կալանավորման հետ չկապված խափանման միջոց ընտրելու կամ ընդհանրապես խափանման միջոցը վերացնելու պահանջով, մինչև հիմա պատասխան չի ստացվել: «Հիմա առաջնային խնդիրը նրա ազատության սահմանափակումը վերացնելն է»,- ասաց Դավիթ Գյուրջյանը:

Հիշեցնենք, որ Արթուր Սարգսյանի առաղջական վիճակի վատթարացման մասին ահազանգել էին նրա փաստաբաններ Տիգրան Եգորյանն ու Դավիթ Գյուրջյանը: Արթուր Սարգսյանի առողջական վիճակի վատթարացման մասին իր անհանգստությունն է հայտնել նաև նրա եղբայրը՝ Արսեն Սարգսյանը:

Մասնավորապես՝ ըստ փաստաբանների հաղորդագրության` դեկտեմբերի 10-ին Սարգսյանի մոտ սկսվել են գլխապտույտներ, սրտխառնոց և փսխումներ: Դեկտեմբերի 11-ին Արթուր Սարգսյանի մոտ արդեն սկսվել են արյունային փսխումներ:

Կանչվել է շտապօգնություն, և Սարգսյանը տեղափոխվել է «Էրեբունի» բժշկական կենտրոն: «Էրեբունի» բժշկական կենտրոնում իրականացվել է հետազոտություն, ինչի արդյունքում ախտորոշվել է կերակրափողի էրոզիա և ճաք, որից տեղի էր ունենում արյան արտահոսքը, աղեստամոքսային համակարգի խնդիրներ, նշանակվել է բուժում դեղորայքի և ներերակային կաթիլային ներարկումների միջոցով: Այնուհետև Սարգսյանը կրկին տեղափոխվել է «Նուբարաշեն» ՔԿՀ: Փաստաբաններն իրենց նամակում նշել են, որ այդ հիվանդությունների արդյունավետ բուժումն ակնհայտորեն չի կարող ապահովվել «Նուբարաշեն» ՔԿՀ-ում:

Աղբյուր` Փաստինֆո