Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանը՝ նախագահությամբ Վարդան Գրիգորյանի, այսօր անպարտ է ճանաչել և արդարացրել է բնակարանային գողության և գողության օժանդակության մեջ մեղադրվող 3 ամբաստանյալների:

Այս մասին «Փաստինֆո»-ն տեղեկացավ անչափահաս ամբաստանյալ Նարեկ Այվազյանի պաշտպան Կարինե Խաչատրյանից:

Գործով երեք ամբաստանյալներից մեկն անչափահաս է, և նրա նկատմամբ խափանման միջոց էր ընտրված հսկողության հանձնելը, երկրորդի նկատմամբ խափանման միջոց էր ընտրված չհեռանալու մասին ստորագրությունը, իսկ երրորդը գտնվում էր կալանքի տակ՝ արդարացման դատական ակտի հրապարակումից հետո վերջինս ազատ արձակվեց անմիջապես դատական նիստերի դահլիճից:

Ըստ մեղադրանքի՝ Վլադիմիր Վիրաբյանը ուրիշի գույքի գաղտնի հափշտակություն կատարելու դիտավորությամբ, 2014թ. սեպտեմբերի 8-ին՝ ժամը 24:00-ից մինչև սեպտեմբերի 9-ը ժամը 01:30-ն ընկած ժամանակահատվածում, օժանդակել է Ա.Աղաջանյանի կողմից առանձնապես խոշոր չափի՝ 14.345.000 ՀՀ դրամի բնակարանային գողություն կատարելուն:

Ըստ Արմեն Աղաջանյանին առաջադրված մեղադրանքի՝ Վ.Վիրաբյանի և Ն.Այվազյանի օժանդակությամբ, խմբի կազմում, քննությամբ չպարզված անձի հետ, նախնական համաձայնության գալով և բնակարան ապօրինի մուտք գործելով կատարել է առանձնապես խոշոր չափի` 14.345.000 ՀՀ դրամի ուրիշի գույքի գաղտնի հափշտակություն:

Նարեկ Այվազյանին էլ մեղադրանք էր առաջադրվել Ա.Աղաջանյանի կողմից առանձնապես խոշոր չափի` 14.345.000 ՀՀ դրամի բնակարանային գողություն կատարելու օժանդակության մեջ:

Վլադիմիր Վիրաբյանին և Նարեկ Այվազյանին մեղադրանք էր առաջադրվել ՀՀ քրեական օրենսգրքի 38-177 –րդ հոդվածի 3-րդ մասի 1,1.1 կետով, իսկ Արմեն Աղաջանյանին՝ 177-րդ հոդվածի 3-րդ մասի 1,1.1 կետով:

Նշենք նաև, որ գործով մյուս երկու ամբաստանյալների՝ Արմեն Աղաջանյանի պաշտպանությունն իրականացրել է փաստաբան Գարիկ Գալիկյանը, իսկ Վլադիմիր Վիրաբյանինը՝ Կարինե Սիմիդյանը:

Աղբյուր` Փաստինֆո