Փաստ ինֆո

Մերի Մարգարյանի և նրա նորածնի մահվան գործով հերթական դատական նիստը կկայանա հաջորդ տարի, իսկ այս տարվա վերջին նիստը հետաձգվեց՝ վկայի բացակայության պատճառով:

Այսօր Շենգավիթ վարչական շրջանների ընդհանուր իրավասության դատարանը՝ նախագահությամբ Դավիթ Բալայանի, ներկաներին տեղեկացրեց, որ դատակոչված բժիշկ վկա Անդրանիկ Պողոսյանին դատարանը պատշաճ ծանուցել է, սակայն այդ մասին հավաստագիր չի ստացել:

Դատական նիստի ընթացքում վկայի հետ հեռախոսազրույցի ժամանակ պարզվեց, որ նա դատական նիստին ներկայանալու վերաբերյալ ծանուցագիրը չի ստացել, ուստիև՝ դատական նիստը հետաձգվեց և նշանակվեց 2017թ. հունվարի 10-ին:

Հիշեցնենք, որ Մերի Մարգարյանը 4 օր շարունակ ունեցել է բարձր ջերմություն, սակայն «Շենգավիթ» ԲԿ մանկաբարձ-գինեկոլոգ Շուշանիկ Բախշյանը, ով եղել է հղիի բժշկական օգնություն և սպասարկում իրականացնող բժշկուհին, պարտավոր լինելով նրան հոսպիտալացնել, հրաժարվել և չի կատարել իր պարտականությունները. այս պայմաններում հղիին չհոսպիտալացնելը չի հիմնավորվել:

Բժշկի կողմից ցուցաբերված անբարեխիղճ վերաբերմունքի հետևանքով Մերի Մարգարյանը ծննդալուծումից հետո «HELLP» սինդրոմ համախտանիշ երկկողմանի թոքաբորբ» ախտորոշմամբ 2015թ-ի հուլիսի 29-ին մահացել է, կնոջ մահվան հաջորդ օրը` թոքերի և գլխուղեղի այտուցից մահացել է նաև նրա նորածին դուստրը:

Գործով մեղադրանք է առաջադրվել նաև նույն ԲԿ-ի մեկ այլ բժշկուհու՝ Անի Բաբելյանին: Ըստ մեր տեղեկությունների՝ բժշկուհին 2015 թվականի հուլիսի 25-ին առավոտյան եղել է հերթապահ մանկաբարձ- գինեկոլոգը, սակայն նա նույն օրը բարձր ջերմությամբ ԲԿ դիմած Մերի Մարգարյանին չի հոսպիտալացրել, ինչի հետևանքով առաջացած բազմաօրգանային անբավարարությունից Մ.Մարգարյանն օրեր անց՝ հուլիսի 29-ին, մահացել է:

Շուշանիկ Բախշյանին և Անի Բաբելյանին մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասի հատկանիշներով (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ):

Աղբյուր` Փաստինֆո