Փաստ ինֆո

2017 թվականի մարտի 21-ին Սահմանադրական դատարանում կսկսվի ՀՀ քրեական դատավարության օրենսգրքի 35-րդ հոդվածի 1-ին մասի 10-րդ կետի ՀՀ սահմանադրությանը համապատասխանությունը որոշելու վերաբերյալ գործի դատաքննությունը:

Գործը դատարանում քննվելու է ՀՀ վերաքննիչ քրեական դատարանի դիմումի հիման վրա: Վերաքննիչ դատարանը դիմումը ներկայացրել է Սյունիքի արդեն նախկին մարզպետ Սուրիկ Խաչատրյանի առանձնատան մոտ զինված միջադեպի ժամանակ սպանված Ավետիք Բուդաղյանի իրավահաջորդ Էմիլ Բուդաղյանի բողոքի քննության շրջանակներում՝ մեկ տարուց ավելի վերաքննիչ բողոքը քննելուց հետո:

Ըստ ՀՀ քրեական դատավարության օրենսգրքի 35-րդ հոդվածի՝ Քրեական գործի վարույթը կամ քրեական հետապնդումը բացառող հանգամանքները, առաջին մասի 10-րդ կետի, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե` անձը մահացել է, բացառությամբ այն դեպքերի, երբ գործի վարույթն անհրաժեշտ է մահացածի իրավունքների վերականգնման համար կամ ուրիշ անձանց նկատմամբ նոր ի հայտ եկած հանգամանքների կապակցությամբ գործը վերսկսելու համար:

Ավելի վաղ «Փաստինֆո»-ի հետ զրույցում փաստաբան Հայկ Ալումյանը նշել էր, որ դա հենց այն նորմն է, որի վրա հիմնվում են սպանված Ավետիք Բուդաղյանի իրավահաջորդն ու նրա ներկայացուցիչ Հայկ Ալումյանը՝ բողոք ներկայացնելով մահվան հիմքով Ավետիք Բուդաղյանի նկատմամբ քրեական հետապնդում չիրականացնելու, իսկ Սուրիկ Խաչատրյանի որդու ու թիկնապահի նկատմամբ քրեական հետապնդումը դադարեցնելու քննիչի որոշումների դեմ:

Հոդվածի հիշյալ կետը նախատեսում է բացառություն՝ մահվան հիմքով քրեական հետապնդումը կարող է իրականացվել կամ չդադարեցվել, եթե գործի վարույթն անհրաժեշտ է մահացածի իրավունքների վերականգնման համար կամ ուրիշ անձանց նկատմամբ նոր ի հայտ եկած հանգամանքների կապակցությամբ գործը վերսկսելու համար:

Տվյալ դեպքում Ավետիք Բուդաղյանի հարազատները և նրա իրավահաջորդ հայրը պնդում էին, որ «ո՛չ, մենք պահանջում ենք քրեական հետապնդումը շարունակել, քրեական գործը քննել մինչև վերջ, որովհետև մենք պատրաստվում ենք ապացուցել, որ Ավետիք Բուդաղյանը սպանության փորձ չի կատարել, նա նրանց հարձակման զոհն է»:

«Եվ, հանկարծ, քննության արդյունքներով Վերաքննիչ դատարանը որոշեց, որ, պարզվում է, այն հոդվածը, որի վրա մենք ենք հիմնվում, հակասահմանադրական հոդված է: Ոչինչ չունեն մեր ասածի դեմ ասելու՝ մենք հստակ հիմնվում ենք այդ վերապահման վրա, ի վերջո ոչ թե քննիչը պետք է մեղավոր ճանաչի, այլ դատարանը՝ մեղավոր ճանաչի կամ արդարացնի»,- մեր հետ զրույցում նշել էր Հայկ Ալումյանը:

Փաստաբանն ընդգծել էր նաև, որ օրենքի մեջ եթե շատ քիչ դրույթներ կան, որոնք առհասարակ անվիճելի են, մեկը սա է, այդուհանդերձ, Վերաքննիչ դատարանը, փաստաբանի գնահատմամբ, զուտ իրենց պահանջներին լուծում տալուց խուսափելու համար որոշել է դիմել Սահմանադրական դատարան:

«Ոչ մի հակասահմանադրական բան այս նորմի մեջ չկա, հակաօրինականն ու հակասահմանադրականն այն ամեն ինչն է, ինչ մինչև հիմա արվում է Բուդաղյանների գործով՝ և՛ հակասահմանադրական է, և՛ հակաօրինական, և՛ հակաիրավական, և նաև՝ անմարդկային: Իսկ այն նորմը, որի վրա մենք հիմնվում ենք, միանգամայն Սահմանադրությունից բխող նորմ է»,- ասել էր փաստաբանը:

Հայկ Ալումյանը պարզաբանել էր նաև, որ իրենք հիմնվում են նաև Եվրոպական կոնվենցիայի 6-րդ հոդվածի՝ արդար դատաքննության իրավունք, առաջին կետի վրա, որտեղ ասվում է, որ յուրաքանչյուր ոք, ով մեղադրվում է հանցագործության կատարման մեջ, ունի դատարանի իրավունք ու իրավունք, որպեսզի դատարանը որոշի ինքը մեղավոր է, թե չէ:

Լուսանկարը՝ Armenpress-ի

Աղբյուր` Փաստինֆո