Փաստ ինֆո

«Նոր բանդայի» գործով այսօրվա դատական նիստում պաշտպանական կողմն ավարտեց պաշտպանական ճառերի հրապարակումը:

Ամբաստանյալ Կարեն Վարդանյանի պաշտպան, փաստաբան Թամարա Բաղդասարյանը հայտարարեց, որ բանդիտիզմի որակման համար գործում առկա չէ, մասնավորապես, կայուն խմբի հատկանիշը (ըստ մեղադրանքի, բանդան ստեղծվել է տարադրամի փոխանակման կետերի վրա հարձակումներ կատարելու նպատակով): Ըստ պաշտպանի, ոչ թե կազմակերպված խմբի, այսինքն՝ բանդայի, կողմից են կատարվել նկարագրվող արարքները, այլ նախնական համաձայնությամբ մի խումբ անձանց կողմից:

Ըստ պաշտպանի, ավազակային հարձակման հետևանքով փոխանակման կետի աշխատակցի մահը նույնպես սխալ է որակվել սպանության, այն պետք է որակվեր ՀՀ քրեական օրենսգրքի 112-րդ հոդվածի 2-րդ մասի 14-րդ կետով՝ դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահը: Կարեն Վարդանյանն, ըստ պաշտպանի, սպանելու դիտավորություն չի ունեցել, հակառակի մասին գործում չկան ապացույցներ, առավել ևս հիմնավոր ապացույցներ: Ուստի պաշտպանը միջնորդեց բանդիտիզմի ու սպանության հոդվածներով ճանաչել Կարեն Վարդանյանի անմեղությունը, ճիշտ իրավական գնահատական տալ, իսկ ապօրինի զենքի ու ավազակության հոդվածներով նշանակել համաչափ մեղմ պատիժ:

Ամբաստանյալ Հայկ Կոջոյանի պաշտպան, փաստաբան Արմեն Ֆերոյանը միջնորդեց իր պաշտպանյալին անպարտ ճանաչել և հռչակել նրա անմեղությունը: Ըստ պաշտպանի, իր պաշտպանյալի նկատմամբ խախտվել է արդար դատաքննության իրավունքը՝ թեև ամբաստանյալ Կարեն Վարդանյանն իր ցուցմունքում հայտարարել էր, որ փոխանակման կետի վրա ավազակային հարձակումը կատարել է ոչ թե Ռաֆայել Հարոյանի ու Հայկ Կոջոյանի հետ, այլ դատապարտյալ, «Ջուկ» մականվամբ Վահան Գալստյանի հետ, սակայն վերջինս այդպես էլ դատարան չհրավիրվեց ու չհարցաքննվեց:

Ըստ Արմեն Ֆերոյանի, մեղադրողը փոխել է, խստացրել բանդիտիզմի մեղադրանքը առանց որևէ ապացույցի փոփոխության: Ըստ պաշտպանի, այդպիսով խախտվել է իր պաշտպանյալի պաշտպանության իրավունքը. մեղադրողը մեղադրանքը փոխել է մեղադրական ճառում, դատաքննությունը չի վերսկսվել, որպեսզի ինքը հնարավորություն ունենար այդ նոր մեղադրանքից իր պաշտպանյալին պաշտպանել:

Պաշտպանը զուգահեռներ անցկացրեց այս գործի և նմանատիպ այլ գործերի միջև՝ առաջինում մեղադրանքում նկարագրված գործողությունները որակվել են որպես բանդիտիզմ, մինչդեռ այլ բազմաթիվ գործերով նմանատիպ հանգամանքների պարագայում արարքները որակվել են որպես ավազակություն:

«Փաստինֆո»-ի լրագրողի հետ զրույցում Արմեն Ֆերոյանն ընդգծեց, որ իր պաշտպանյալին ընդհանրապես մեղադրանք չպետք է առաջադրվեր, քանի որ ինքը որևէ հանցանք չի գործել, բայց զուտ առաջադրված մեղադրանքի սահմաններում պետք է առաջադրվեր ավազակային հարձակման և ոչ թե բանդիտիզմի մեղադրանք: «Ո՞րն է այլ գործերից այս գործի առանձնահատկությունը, որ առաջադրվել է բանդիտիզմի մեղադրանք: Պարզապես ինչ-որ ձևով փորձել են իբր հնչեղություն հաղորդել այս գործին»,- ասաց փաստաբանը՝ հավելելով, որ «սրանից այն կողմ իրավունքների կոպիտ խախտում, ինձ թվում է, չի լինում»:

Աղբյուր` Փաստինֆո